דאס איז א שאלה וועלכע איז שוין אסאך ארום גערעדט געווארן, און איך וואלט געוואלט דאס אויסשמועסן דא אביסל.
אויבן אויף קוקט מיר אויס די צדדים אזוי:
אויב גייט דאס יא אדורך (און איך רעד יעצט פון די קעטסקילס), גייט די גאנצע קאנטרי געגענט ווערן אויפגעארבעט, די ריעל עסטעיט גייט ארויפגיין גאר הויך, ספעציעל אין די געגענט ארום די קאסינאס, דאס מיינט אז אלע אידן וועלכע האבן פראפערטי אין די געגענט קענען שטארק נתעשר ווערן, צו דורך פארקויפן דעם פראפערטי פאר דעוועלאפערס, צו דורך עס אליינס דעוועלאפן, צוליב דעם אנלויף פון מענטשן וועט זיין אסאך געלעגענהייטן פאר ביזנעס און פרנסה דארט אין די געגענט, אזוי אז אידן וועלן קענען גרינגער מופן אהין, עס וועט לכאורה אויך ברענגען בעסערע איפראסטרוקטור אין די געגענט, ווי למשל מער דאקטוירים, שפיטעלער, און אנדערע צוגעהערן וועלכע א געגענט מיט אסאך מענטשן דארף האבן.
דאס זענען אלעס מעלות.
די חסרונות ווידער זענען, אז עס ברענגט אן א נידריגע עלעמענט נאנט צו די היימישע קאנטריס, און עס ברענגט נישט נאר דעם עלעמענט, נאר דאס נידריגקייט אליינס, עס ברענגט דעם געמבלינג, מיט אלעס וואס דאס ברענגט מיט (ווי בתי ז... למשל) צו אונז אונטער די נאז.
אויב גייט עס נישט אדורך, דאן בלייבט אלעס אזוי ווי יעצט.
היוצא לי מכל זה, ווי איך זעה דעם ענין, די מעלות זענען פיל מער ווי די חסרונות. לאמיר זיך נישט נער'ן, אין ברוקלין פעלט נישט קיין שמוציגע פלעצער, און אויב יא, איז מאנהעטן א קאצן שפרונג אוועק, און דארט איז שוין דא אלעס וואס מען קען זיך נאר נישט פארשטעלן, איז עס דאך ממילא אינטער די נאז, און אפילו אין די קאנטרי ווי עס איז אסאך ריינער, איז עס אבער אויך נישט אינגאנצן ריין, און עס איז היינטיגע צייטן - נאך אן קאסינאס - דא גענוג ווי צו זינדיגן דארט.
פון די אנדערע זייט אבער, די עיקר געטועכץ וועט זיין אין די מאנטיסעלא געגענט, דארט ווי די קאסינאס וועלן זיין, און די קאנטריס וואס זענען דארט, אויב פילן זיי אז עס איז צו נאנט, און עס האט א שלעכטע השפעה אויף זייער מקום, וועלן זיי דאס דאך קענען פארקויפן פאר גרויס געלט, אדער דעוועלאפן פאר נאך גרעסערע געלט, און מיט די געלט קויפן א שענערן און בעסערן פלאץ אביסל ווייטער, דארט ווי די השפעה פון די קאסינאס וועט נישט דערגרייכן.
אבער פאר די אנדערע אידן, סיי די וועלכע וואוינען דארט א גאנץ יאר, און סיי די וועלכע האבן נאר א חלום פון מופן דארט, וועט דאס זיין א גרויסע ישועה, עס וועט זיי פיל גרינגער מאכן דאס לעבן דארט, עס וועט אהין ברענגען אסאך ארבעט און ביזנעס, און זיי וועלן דאס קענען איינקעשן.
עד כאן הנראה לעניית דעתי. אויב אבער איינער וועט קענען קומען און מיר מסביר זיין פארוואס דאס איז דוקא גאר א געפערליכע זאך, בין איך גרייט משנה צו זיין מיין ארימען דעת, אבער דערווייל בלייבט עס ביי דעם.
(נ.ב. פון נידערן טעקסעס קענסטו פארגעסן, וכבר אמר מי שאמר: שערי תירוצים לא ננעלו...)