מעגליכע טעראר אויפרייסן טרייסלען ניו יארק און ניו דזשערסי

ניו יארק. – קאונטער-טעראריזם באאמטע האבן אויסגעדריקט ערנסטע זארג איבער א מעגליכע פרישע כוואליע פון אייסיס-אינספירירטע טעראר אטאקעס אויף דעם אמעריקאנער באדן, נאכדעם וואס נעכטן שבת האבן פאסירט צוויי אויפרייסן, און טראץ וואס ס'זענען נישטא קיין באווייזן אז די צוויי אויפרייסן זענען פארבינדן, איז אבער דא א שטארקע מעגליכקייט אז די אויפרייסן זענען דורכגעפירט געווארן דורך אייסיס סימפאטיקער.

דער ערשטער אויפרייס האט פאסירט שבת אינדערפרי אין סיעסייד, ניו דזשערסי, אין א געגנט וואו עס האט געזאלט פארקומען א מארש אין עהרע פון אמעריקאנער מארינס (ים-סאלדאטן). די באמבע, וואס איז געווען צוזאמגעשטעלט פון עטליכע קליינע פלעשל-באמבעס, האט אויפגעריסן אין א מיסט קאסטן, אבער קיינער איז נישט פארוואונדעט געווארן. די עף-בי-איי האט באשטעטיגט אז אירע אגענטן זענען פארמישט אין דער אויספארשונג, און מען גלייבט אז עס איז אונטערגעשטעלט געווארן דירעקט צו שטערן דעם מארש, הגם קיין פארדעכטיגטע זענען נאכנישט אידענטיפיצירט געווארן.

דער צווייטער אויפרייס האט פאסירט ארום 8:30 אין דער טשעלסי געגנט אין מאנהעטן, פארנט פונעם אדרעס 131 וועסט-23'סטע סטריט, ווען עס האט אויפגעריסן א באמבע באהאלטן אין א מיסט קאסטן. שטיקער גלאז פון פענסטער פון געשעפטן און אויטאס זענען געפלויגן אויף אלע זייטן, און פארוואונדעט אזויפיל ווי 29 מענטשן. דער נייער ניו יארק סיטי פאליציי קאמישאנער, דזשעימס אניעל, האט אבער באשטעטיגט אז רוב פארוואונדעטע האבן געליטן בלויז מילדע שניטן און צעקראצענישן, און בלויז איינער ווערט באהאנדלט פאר מעגליכע ערנסטערע וואונדן.

א מאסיווע לאו-ענפארסמענט רעאקציע איז געלאזט געווארן אין גאנג אלס רעזולטאט פון דעם אויפרייס אין מאנהעטן, און אויך פעדעראלע אגענטן העלפן צו עס אויסצופארשן. מעיאר ביל דעבלאזיא האט נעכטן אינמיטן דער נאכט געגעבן אן עמוירדזשענסי פרעסע קאנפערענץ ביי דער סצענע פונעם ערשטן אויפרייס, וואו ער האט באשטעטיגט אז דער אויפרייס איז טאקע געווען פון אן אונטערגעשטעלטע באמבע, נישט קיין צופעליגער אויפרייס פון א גאז ליעק א.ד.ג., אבער דעבלאזיא האט אין דער זעלבער צייט אויך געזאגט אז דערווייל זענען נישטא קיין באווייזן אז ס'איז געווען א טעראר אטאקע.

גאנץ ניו יארק סטעיט אויף הויכן אלערט

אלס רעזולטאט פונעם אויפרייס אין מאנהעטן, האבן די ניו יארק סטעיט און סיטי באאמטע ארויסגעגעבן סטעיטמענטס, די איינוואוינער זאלן זיין אויף הויכן אלערט, הגם עס זענען נישטא קיין שום ספעציפישע געפארן אדער סטראשונקעס פון ווייטערדיגע אטאקעס. לענגאויס אלע פינף באראס אין דער סיטי האבן פאליציי אונטערגענומען פארשטערקערטע וואך, און גאווערנאר קאומא האט געזאגט אז אלע סטעיט אגענטורן קאנפערירן מיט די פעדעראלע אויטאריטעטן איבער די אנטוויקלענדע סיטואציע. נעכטן אינמיטן דער נאכט האט מען אויך געהערט באריכטן אז פאליציי האט געטראפן א צווייטע באמבע, וואס מ'האט אריינגעשיקט א ספעציעלן ראבאט דאס צו צענעמען.

