מיימון האט געשריבן:ווער עס ווייסט ווייסט אז די אלע אידישע מאגאזינען פארמאגן כמעט נישט קיין אייגן צוזאמגעשטעלטע ארטיקלען נאר טוען בלויז טרענסלעיטן פון ענגלישע ארטיקלען אנליין. אין דער בליץ איז עס שטארק מערקבאר מיט זייער שלעכטע טראנסלאציע. דער נייער מאגאזין (אויך איידערן ליינען) זעט אויס צו זיין דער זעלבער געדאנק, צוזאמגעשטעלט אין איילעניש, געכאפט אפאר ארטיקלען איבערגעטייטשט צוגעלייגט גרעפיקס, און היידא. די גוטע נייעס איז אז עס קען אזוי אנגיין אסאך שטערקער ווי א עכט גוטע קוואליטעט אויסגאבע וויבאלד עס פאדערט נישט צופיל ארבעט.
לאמיתו של דבר איז נישט רעאליסטיש צו ערווארטן קיין אקאדעמישע מחקרים אויף אידיש ווילאנג עס איז נישט דא קיין אידישע אקאדעמיע וק"ל (אפילו קוואדראט איז מסתמא פסודו-מחקר וואס וואלט נישט געפעסט אין א אקאדעמישן זשורנאל)
מיימון. און ארי נוהם: מ'דארף געדענקען אז אין די אידישע גאס איז פארהאן אזא זאך ווי קריטיקער און קריטיקירער. די ערשטע זענען מענטשן וואס זענען לכאורה פראפעסיאנאלן אין די ליין פון זשורנאליזם און שרייבן. און זיי זאגן ארויס זייער אומאפהענגיקע, פראפעסיאנאלע מיינונג איבער א פובליקאציע אדער מעגעזין. ווען איינער אדער א גרופ קומען ארויס מיט א נייעם זשורנאל אדער מעגעזין דארפן זיי אדורכגיין די פראפעסיאנאלע קריטיק פון די וועלכע זענען ממונה דערויף (אדער האבן זיך אליינס ממנה געווען). דאס קען נאך א יעדער פארטראגן ווייל סוכ"ס איינער וואס געט ארויס א זשורנאל וויל דאך אז דער עולם זאל הנאה האבן דערפון, און ס'זאל זיין פראפעסיאנאל אהערגעשטעלט...!
אבער די צווייטע גרופ, די זעלבסט געקרוינטע קריטיקירער, וועלכע זענען עפ"י רוב בעלי תשובה למחצה לשליש ולרביע שלא שנו כל צורכם (אנטשולדיגט), און זיי וועלן אייביג אנקוקן א יעדע ערשיינונג מיט א בליק פון חושש זיין אז ס'איז נישט גענוג פרום, אדער ח"ו פארדארבן -- זיי אליינס ווייסן אויך נישט פונקטליך פארוואס, אבער דאס איז ביי זיי א נאטורליכער אינסטינקט -- ווארפן זיי אייביג אריין א קלאץ און ברענגען אויף חששות אז דאס געשריבענע ארטיקל אדער דער ניי געדרוקטער זשורנאל איז נישט אויסגעהאלטן לויט זייער השקפה, און זיי טוען באאיינפלוסן דעם דעת הקהל. דערפאר האבן די מחברים און פאבלישערס מורא ארויסצוקומען מיט די אמת'ע רעזולטאטן פון זייערע מחקרים און ריסוירטש. זיי ווילן ענדערש ברענגען פארווע נייעס און ארטיקלען, כדי צופרידנצושטעלן די קריטיקירער...!
דאס איז געווען דער פאל מיט די מאמענט/שפאקטיוו מעגעזין בראשית דרכם. זיי האבן געהאט זייער א גוטן קוואליטעט פראדוקט. אבער ווען די געוויסע ...! קריטיקירערס האבן זיך צולאזט האט עס אנגעמאכט א גרויסן טומל. און די רבנים זענען נאכגעטאנצן און באלד ארויסגעקומען מיט איסורים וחרמות.
אפילו דער מאמענט, וועלכער איז לכאורה גאנץ א גוטער מאגאזין (אויסער די זיסע סאטמאר'ע פראפאגאנדע וואס ער פארקויפט א יעדע וואך) איז אויכעט נשפע געווארן פון די פאררוקטע ערשיינונג פון די בעלי תשובה פון ראקלענד קאונטי. ווען ער ברענגט היסטארישע בילדער פון די וועלט, פארווישט ער רוב פון די הייזער און מענטשן, אויס מורא אז די זעלבע חברה וועלכע האבן געוואלט אונטערברענגען דעם מאמענט וועלן זיך נעמען צו זיינע ביינער אויך. נאר ביי דעם פאל פון מאמענט, זענען דא גענוג משוגעים אין די אייגענע סאטמאר'ע רייען אין וויליאמסבורג, וועלכע ווילן אונטערברענגען דעם מאמענט... ממילא מוז ער זיך שטארק באגרעניצן. דאס זעלבע איז אויך מיט א יעדן איינעם, אריינגערעכנט דער "אינטערעסאנט" מעגעזין...!
