די אנטלויף אקציע פון לב טהור'ס נעגל - וועקער 17

איך האב אפגעהאלטן אן אינטערוויו מיט ישראל מאיר נ"י, א ענערגישער העלד וועלכער האט מיט אסאך אנשטרענגונג, איבערגעהיפט די אייזערנע ווענט פון דעם גרויזאמען קולט און געפינט זיך יעצט אויף די פרייע וועלט.

אינטערסאנט און מערקבאר איז געווען אז א חלק פון זיין רעטונג אקציע, וועלכער האט זיך אנגעהויבן ביי אים אין קאפ, איז געווען ווען ער האט זיך באגעגנט מיט 'קאווע שטיבל' און ער איז נאך אלס דא א שטענדיגער ליינער.

ער האט מיר דערציילט די דעטאלירטע געשיכטע, און איך האב עס ברייט באשריבן אינעם נארוואס ערשינענעם 'וועקער'.

פאר סיי וועלכע קושיות אדער דיסקוסיעס איבערן ארטיקל קענט איר דא פרעגן.

איז ער שלמה מוליכו? אדער האט ער כאטש באשטעטיגט ווער דאס איז?

גאר א הערליכער ארטיקל פון ידידי ר' מאך זיכער. געשריבן דראמאטיש און שפאנענד. עס איז מיר אויך געווען אינטערעסאנט דער חידוש וועגן קאווע שטיבל. בשעתו זענען געווען ענדלאזע דיסקוסיעס אויב די אקאונטס זענען אמת'דיג אדער פאלש. יעצט בלייבט נאר איבער צו וויסן וועלכע דערפון איז געווען די אמת'דיגע אפיציעלע ווארטזאגער פון לב טהור, אדער מעגליך אלע? דאס בלייבט פאר קאווע שטיבל היסטאריקעק צו דערשנאפן.

איך האב זיך נאר געוואונדערט צומאל וואס דער שרייבער לייגט עס אראפ ממש ווי א שרעקליכע קולט מיט א פירער וכו', איך זע נישט מיט וואס דאס איז צופיל אנדערש ווי יעדע עקסטרעמע חסידות וואס וואשט דעם מח און האלט דעם עולם משועבד אונטער זייער קאנטראל. לפי די מעשה האט אים הלבראנץ געזאגט איך גיב דיר א טיקעט און גיי וואו דו ווילסט, דהיינו אז מען האט אים געלאזט גיין נאר פסיכאלאגיש מאניפולירט נישט צו קענען גיין, וואס איז בעצם וואס שפילט זיך אפ מעשים בכל יום אין אסאך היימישע קהילות. שוין, דאס איז אויך א אלטע דיסקוסיע, איך האב נאר ארויסגעברענגט מיין מיינונג לכבוד דעם ארטיקל פון ידידי הרב.

ווי ערווענט אינעם ארטיקל איז ער נישט זיכער איבער סיי וועלכע ניק וואס איז באמת אינעם קולט, אבער איך האב געמאכט מיין אייגענע ריסיורטש און געוואויר געווארן אז [פארמעקט] איז יואל העלבראנץ, שלמה'ס יונגסטער זון.

די חילוק פון לב טהור צו יעדע חסידישע קהיליה זענען ווי פאלגענד.

1) די עצם געדאנק אז יעדער איז בטל צום רבי'ן הן בעניני רוחניות והן בגשמיות דאס הייסט אז זייערע פארמעגנס זענען אויך משועבד צום רבי'ן און אז זייערע שידוכים און אינטימישע באציואונגען ווערן מאניפולירט.

2) די פסיכאלאגישע דרוק וואס מען לייגט ארויף אז אויב וועסטו אוועקגיין וועט דיר קיינער נישט אננעמען (וואס באשטייט אגב אין די היימישע פלעצער אויך אבער מיט אכציג פראצענט ווינציגער).

3) דער רבי איז דער אויסשליסליכער ווארטזאגער און קיינער טאר נישט זיך וואגן אריינזאגן אפילו נישט די טובי הקהל.

4) די פילן וואס מען גיבט טאמער איינער מאכט פראבלעמען.

5) די אראנזשירטע גיטין בלויז ווייל דער רבי וויל צייגן ווער עס איז בעה"ב.