טראמפ און קלינטאן רעאגירן צום אויפרייס

אויך די פרעזידענטליכע פאליטיק איז אפעקטירט געווארן פונעם אויפרייס אין ניו יארק סיטי נעכטן נאכט. מען האט געהערט קריטיק קעגן דאנאלד טראמפ וואס האט צו שנעל רעאגירט... טראמפ האט אויפגעטרעטן מיט א רעדע אין קאלאראדא, געציילטע מינוט נאכ'ן אויפרייס, וואו ער האט געזאגט פאר די פארזאמלטע אז א באמבע אויפרייס האט פאסירט אין מאנהעטן – טראץ וואס קיינער האט נאך דאן נישט געוואוסט אז עס איז געווען א באמבע. קלינטאן האט אדרעסירט דעם אויפרייס אין א סטעיטמענט צו זשורנאליסטן אויף איר קאמפיין פליגער, וואו זי האט געזאגט, שוין נאך דער באשטעטיגונג פון דעבלאזיא אז ס'איז געווען א באמבע, אז זי שיקט איר סימפאטיע צו די אפעקטירטע און זי האט אראפגעריסן טראמפ פאר'ן רעאגירן בעפאר'ן וויסן די פאקטן.

דער איד

ניו יארק – א מאכטפולע באמבע וואס איז געווען באהאלטן אין א גארבעדזש קאנע האט מוצ"ש 8:30 ביינאכט אויפגעריסן אויף די 23'טע גאס, צווישן די 6'טע און 7'טע עוועניו אין מאנהעטן, אין די גאר פארנומענע טשעלסיע שאפינג געגענט אין מאנהעטן, פארוואונדענדיג מינימום 25 פארבייגייער. הונדערטער מענטשן זענען געווען אויף די גאסן ווען דער אויפרייס האט אפגעדונערט און זיי זענען זיך צולאפן אויף אלע זייטן. דער אויפרייס האט אויסגעשאסן די פענסטער פון די ארומיגע געביידעס און קארס. דער אויפרייס האט פאסירט פארענט פונעם אסאסיעטעד בליינד האוזינג פאסיליטי, ביים אדרעס: 135 וועסט 23'טע סטריט. דער ארט שטעלט צו האוזינג, טרענירונג און הילף פאר בלינדע.

די אטאקע אין ניו יארק סיטי איז געקומען קורצליך נאכדעם וואס א באמבארדירונג ביי א געיעג לויפעריי פארמעסט אין ניו דזשערסי איז דורכגעפאלן (זעע באזונדערע נייעס). הונדערטער פאליציאנטן פייערלעשער און קאנטער-טעראר באאמטע זענען אראפגעקומען צום ארט און האבן אפגעשפארט די גאנצע געגנט און האבן אונטערגענומען אן אינטענסיווע אויספארשונג. דער 23'טער גאס איז איינע פון די פארנומענסטע דורכפאר וועגן אין מאנהעטן און די אויספארשונג האט געשאפן א שווערן טראפיק. די פארוואונדעטע זענען אוועקגעפירט געווארן צו די לאקאלע שפיטעלער דורך אמבולאנסן. לויט עדות איז דער אויפרייס געווען פארטויבענד. מעיאר דעבלאזיא און די שטאטישע באאמטע האבן מוצ"ש שפעט ביינאכט אפגעהאלטן א פרעסע קאנפערענץ איבערגעבנדיג די דעטאלן איבער די אויספארשונג. שפעט ביינאכט איז געמאלדן געווארן אז די באמבע איז אראפגעשטעלט געווארן אין א קאנסטראקשאן טול-באקס.

מעיאר דעבלאזיא און די שטאטישע באאמטע האבן נעכטן שפעט ביינאכט געזאגט אז כאטש וואס עס איז קלאר אז עס איז געווען א דירעקט אונטערגעשטעלטע אויפרייס, איז נישט קלאר צי עס איז געווען א טעראר אטאקע, אדער אן אקט פון א צודרייטן פארשוין וועלכער האט זיך געוואלט אפרעכענען מיט עמיצן אדער סתם מאכן א טומל. די אינסטאנצן האבן אויך אנדעקט אז מען האט געפונען אן אנדערע באמבע עטליכע בלאקן אוועק, וואס איז באצייטענס אומשעדליך געמאכט געווארן.

קה"א

רעיס געקענסעלט צוליב באמבע אויפרייס

סיסייד הייטס, ניו דזשערסי – א באמבע האט פארגאנגענעם שבת פארמיטאג אויפגעריסן אין סיסייד הייטס, ניו דזשערסי, א שטאט ביים ים ברעג, איינס אהאלב שעה אוועק פון מאנהעטן, ווען עס האט דארטן געזאלט פארגעקומען א לויפעריי געיעג פארמעסט, וואס די געלטער דערפון האבן געדארפט גיין צו שטיצן א וואוילטעטיגע גרופע וואס ווערט אנגעפירט דורך די מארינען.

