איינוואוינערס אין וועסט מידלענד, א פראווינץ אין צענטראל-מערב ענגלאנד, זענען נעכטן נאכט געווען עדות צו א מיסטעריעזן ספעקטאקל אין די הימלען -- צענדליגער ליכטיגע אביעקטן זענען ארומגעפלויגן מיט א גרויסער שנעלקייט, און קיינער קען דערווייל נישט דערקלערן וואס די זאכן זענען געווען.
צושויערס זאגן אז זיי האבן געציילט ארום 70 רונדיגע אזעלכע "זאכן", וואס זענען באשטאנען פון א ליכטיגן פונקט אין צענטער ארומגענומען מיט א צאל קלענערע ליכט-פונקטן, און זענען געפלויגן דאפלט אזוי שנעל ווי א געווענליכן עראפלאן.
דער ראדאר-סיסטעם פון א דערנעבנדן לופטפעלד האט גארנישט אויפגעכאפט, און קיין דערקלערונג אויף דער דערשיינונג איז דערווייל נישטא.
א סך פון די צושויערס גלייבן, אז די אביעקטן זענען געווען באזוכערס פון אן אנדערן פלאנעט -- אזויגערופענע "יו-עף-אוס" -- אומבאצייכנטע פליענדע אביעקטן.