עס זענען נאך פארהאן פיל דקות'דיגע חילוקים אבער אויבנאויף אין קורצן קען מען זאגן אז די מיינד קאנטראול וואס קומט פאר ביי חסידים און רבי'ס איז ארום זיבעציג פראצענט שוואכער ווי אין לב טהור.

איך האב געזען אינעם ארטיקל עטליכע סתירות
פון ווי האט ער בכלל געהאט געלט ביי זיך, צו קויפן לכתחילה א טעלעפאן, און זען און מיטהאלטן קאווע שטיבל, און זיך קויפן א פייפער, און נאך זאכן
אויב ס'איז אזוי עקסטרעם, האבן זיי צוטריט צו סאשל מידיע?
עפעס האט מיר נישט געקלעבט די געשיכטע בשלימות, קען זיין מ'האט אויסגעשניטן שטיקלעך פונם אונטרוויו, אבער עפעס פעלט צווישן די שורות פונעם גאנצן געשיכטע

למשל וואס פעלט? אפשר די אינפארמאציע אז מען קען האלטן געלט ביי זיך? א קלארינעט האט ער מיטגעברענגט פון ארץ ישראל.

פארגעס נישט אז ער איז למעשה געקומען פון א נארמאלע שטוב און ער האטנישט געהאט קיין מחסור אין אינפארמאציע וויאזוי און וואס צו טון.

די קאפ פון א פארמאכטע קולטיסט לויפט אנדערש ווי א בני יואל'ער נעם דאס אין אכט, די רגע וואס ער האט אויפגעהערט גלייבן אמינעם פירער זענען אלע טויערן פאר אים אפן, ער האט נישט די גילט וואס א חסיד האט ווען ער לאזט אפ רעליגיע.

איך דארף איבערליינען שנעל די ארטיקל כדי צו פין פוינטן וואס ס'האט געפעהלט, אבער אויבנאויף פרעג איך קודם אזוי.

אין מיין פאנטאזיע איז דאס קינד אריבער א לענגערע וועג ביז אהין צום גרופע, דאס טייטש ער איז געווען א קליין קינד, און לויט די טויש נאכאנאנדער וואס די טאטע האט געמאכט, איז דאס נישט געשען אין איין וואך צו חודש, איז לאמיר מאכן א חשבון, א קליין קינד קומט צום גרופע שוין נאכדעם וואס ביי זיי איז שורה א איבערגעטריבענע רוח פון פרומקייט, און ווען ער קומט אן צום גרופע - אין מיין פאנטאזיע - האט ער נישט רוב זאכן וואס א געהעריגע משפחה און ספעציעל קינדער האבן ביי אונז.
נישט שפילצייג נישט געלט, נישט מאגעזינען און אדווערטייזינג וואס צייגט וועלכע שפילצייג און וועלכע השגות ס'דא אויפ'ן וועלט, און דאס איז אין לויף פון זיכער צען יאר. וועסט מיר זאגן זיי האבן אינטערנעט? די בלאט די יוד די צייטונג? איך זע א גרופע אין א מדבר, וואס אויב האבן זיי יא עפעס ווערט עס קאנפיסקירט דורך די פירער. אזוי פארשטיי איך
אין די פאהר יאר פון וואו האט ער וואס ער האט ביים אנטלויפן, אויב פשוטע שיך און זייף האט ער נישט צו די האנט..
טו מיר א טובה און זיי פותר די נאוועל

בשעת זיי זענען אריבער פון קאנאדע קיין גואטאמאללא האבן אנגעהויבן נעסטיגן פראבלעמאטישע מחשבות אין די הערצער פון געוויסע אינעם קולט, אויך וועם די וואס האבן נישט געוואלט זיין אונטער נחמן'ס פירערשאפט האבן אויפגעקלערט דעם ציבור און אזוי אויך די קהליה פון גרים און גואטאמאללא האט זיי געגעבן השגות פון די סעקולארע וועלט, יעצט א רעוואלוציאנער ווי ישראל מאיר האט נישט געברויכט צופיל צו וויסן וואס ער מוז טון צו זיך באפרייען.

איך וואלט דיר געראטן צו כאפן א שמועס מיט איינער וואס קומט פון דארט אדער כאטש קוקן די דאקומענטאר פון אמנון לוי אויפן קולט צו בעסער פארשטיין די מצב.

איך האב עס יעצט איבערגעליינט, און כ'וויל פארשטיין עטליכע זאכן, און בכלל פארוואס ס'איז צענזורירט גאנצע חלקים דא. ס'קלאר אז ס'פעלט אינפארמאציע.