קיינער איז נישט פארוואונדעט געווארן. די באמבע איז אנגעשטעלט געווארן אויפצורייסן ווען הונדערטער לויפער האבן געזאלט דורכלויפן דעם ארט פונעם גארבעדזש קאנע וואו די באמבע איז אונטערגעשטעלט געווארן. די באמבע איז אנגעשטעלט געווארן אז עס זאל אויפרייסן אין א סעריע פון פיר באזונדערע אויפרייסן. מען האט אראפגעברענגט די פאליציי שמעק-הונט וועלכע האבן אונטערזוכט דעם ארט און האבן נישט געפונען קיין שום אנדערע באמבעס. מען האט אנגעוויזן אז דער געיעג איז פארשפעטיגט געווארן מיט א האלבע שעה ווייל מען האט געהאט שווערעקייטן ביים רעגיסטרירן מענטשן צום געיעג, וואס האט פארשלעפט די ארבעט, און אזוי זענען מענטשן אפגעראטעוועט געווארן נישט געשעדיגט צו ווערן פון די באמבע. די געשיכטע האט געברענגט גרויס זארג, ספעציעל נאך די באמבע אטאקע מוצ"ש 8:30 ביינאכט אין מאנהעטן אין וועלכע 25 מענטשן זענען פארוואונדעט געווארן. עס האט דערמאנט די געשיכטע פון די באסטאן מאראטאן באמבארדירונגען אין וועלכע דריי מענטשן זענען רח"ל אומגעקומען און 250 זענען פארוואונדעט געווארן.

קה"א

אלע טעראריסטן זענען געכאפט געווארן.
עניוואן מיט דעטאלן? (אפשר באלד וועמיר האבן צייט צו אפדעיטן, אויב קיינער וועט זיך נישט אנרופן.)

אין ווייניגער פון 48 שעה האט מען געזען פיר באזונדערע טעראר פרואוון אין ניו יארק און ניו דשערזי, וואס האט עווענטועל געפירט צו די ארעסט פון אכמעד קאהן ראחימי, דער 28 יעריגער, אפגאניסטאן געבוירנער טעראריסט, וועלכע ווערט באשולדיגט אין די אטאקעס, און די אויטאריטעטן פארשן צו ער איז פארבינדען צו א ברייטערע צעל וואס האט קאנספירירט מיט אים צו דורכפירן די אטאקעס.

פאלגנד איז א כראנאלאגישע איבערזיכט אויף די 48 דראמאטישע שעות וואס האט געהאלטן געשפאנט די ניו יארקער איינאוינער און אמעריקאנער בירגער.

שבת אינדערפרי 9:30: א היימיש געמאכטע באמבע רייסט אין א מיסט קאסטן אויף די פלאץ ווי עס האט געזאלט אין די צייט צו דורכלויפן א מאראטאן פון מארינען. די אויפרייס האט פאסירט אין די שטאט סיסייד, ניו דשערזי. עס איז נישט געווען קלאר פון די ערשטע אויספארשונג אויב עס האנדלט זיך פון א טעראר אטאקע. און קיינער איז נישט געשעדיגט געווארן אין די אינצידענט.

מוצאי שבת 8:30: א מאכטפולע אויפרייס עקספלאדירט אויף די 23סטע גאס אין מאנהעטן, אין הארץ פון די פארנומענע טשעלסי געגענט אין מאנהעטן. ביי א אינטערסעקשאן ווי עס געפונען זיך פולע רעסטוראנטן און פארוויילונגס ערטער. די באמבע האט איבערגעלאזט 29 מענטשן לייכט פארוואונדעט און אנגעמאכט שאדן פאר די געביידעס ארום. דער מעיאר די-בלאזיא קומט אן צום ארט און דערקלערט אז "עס איז א אויסגערעכנטע אקט אבער נישט קלאר אויב פארבינדען מיט טעראר"

עטליכע שעה שפעטער: פאליציי אנדעקט נאך א באמבע עטליכע גאסן אפגעריקט פון דעם אויפרייס, מען האט עס באוויזן צו אומשעדליך מאכן. און עס שטעלט זיך ארויס אז עס איז געמאכט מיט די זעלבע מעכינאציע ווי דאס וואס איז גענוצט געווארן אין די באסטאן אויפרייס מיט דריי יאר צוריק. ביי דעם פונקט טוישט זיך שוין די שפראך, און דער גאווערנער ענדרו קאומא זאגט אז "עס האנדלט זיך קלאר פון טעראר" אבער לייגט צו אז עס איז נישט קלאר אויב עס איז פארבינדען צו איסלאמישע טעראר.

וויבאלד מען האט געכאפט די באמבע פאר'ן אויפרייסן האט די פאליציי געקענט אנאליזירן די באמבע, און האבן געפונען פינגער אפדרוקן אויף די סעלפאון וואס איז געווען באהאפטן צום באמבע עס צו אקטיוויזירן פון דערווייטנס. די פינגער אפדרוקן ווערן פארגליכן מיט די מענטשן וואס ווערן געזען אין די זיכערהייטס קאמערעס, דאס וועט עווענטועל פירן צו כאפן דעם טעראריסט.

