מאנטאג אפריל 24, 2017 1:58 pm#368910
לקראת "וועקער" 9 לכו ונלכה
דער עולם לייענט נאך דעם הערליכן נומער 8 פונעם וועקער, אבער די רעדאקציע שלאפט נישט. מיר גרייטן זיך שוין בגדול פאר'ן קומענדיגן וועקער, נומער 9, וואס וועט ערשיינען נאך שבועות.
עס איז שווער איבערצושאצן וואספארא אויפטו, און מ'קען זאגן רעוואלוציע, דער וועקער איז. בלויז דאס בלעטערן אין די לעצטע פאר וועקער אנטדעקט א וועלט פון טאלאנט אין אונזער וועלט ווי קיינמאל בעפאר. עס איז באמת צו שטוינען וואספארא הערליכע ווערק אונזער שרייבער שטעלן אהער, און וויפיל טאלאנט און וויסנשאפט וואלט אנדערש געבליבן באגראבן.
אינעם פאריגן וועקער האבן מיר געשריבן:
- דער דאזיגער נומער פון דעם וועקער ווייזט מיט פילפארביגע קאלירן וואספארא פאטענציאל עס איז פאראן ביים חרדישן ציבור. ווי שווער עס גלייבט זיך, זענען די מיינונגען און שילדערונגען פון אזויפיל אנדערע, צומאל קעגנזייטיגע, פערספעקטיוון, און פארשידנארטיגע דרכי הכתיבה - געשריבן דורך אידן פון דער זעלבער געזעלשאפט און געדרוקט אין דער זעלבער אויסגאבע. דאס הארץ איז איבערגענומען מיט פרייד און דאנקבארקייט אז מיר האבן א חלק אין ארויסשלעפן דעם געוואלדיגן פאטענציאל וואס וואלט אנדערש געבליבן באגראבן.
מיר האפן אז איר וועט הנאה האבן, און אפשר וועט דאס אייך אינספירירן ארויסצונעמען אייער אייגענעם פעדער, צו מהנה זיין זיך זעלבסט און אונזערע לייענער.
דער וועקער דרוקט נישט סתם אייערע ווערק ווי עס שטייט און גייט, נאר צוזאמען מיט'ן שרייבער גייען מיר עס דורך, און מיר שארפן עס אויס אז ס'זאל ארויסקומען מיט'ן פולסטן פראכט. אונזער ציל איז נישט נאר אז דער יעצטיגער ארטיקל זאל ארויסקומען דאס שענסטע וואס מעגליך, נאר אז איר, דער שרייבער, זאלן קונה זיין ערפארונג און זיך נאך מער אויסשארפן און אויסארבעטן די טאלאנטן.
דער קומענדיגער וועקער קומט ארויס לכבוד דעם זומער, און קען אנטהאלטן ארטיקלען אויף יעדער נושא. פארשטייט זיך אז מ'קען צילן ארטיקלען אויף ספעציפישע זומערדיגע נושאים ווי נסיעות, תשעה באב, אלול, די ליקוי החמה, וואקאציע, ענטערטעינמענט, וכדומה.
דער דעדליין אריינצושיקן ארטיקלען איז זונטאג, ג' סיון, מאי 28. דאס איז קנאפע פינף וואכן פון היינט. ביטע אריינשיקן אייערע ארטיקלען וואס פריער.