לאמיר אנהייבן על הסדר

1] ער האט פון ערגעץ באקומען א קונטרס פון חב''ד, ממילא אז ס'פונקט אנגעקומען, וואס מאכט אויך נישט קיין סענס, ווייל ווי דו שרייבסט איז דארט נישט דא קיין גמרות און נאר הלבראנצס ספרים אבער שפעטער האט ער אדורכגעלערנט אסאך ספרי חב''ד, ווי זענען זיי ארויסגעוואקסן דארט לטובתו?

2] וואס הייסט נחמן הלבראנץ האט באגעוואלדיגט מיידלעך און זיי נאכדעם חתונה געמאכט, עפעס וואס הערט זיך ווי א פעט שטיקל לשון הרע [און גאנץ מעגליך שקר] ווייל ס'נישטא קיין ראיות און עדות אויף א זאך וואס איז נעלם מעיני כל חי, און ס'דא צופיל טאטעס דארט וואס זאלן עס האבן צוגעלאזט. און ס'ווערט נישט דערמאנט קיין ווארט פון ראזנער באטשי וואס ווי באקאנט איז 'ער' דער מכה בפטיש, און ער לאזט נישט יענעם עסן פון זיין טעלער.. ווי באקאנט.

3] ווי איז דאס דער 'חרם פלאץ' וואס הערט זיך ווי א שדים טרוים, עפעס א אפגעזונטערטע פלאץ ווי מ'האט נישט קיין שייכות מיט די קולטיסטן, און מ'איז אפגעזונדערט? אדער איז מען פריי? אפען צו אנטלויפן, אדער אנבינדן קשר מיט פרעמדע? כל הכתוב אומר דרשינו.

4] וויפיל צייט איז געווען פון ווען ער איז אנגעקומען צו ווערן פארשיקט אין 'חרם פעלד' ביז ער האט 'עפעס' פארשאפט א סמארטפאון.. און עפעס פונקט פונקט פונקט, געוואוסט פון גוגל און פון פייסבוק און פון לינקס וואס פירן צו קאווע שטיבל, ביז'ן קאנטאקטן זיין מומע אורית. די גאנצע זאך איז פעלערהאפטיג, ס'הערט זיך ווי מ'מישט שנעל אריבער בלעטער; עטליכע יאר שפעטער.. און ער איז א טאטע פון קינדער... ס'איז צו צויבערדיג און צופיל פונקטס און צו שנעל און הצלחה'דיג.

5] ער איז מגלה אז יואלי העלבראנץ איז פון די שרייבער אין קאווע שטיבל.. חא חא חא.. אויב אונז דא אין קאווע שטיבל ברעכן זיך שוין קאפ עטליכע יאר, צו דערגיין מי ומי ההולכים, וועט 'ער' וויסן ווער ס'שרייבט וואס? ער האט דאך נישט געוואלט מגלה זיין בכלל אז ער האט א סמארטפאון שמא יהרג, און ער ווייסט אלעס? וויאזוי???

6] ער דינגט א האטעל אין אנדערע עק שטאט. ווען וואס??? וויאזוי ווערט ער נעלם אז זיי ווייסן נישט ווי? זיי האבן דאך קאנטראל אויף עהם, זיי האבן עהם אוועקגעלאזט אנע וויסן ווי ער ווערט נעלם? און דינגן א מאטעל נעמט צייט, ביז ער האט געקענט דארט איבערשלאפן און עסן פאטעטא טשיפ וואס זיי מומע האט כלומרש'ט געטראפן אין זיין שטוב דארט.

7] טאקע דאס אליינס, אז זיי מומע זאל אריינגיין אין זיין שטוב אן רשות און טרעפן דארט פאטעטא טשיפס בעגס, איז נישט פשוט, כאילו איך וואק אריין אין מיין חבר'ס דארמעטארי שטוב?

8] שפעטער גייט אבי מאכן ווידיאוי קליפס און די פאליס שטייט אינדערויסן און ער ווערט צוביילט.. וואס גייט דא פאר??? די פאליס האבן נישט געקענט אריינגיין מיט עהם? ס'איז נישט ניו יארק, ווי מ'טוט, מ'גייט, מ'רופט פאליס, מ'כאפט ווידיאוס, ס'איז גוטאמאלע ווי ס'קיין סמארטפאונס נישט דא פונקט צו האבן און שיקן און טרעפן, און באשטעלן און ווייזן, און לויפן. און לויט די ווידיאוס וואס איז היינט דא פון דעם פליטשקין בחור דארט אין בבל, זעט מען אויך אז ס'נישט ווי ס'איז געשילדערט אין דעם ארטיקל.