די פלעצער אין טשעלסי ווי די באמבעס זענען איינגעפלאנצט געווארן

זונטאג נאכט 8:45: א פאסאנזשיר אין א באן סטאנציע אין עליזאבעט, ניו דשערזי, אלאמירט די פאליציי איבער א פארדעכטיגטע פעקל פון וואס עס שטעקט ארויס דראנטן. פאליציי אנדעקט א מאכטפולע באמבע צוזאמענגעשטעלט פון 5 אפאראטן. פאליציי האט באוויזן צו אומשעדליך מאכן די באמבע, און נאך עטליכע שעה טוען די באנען ווייטער פארן.

זונטאג 1:00 ביינאכט: די עף בי איי טוט אנדייטען אז זיי זענען דערגאנגען אויף די אינדענטיטעט פון דער וואס האט אונטערגלייגט די באמבע אין טשעלסי. און זאגן אז דער זעלבער פארשוין איז געזען געווארן אין די ביידע פלעצער אין טשעלסי ווי עס זענען געווען די באמבעס. א אויטא ווערט אפגעשטעלט אויף די ווערעזאנא בריק און 5 מענטשן ווערן גענומען אונטער ארעסט, און ווערן אויסגעפארשט דורך די עף. בי. איי. עס שטעלט זיך ארויס אז זיי זענען פאמיליע מיטגלידער פון ראחימי.

מאנטאג פארטאגס: נאכ'ן אנאליזירן ווידיאו פון די אלע פלעצער טוט די עף. בי. איי. באשטעטיגן אז די הויפט פארדעכטיגטער אין די אטאקעס איז אכמעד קאהן ראחימי, א איינוואוינער אין אליזאבעט, ניו דשערזי. 28 יאר אלט, געבוירן אין אפגאנסיטאן, און איינגעגלידערט אין אמעריקע. פאליציי שיקט ארויס א פלעש סעלפאון מעסעדש צו אלע איינוואוינער פון ניו יארק צו בעטן הילף אין כאפן דעם פארברעכער, און צייכענען אן אז ער קען זיין שעדליך און באוואפנט און ווען מען זעהט אים זאל מען באלד רופן די עף. בי. איי.

מאנטאג אינדערפרי: אויטאריטעטן טוישן דעם טאן און רופן דאס אפיציעל אן א טעראר אטאקע, גאווערנער קאומא זאגט אויף סי.ען.ען. אז ווארשיינליך איז עס פארבינדען צו אינטערנאציאנאלע טעראר. פרעזידענט אבאמא פליהט אריין קיין ניו יארק פון וואשינגטאן און גרייט זיך צו אדרעסירן די אינצידענט ווי א ערנסטע נאציאנאלע געשעעניש.

פאליציי קאמיסאר דשעימס אניאל זאגט פאר די פרעסע אז 36,000 פאליציי אפיצירן זענען אצינד אויף די מיסיע פון טרעפן דעם טעראריסט, אינאיינעם מיט הונדערטער פעדעראלע אגענטן. א פרעצדענטלאזע זוכעריי אקציע באגלייט מיט זארג וואס דעם טעראריסט קומענדיגע ציהל קען זיין, און איבער וואס ער קען טוען ווען ער שפירט זיך באדראעט.

אזוי אויך זאגט דער פאליציי קאמיסאר אז אין די לעצטע טאג האט די פאליציי רעאגירט צו צענליגע רופן איבער פארדעכטיגטע פעקלעך, וואס האבן זיך ארויסגעשטעלט צו זיין אומשעדליך. אריינגערעכנט איין אינצידענט אין הארץ פון בארא פארק ווען איינאוינער האבן גערופן פאליציי נאכדעם וואס דורכגייער האט אריינגעווארפן א גרעסערע פעקל אין מיסט-קאסטן.

מאנטאג 11:30: פאליציי באקומט אינפארמאציע פון א קאפע הויז אייגענטומער אין לינדאן ניו דשערזי איבער א פארשוין וואס שלאפט אינעם קארידאר פון זיין געשעפט, ווען די פאליציי זענען אנגעקומען, האט ער ארויסגעצויגן א רעוואלווער, א דראמאטישע סצענע האט אויסגעבראכן אויף די גאס, רעגן-דורכגענעצטע אפיצירן האבן אנגעפילט די גאסן ארום, און א העפטיגע פייער אויסטויש האט אויסגעבראכן צווישן דעם טעראריסט און די פאליציי און וועלכע צוויי פאליציי אפיצירן זענען פארוואונדעט געווארן. דער טעראריסט איז דערשאסן געווארן און אפגעפירט געווארן אין שפיטאל פאר באהאנדלונגען.

אצינד פארשן די אויטאריטעטן אויב ראחימי איז פארבינדען מיט נאך טעראריסטן. דערווייל איז אומקלאר אויב ער האט סיי וועלכע פארבינדונגען מיט אויסלענדישע טעראר גרופעס, און די שאצונג איז אז ער איז געווען א "לאון וואלף" טעראריסט וועלכער האט געארבעט אויף די אייגענע האנט, אבער איז מעגליך ראידקאליזירט און מאטיווירט געווארן דורך אויסלענדישע טעראר גרופעס.

