נח בער האט געשריבן:ראובן האט געשריבן:עס איז ארויסגעקומען "חנוך לנער". אין דעם בוך זענען צוזאמענגענומען געווארן די ארטיקלען פון דעם פאפולערן קאלום "חנוך לנער" וואס איז געלאפן לאנגע יארן אין "מעלות".
מעג איך בעטן אן אפהאנדלונג אויף דעם בוך?
אז מעלות בכלל און דער קאלום בפרט איז פאפולער ביים אומוויסנדן קרייז, איז נישט קיין ראי' לכאן או לכאן.
דער "חנוך לנער" קאלום האט א סך לאגישע אנווייזונגען וועלכע זענען באגריסנווערד. פאלגנד זענען ציטאטן פון דער אפטיילונג "צו ג-ט און צו לייט" אונטערן קעפל "קלוגע עלטערן, קלוגע קינדער":
* דערפאר דארפן עלטערן אויסברייטערן די קינדער'ס מוחות מיט וואס מער אומשעדליכע און באלערנדע ידיעות און באגריפן פון נאטור, געזעלשאפט, היסטאריע, געאגראפיע, קונסט, און אנדערע חכמות.
* קינדער דארפן וויסן דעם חילוק צווישן הלכות, מנהגים, און חומרות.
* דארף מען בארייכערן זייערע ידיעות מיט וועלטליכע ענינים וועלכע זענען נויטיג און נוצליך אין פראקטישן און אין געזעלשאפטליכן לעבן.
* א פיר-פינף יעריג קינד מעג שוין וויסן אין וועלכער שטאט און לאנד ער וואוינט, פון וואס מען מאכט ברויט, קעז, וויין, ציצית, פון וואו עס קומט דאס וואסער פון קראן. א צען יעריג קינד מעג שוין וויסן ווי אזוי עס ווערט רעגן, פארוואס ווינטער איז קאלטער ווי זומער, ווי אזוי עסן ווערט פארדייעט, דער חילוק צווישן א קעניג און א פרעזידענט. וואס עלטער דאס קינד ווערט, אלץ רייכער און טיפער דארפן זיין די טעמעס אין וועלכע ער איז באקאנט און אינטערעסירט.
* ווען א קינד פרעגט, "וואס מיינט קרייצצוגן?" אדער "רש"י איז געווען א חסיד?", און מען ענטפערט אים מיט חיות און אינטערעס, ווייזט מען אים אז קונה זיין חכמה איז פיל וויכטיגער ווי פלוידערן אויפ'ן טעלעפאן. אפילו ווען מען ווייסט נישט דעם ענטפער, זוכט מען עס צוזאמען, אדער ווייזט מען אים וואו צו זוכן אדער וועמען צו פרעגן.
* דאס אלעס פאדערט פיל צייט, אבער עס איז ווערד יעדע רגע. קינדער וואס האבן אסאך ידיעות האבן בעסערע אויסזיכטן מצליח צו זיין אין לעבן בעז"ה, ברוחניות ובגשמיות, סיי אין לערנען און סיי אין חברותא. וויבאלד זיי האבן וואס צו טראכטן און וואס צו רעדן, זוכן זיי נישט אויפמערקזאמקייט מיט נארישע און נעגאטיווע מיטלען. זיי טרעפן באפרידיגונג אין אינהאלטסרייכע באשעפטיגונגען און געשפרעכן, און ציען צו גוטע חברותא, מיט וועמען זיי קענען זיך דורכרעדן און פארברענגען אויף א העכערער ניווא.
נאך אן אפטיילונג, "בין ישראל לעמים", ספראוועט זיך מיט'ן ערקלערן דעם חילוק צווישן אידן און גוים אויף א פארשטענדליכן, שכל'דיגן וועג, אן זיך אראפלאזן צו דעם מיאוס'ן מהלך פון אראפרייסן גוים מיט לעכערליכע באשולדיגונגען.