און צום זייגער וועל איך יעצט איינמאל פאר אלעמען רעדן שווערע רייד, בלשון דיבור און נישט בלשון אמירה..
הערט מיך אויס הרב זייגער שיחי'
איר זענט ביי מיר זייער טייער איך האב מיך געלאזט פאר אייך קאסטן א טייערע פרייז, דער צירונג הענדלער האט ארויסגעריקט אפאר שיינע מאות'לעך אויף דיין חשבון, אלעס ווייל איך האב אין אייך געהאט טראסט, אז איר וועט מיר שיין באדינען און טאן מיין ווילן..
אזוי ווי איך האב אבער איינגעזען, אז לא, דאס טייטשט ניין.... איר האלט ביי גארנישט, קוים קוים, איר גיבט זיך א רוק צו מערב צו... ווי א שיינער איד האלט איר זיך ביים מזרח זייט, און קאלאבערירט נאך גאר מיטן זון, וואס פונקט ווי דער זייגער, שטייט זי ווי א כלה ביים שבע ברכות וואס האלט נישט ביים אויפגעבן און זיך אוועקריקן, וועלנדיג אויסנוצן די טייערע מאמענטן, און ווי מער אריינכאפן...
וויסן זאלסטו זייגער מיינער, מיר פארשטייען אייערע תאוות גוט, איר ווילט אין אייער לעבן אריינכאפן ווי מער צייט ווען איר שטייט און רוקט זיך, און איר האט מורא אז ווי שנעלער דאס וועט גיין, וועט איר אלצדינג אנווערן, און דערפאר פירט איר זיך אזוי אויף
אזוי ווי די צדיקים הקדושים זאגן דאך א שיינער מוסר, אז ס'איז געווען א קעניג וואס פלעגט זייער וועניג שלאפן, נארמאל ווייס מיר דאך פון די משנה אנהייב ברכות, אז די מלכים שלאפן אריין אין טאג אריין, און דאס איז די שינה של שחרית שמוציאין מן העולם, אבער יענער מלך איז קוים עפעס געשלאפן, לשאלת בני מלכותו, למה? האט ער געענטפערט אז ער וויל פשוט נישט פארשלאפן די מלוכה, ענליך ווערט דערציילט אויף ר' שאול וואהל דער מלך פון פוילן אויף איין נאכט.
פירן זיי אויס, אז אזוי ברויך יעדער איד, צו לעבן און צו שטרעבן, אז ס'איז א שאד יעדער מינוט וואס מ'פארפאטשקעט פון צו לעבן אלס אתם תהי' לי ממלכת כהנים וגוי קדוש, כי עם סגולה אתם לה' אלקיכם ובך בחר, אך באבותיך חשק ה'... איי בני בכורי ישראל,.... כל ישראל בני מלכים זאגט ר' עקיבא אין במה אשה.. .
לענינינו, זייגער'ל לעבן, דאס אלעס איז פיין און וואויל, אבער לא לכך נוצרת... נישט פאר אטא דאס זענט איר באשאפן געווארן און צוזאמגעשמאלצן געווארן, נאר פאר דעם איינעם תפקיד, אז איר זאלט זיך רוקן און רוקן אן א סוף, און טאקע נישט פאוואליע, נאר פאדאליע.
און אז נישט!!! אויב חלילה, וועט דאס אזוי אנהאלטן און איר וועט ווייטער שפילן דאס שפיל'כל פון א באגילדעטער עושר'ס א קינד, וואס איז מפונק בכל מיני מעדנים, דאן זאלט איר וויסן, אז מ'עט אייך די בגדים אויסטון, און איר וועט בלייבן א פראסטער זייגער מיט אפאר ראדלעך, ערום ויחף... אז איר וועט שוין דאן כאפן דעם רמז'ל, און האפנטליך אזוי ווערן א מענטש...
ווי עס רעדט צו אייך, אייער אויבערהאר, פון די אויבערשטע שיכט קלאס... פייטל דער אויבערמאן.