לויט די שכנים פון ראחימי אין ניו דשערזי האנדלט זיך פון א געווענליכע אמעריקאנער יונגטליכער. גארנישט אין זיין אויפפירונג האט אנגעדייטעט אז ער קען זיין שעדליך. ער האט געארבעט אין זיין פאטער'ס רעסטוראנט, און איז געווען זייער פריינטליך צו די קאסטומער'ס, און פילע פון זיינע פריינט אין עליזאבעט האבן אויסגעדריקט זייער שאק אז זייער פריינט איז א טעראריסט.

מאנטאג 2:00: מעיאר די בלאזיא דערקלערט אז דאס איז געווען א טעראר אטאקע און ווארשיינליך פארבינדען צו אויסלענדישע טעראר גרופעס. פרישע אינפארמאציע צייגט אז דער טעראריסט איז געפארן אין די לעצטע יארן עטליכע מאל צו זיין היימלאנד אפגאניסטאן ווי ער איז מעגליך ראדיקאליזירט געווארן.

JP

קלינטאן און טראמפ פארקערטע רעאקציעס צו די אטאקעס

"איך בין די איינציגע קאנדידאט וואס האט ערפארונג אין באקעמפן טעראריזם, און איך האב א קלארע פלאן צו באקעמפן טעראריזם" האט הילערי קלינטאן דערקלערט היינט אינערפרי אין ניו יארק, אין איר רעדע אין ליכט פון די לעצטע טעראר אטאקעס וואס האבן פאסירט אין ניו יארק, ניו דשערזי און מינאסאטע. אין די זעלבע צייט האט זי גאר שטארק אראפגעריסן די צוגאנג פון טראמפ וועלכער האט באלד ווען עס איז אריינגעקומען די נייעס איבער א אויפרייס אויסגענוצט די געלעגנהייט צו דערקלערן אז עס איז טעראריזם פאר ער האט געוויסט די קלארע פאקטן. "אזוי ווי אלעס וואס ער זאגט, זיין דעמאגאגיע איז נישט באזירט אויף פאקטן, נאר אויף די אולטעמאטיווע ציל פון מאכן א פונקט"

קלינטאן זוכט מיט דעם צו זיך אוועקשטעלן ווי די קאנטראסט פון טראמפ, און זיך פרעזענטירן אלס די קאנדידאט וואס איז רואיג און ערפארן און קען זיך פארמעסטן מיט די טעראר געפאר. און פון די אנדערע זייט טראמפ אלס איבערגעהיצט און אומערפארן, און איינער וואס נוצט אויס אזעלכע אינצידענטן פאר פאליטישע אינטערעסן. זי האט טאקע רעאגירט הערשט נאכדעם וואס די-בלאזיא האט באשטעטיגט אז עס האנדלט זיך פון א באמבע, אין די צייט וואס טראמפ האט אינסטינקטיוו רעאגירט אז האנדלט זיך פון א באמבע.

טעראריסט פון ניו יארק-ניו דזשערסי באמבעס ארעסטירט; אידענטיפיצירט אלס אכמעד קאהאן ראכאמי

ניו דזשערסי – א דורכברוך האט נעכטן פאסירט אין דער אויספארשונג ארום דעם באמבע אויפרייס פון שבת אינדערפרי אין סיעסייד, ניו דזשערסי און מוצאי שבת אין טשעלסי, מאנהעטן – ווען פאליציי אין לינדען, ניו דזשערסי האבן אינדערפרי ארעסטירט דעם געזוכטן טעראריסט, וועלכער איז בלויז געציילטע שעה פריער אידענטיפיצירט געווארן דורך ניו יארק סיטי באאמטע אלס אכמעד קאהאן ראכאמי. ער איז ארעסטירט געווארן דורך א צופאל, ווען א געשעפט אייגענטומער האט אים געטראפן שלאפן אין א קארידאר פון זיין געשעפט.

דער געשעפט אייגנטימער האט נישט דערקענט אז דאס איז דער געזוכטער טעראריסט, טראץ וואס זיין נאמען און בילד זענען פארשפרייט געווארן מאנטאג אינדערפרי דורך די עף-בי-איי. ער האט אבער אלארמירט די פאליציי אז עמיצער שלאפט אין זיין געשעפט, און ווי נאר די פאליציי זענען אהין אנגעקומען, האבן זיי באלד באמערקט אז דאס איז דער געזוכטער טעראריסט. ווען זיי האבן אים געוואלט ארעסטירן, האט ער ארויסגענומען א רעוואלווער און אנגעהויבן שיסן אויף די אפיצירן, פון וועלכע 2 זענען פארוואונדעט געווארן. ראכאמי איז אויך פארוואונדעט געווארן אינעם שיסעריי-אויסטויש מיט די אפיצירן, אבער ער איז ארעסטירט געווארן לעבעדיגערהייט.

מעיאר דעבלאזיא, פאליציי קאמישאנער אניעל און פעדעראלע באאמטע האבן נעכטן נאכמיטאג אפיציעל געמאלדן דעם סוקסעספולן ארעסט, זאגנדיג אז פון אלע באווייזן שטעלט זיך ארויס אז ראכאמי איז דער וואס האט אונטערגעשטעלט ביידע באמבעס אין טשעלסי – איינס וואס האט עקספלאדירט און פארוואונדעט 29 און די צווייטע וואס מ'האט געכאפט באצייטנס – און אויך די באמבע וואס האט אויפגעריסן אין סיסייד. ראכאמי איז אפיציעל אנגעקלאגט געווארן דורך סטעיט פראקורארן אין ניו דזשערסי פאר'ן שיסן אויף די אפיצירן, און עס דערווארט אים א הויפן פעדעראלע טעראר קלאגעס.

ווער איז דער טעראריסט אכמעד קאהאן ראכאמי?

ראכאמי, אן אפגאנער געבוירענער, איז אין די 990'ער יארן געקומען מיט זיין פאמיליע פון אפגאניסטאן קיין אמעריקע, זוכנדיג צו באקומען אזיל רעכט, און זיי האבן זיך באזעצט אין עליזאבעט, ניו דזשערסי. ראכאמי איז קיינמאל נישט ארויפגעקומען אויפן ראדאר פון אמעריקאנער קאנטער-טעראריזם באאמטע, אויסער 2 אינצידענטן מיט לאקאלע לאו-אינפארסמענט, איינס ווען זיין פאמיליע האט געקלאגט די לאקאלע עליזאבעט רעגירונג באאמטע איבער דיסקרימינאציע קעגן א רעסטוראנט וואס זיי האבן געפירט, און די צווייטע ווען ראכאמי איז אויסגעשטאנען קלאגעס אז ער האט עמיצן צעשלאגן, וואס די קלאגעס זענען ארויסגעווארפן געווארן. אין די לעצטע צען יאר האט ראכאמי זיך גענומען אפט פארן קיין אפגאניסטאן און פאקיסטאן, און ווי עס דערציילט פליע דזשאונס, ראכאמי'ס א פריינט, האט ראכאמי אנגעהויבן, ביים צוריקקערן זיך פון א רייזע אין אפגאניסטאן צוויי יאר צוריק, ווערן עקסטרעם-רעליגיעז, און עס איז מעגליך אז ער איז אזוי ראדיקאליזירט געווארן ביז צום באשליסן דורכצופירן די אטאקע.

וויאזוי איז מען דערגאנגען אויף ראכאמי'ס שפורן?

דער ענטפער אויף די פראגע איז נאכנישט הונדערט פראצענט קלאר, אבער פון דער אינפארמאציע וואס איז פארעפנטליכט געווארן שטעלט זיך ארויס דאס פאלגענדע בילד: ווען מ'האט אוועקגעפירט די אומאויפגעריסענע באמבע פון טשעלסי מוצאי שבת, האט מען זיך באלד גענומען ארבעטן אויף די שטיקלעך וואס זענען געלעגן אין דער באמבע. צווישן די שטיקער איז געליגן א סעלפאון, פון וועלכן פעדעראלע אגענטן האבן באוויזן צו דערשנאפן אינפארמאציע און צוזאמגעשטעלט אז עס האט באלאנגט פאר ראכאמי, אדער עמיצער נאענט מיט אים. זונטאג נאכמיטאג האבן שוין פעדעראלע אגענטן געהאט אן אויג אויף פריינט און נאענטע פון ראכאמי, וועלכע וואוינען אלע אין עליזאבעט, ניו דזשערסי. ווען די אגענטן, וועלכע האבן נאכגעפאלגט ראכאמי'ס פארבינדעטע און פריינט, האבן געזען א קאר אנגעפילט מיט מענטשן איבערלאזן א היים אין עליזאבעט, האבן זיי נאכגעפאלגט דעם קאר, און עס שפעטער אפגעשטעלט אויף דער ווערעזאנא בריק און ארעסטירט אלע 5 פאר אויספארשונגען. ווי עס שיינט, האבן די פינף געגעבן אינפארמאציע וואס האט פעסטגעשטעלט ביי די אויטאריטעטן אז ראכאמי איז דער וועמען זיי דארפן כאפן. מאנטאג אינדערפרי איז ארויס אן עמוירדזשענסי טעקסט מעסעדזש מיט ראכאמי'ס נאמען און בילד, און וואונדערליך אז ער איז ארעסטירט געווארן בלויב צוליב וואס ער איז נישט געווען גענוג פארזיכטיג זיך צו באהאלטן, נאר ער איז איינגעשלאפן אין א פובליק ארט, ביי עמיצן אין געשעפט, וואס אזוי האט מען אים ארעסטירט.

זענען דא אנדערע געזוכטע אין פארבינדונג מיט די באמבעס?

די פעדעראלע באאמטע האבן נעכטן געזאגט אז דערווייל זוכן זיי נישט קיינעם אין פארבינדונג מיט די באמבעס, ווייל זיי גלייבן אז ראכאמי האט געארבעט אויף די אייגענע האנט, מיט די מעגליכע הילף פון עטליכע פאמיליע מיטגלידער די באאמטע האבן אויך געלייקנט באריכטן אז זיי האבן אויפגעדעקט אן אקטיוון אייסיס טעראר צעל, זאגנדיג אז דא רעדט זיך פון אן איינצלנער טעראריסט. באזונדער האבן זיי אדרעסירט דאס וואס מ'האט געזען אויף 'סורוועילענס' צוויי פארשוינען שטיין נעבן דער אומאויפגעריסענער באמבע אין טשעלסי, זאגנדיג אז די צוויי זענען בלויז געווען גנבים וואס האבן געמיינט אז עפעס ווערדפול ליגט אינעם זאק, און ווען זיי האבן געזען אז ס'איז א פרעשור-קוקער, האבן זיי גענומען בלויז דעם זאק און איבערגעלאזט דעם פרעשור-קוקער. עס איז דערווייל אויך נישטא קיין אינפארמאציע צי ראכאמי האט געהאט פארבינדונגען מיט דער אינטערנאציאנאלער אייסיס גרופע.

ד"א

דריי באמבארדירונג אטאקעס צוגעבונדן צום ארעסטירטן טעראריסט אכמעד קהאן ראכאמי

ניו יארק. – די ניו דזשערסי פאליציאנטן האבן מאנטאג פארמיטאג, נאך א קורצע אויסשיסעריי, ארעסטירט דעם טעראריסט, אכמעד קהאן ראכאמי, וועלכער איז באשולדיגט געווארן אין שטיין אונטער די דריי באמבארדירונג אטאקעס אין ניו יארק אין אין ניו דזשערסי. דאס מיינט, די פייפ באמבעס וואס זענען 9:30 צופרי געפונען געווארן ביים מארין געלויפעריי פארמעסט אין סיסייד פארק, ניו דזשערסי. די מאכטפולע באמבע וואס האט אויפגעריסן מוצ"ש 8:30 ביינאכט אין די טשעלסיע געגענט אין מאנהעטן, און די פינף באמבעס וואס מען האט מאנטאג ביינאכט געפונען ביים עליזאבעט באן סטאנציע אין עליזאבעט, ניו דזשערסי.

מיר וועלן אנהויבן מיט די געשיכטע פון אנהויב, פון מוצ"ש. עס איז געווען 8:37 ביינאכט, ווען א מאכטפולע באמבע, וואס איז געווען אריינגעשטעלט אין א פרעשור קוקער, אינערהאלב א פירקאנטיגן שטאלענעם טול-באקס, אויף 135 וועסט 23'רד סטריט אין מאנהעטן, האט אויפגעריסן מיט א שרעקליכן קראפט, עס האט פאראורזאכט שווערע שאדנס ארום און האט פארוואונדעט 29 מענטשן.

די פאליציי האט גלייך אנגעהויבן א מאסיווע בלאק ביי בלאק זוך אקציע און האבן פיר בלאקן ארויפציהר געפונען א פרעשור-קוקער פארלאזט אויפ'ן סיידוואק. עס האט זיך ארויסגעשטעלט אז דער טעראריסט האט אראפגעשטעלט די באמבע אין א רענצל, אבער פלוצים זענען דארטן פארבייגעגאנגען שמאטעס האנדלער, זיי האבן באמערקט דעם ווערטפולן רענצל ליגן אויפ'ן סיידוואק, און האבן עס אויפגעהויבן, זיי האבן ארויסגעשליידערט די באמבע דערפון, נישט וויסנדיג וואס זיי טוען, און האבן גענומען דעם רענצל פאר זיך. מען שפאקולירט אז דורכ'ן שליידערונג איז די באמבע געשעדיגט געווארן. מען האט באוויזן אויפצוכאפן א קלארן בילד פונעם טעראריסט וואו ער שפרייזט מיט'ן רענצל אויף יענעם בלאק. ביידע מאנהעטן באמבעס זענען געווען פרעשור-קוקער באמבעס, די זעלבע וואס מען האט גענוצט ביים באסטאן מאראטאן באמבארדירונג.

די בילדער און אינפארמאציע וואס מען האט ארויסבאקומען פון די סעלפאונס וואס זענען געווען צוגעטשעפעט צו די פרעשור-קוקער באמבעס, אינאיינעם מיט בילדער פון זיכערהייט קאמעראס אין מאנהעטן, האבן געברענגט אז די פאליציי האט נאך מוצ"ש שפעט ביינאכט אידענטיפיצירט דעם טעראריסט אלס אכמעד קהאן ראכאמי, אן איינוואוינער פון עליזאבעט, ניו דזשערסי. זונטאג פארטאגס האבן די ניו יארק סיטי פאליציאנט אפגעשטעלט אן אויטא אויפ'ן בעלט פארקוועי נעבן דעם ווארעזאנא בריק, און האבן ארעסטירט פינף פאמיליע מיטגלידער פונעם טעראריסט.

די קומענדיגע פאסירונג איז געווען מאנטאג 8:00 ביינאכט, ווען צוויי שמאטעס קלויבער, האט גענישטערט אין די גארבעדזש קאנעס ביים עליזאבעט טרעין סטעישאן, און האבן געפונען א רענצל. זיי האבן עס שנעל ארויסגעשלעפט מיינענדיג אז זיי האבן געכאפט א מציאה, זיי האבן געשפרייזט 500 פוס דערמיט און דאן עס געעפענט. זיי האבן דערינען געפונען פינף באמבעס. אלעס מיט ווייערס און מיט סעלפאונס געמאכט זיי אויפצורייסן. די צוויי האבן זיך דערשראקן, און האבן אראפגעווארפן דעם רענצל מיט די באמבעס און האבן גערופן די פאליציי.

די ניו דזשערסי סטעיט פאליציי און די עף. בי. איי. זענען אראפגעקומען צום ארט און האבן זיך גענומען ארבעטן אויף די באמבעס. ביים נוצן א ראבאט צו אנטוואפענען איינע פון די באמבעס, 12:40 פארטאגס, האט עס אויפגעריסן, שעדיגנדיג דעם ראבאט, דאס האט געברענגט די פאליציי אפצושפארן דעם גאנצן ארט, און צו פארטרייבן די צוקוקער. די איבריגע באמבעס זענען יא אומשעדליך געמאכט געווארן אן אינצידענטן. עס איז נישט קלאר געווען צי די באן סטאנציע איז געווען א ציל פונעם באמבארדירער אדער ער האט פשוט געזוכט אוועקצואווארפן די באמבעס.

ווער איז אכמעד קהאן ראכאמי?

אכמעד קהאן ראכאמי איז אן אפשטאמיגער פון אפגאניסטאן. זיין פאמיליע האט א רעסטאוראנט אין עליזאבעט, ניו דזשערסי. ער האט זיך פארטשעפעט מיט די אינסטאנצן ווען די עליזאבעט רעגירונג האט פארבאטן דעם רעסטאוראנט פון אפערירן 24 שעה א טאג צוליב די טענות פון די שכנים, וואס ראכאמי האט גע'טענה'ט אז זיי רודפ'ן די פאמיליע צוליב שנאה קעגן מוסולמענער. ער איז אויך אין 11' ארעסטירט געווארן פאר'ן שטעכן עמיצן מיט א מעסער. ער איז א שטיק צייט צוריק געווארן שטארק רעליגיעז. ער האט אויך א האלב יאר צייט פארברענט אין אפגאניסטאן.

שוין זונטאג פארטאגס, נאכ'ן אפשטעלן די קאר מיט די ראכאמי פאמיליע מיטגלידער, איז די פאליציי אנגעפאלן אויף ראכאמי'ס הויז אין עליזאבעט, ניו דזשערסי.

מאנטאג 7:30 צופרי, האט די ניו יארק סיטי פאליציי דעפארטמענט ארויסגעלייגט א וואנטעד פאוסטער מיט די אינפארמאציע איבער ראכאמי. 19 מינוט שפעטער האט מען צום ערשטן מאל גענוצט דעם ווייערלעס עמוירדזשענסי אלערט סיסטעם פון די "פימא" אגענטור, צו שיקן א דרינגענדן טעקסט מעסעדזש צו אלע סעלפאונס אין ניו יארק סיטי, איבער דעם זוך נאך ראכאמי.

מאנטאג 10:56 צופרי, האט אן אייגענטומער פון א שענק-הויז, אין לינדען, ניו דזשערסי, באמערקט עמיצן שלאפן אויף א בענקל קעגנאיבער זיין סטאר, און האט אים דערקענט אלס דער געזוכטער ראכאמי. ער האט גלייך גערופן די פאליציי. א פאליציאנט איז אנגעקומען, ער האט אויפגעוועקט ראכאמי און אים געהייסן הייבן די הענט, ראכאמי האט ארויסגעשלעפט א ביקס און האט געשאסן דעם פאליציאנט, וועלכער איז נישט פארוואונדעט געווארן צוליב זיין קוילן-שוץ וועסטל. דער פאליציאנט האט צוריקגעשאסן, ראכאמי האט זיך גענומען לויפן אויף די גאסן, די פאליציאנטן זענען אים נאכגעלאפן, אונטערוועגנס האט ראכאמי געשאסן אויף א פאליציאנט וועלכער איז געזעצן אין א פאליציי קאר, יענער איז לייכט פארוואונדעט געווארן. עווענטועל איז ראכאמי אראפגעפאלן פון די קוילן וואונדן וואס ער האט געליטן אין אקסל און אין פוס און ער איז ארעסטירט געווארן.

קה"א