חלילה צו זאגן אז דער שרייבער איז משקר, אבער זיכער צו זאגן אז ישראל מאיר איז א פיפיגער קאפ דרייער, און אונז האבן דאך דעם שיכור]פארמעקט[ ואס איז דער ערשטער נימול אינעם כת, לאמיר עהם פאנגן און ארויסקוועטשן פרטים, ווייל ראפי זאגט כאטש אמת ווי באקאנט ווער ס'קען עהם, נאר פרטים געבט ער פשוט נישט, צוליב זיין טראמא פון דארט.

כרפס, כ'האב הנאה אז האסט דורכגעליינט די ארטיקל בעיון, אזוי כאטש ווייס איך אז מיין ארבעט איז נישט אומזיסט.

איך וועל פרעגן פון ישראל מאיר דיינע שאלות און דיר בל"נ אפשרייבן א לענגערע תירוץ.

ער איז דירעקט נישט פארבינדן מיט ראפי קעניג, הגם ער קען אים גאר גוט, אבער ער איז זיכער נישט קיין ליגנער, נאכן פארברענגען מיט אים עטליכע חודשים קען איך שים שוין און אויף אזוי ווייט קען איך דיר זאגן אז ער איז א צארטע איידעלע נפש.

א גרויסן ייש"כ פארן פרעגן, איך בין נאכנישט קיין ערפארענער אינטערוויואירער און דאס העלפט מיר ארויס אויף א קומענדיגע מאל אז די אינטערוויו זאל זיין בשלימות און ענטהאלטן מער אינפארמאציע.

מאך זיכער האט געשריבן:ווי ערווענט אינעם ארטיקל איז ער נישט זיכער איבער סיי וועלכע ניק וואס איז באמת אינעם קולט, אבער איך האב געמאכט מיין אייגענע ריסיורטש און געוואויר געווארן אז חכמת שלמה איז יואל העלבראנץ, שלמה'ס יונגסטער זון.

דא איז דא מקום להתגדד. חכמת שלמה אדער סיי וועלעכע אנדערע קאווע שטיבל נאמען, זענען שוין אן אלטע שקלא וטריא מה טובן, עיי"ש. דאס איז אבער אמת, לכאורה, אז יש דברים בגו און דער ניק האט עפעס אן אמת'ער שייכות אהין, ממילא איז נישט אפגעפרעגט צו זאגן אז דער קינד איז נישט א דובר אמת, נאר ס'איז אריינגעפאלן א טעות דא, אזוי ווי ס'געשענט פון צייט צו צייט.

עכ"פ, די אינטערוויו און ריסירטש איז א פיינע ארבעט. ס'איז גאר אינטערסאנט, און ס'זעהט אויס צו זיין קראנט. דאס איז חוץ פון דעם אז ס'איז א מילתא דעבודי לגילויי, ווייל דער בחור'ל איז א מציאות מיט וועם מ'קען רעדן, און ער רעדט טאקע, וואס דאס אליינס איז שווער צו בולשיטן פאר די ברייטע וועלט.

יישר כח ATUB @מאך זיכער ATUB

כרפס איז איינגעשריבן 4 טעג דא, און גלייך ווענד ער זיך צו שרייבן איבער לב טהור.

א נייע ניק, א נייע שטיק. נאך איינער טראכט וואס איך טראכט?

נע, ער שרייבט איבעראל.

מאך זיכער האט געשריבן:ווי ערווענט אינעם ארטיקל איז ער נישט זיכער איבער סיי וועלכע ניק וואס איז באמת אינעם קולט, אבער איך האב געמאכט מיין אייגענע ריסיורטש און געוואויר געווארן אז **** איז ***.

דאס איז קעגן די תקנות המקום. פליז פארמעק.

זייער א שיינער ארטיקל. ייש"כ פאר דיין ארבעט. אויב איך מעג פרעגן איז ישראל אויף סאשעל מידיע ערגעץ?

.

זיין העבראעישער נאמען איז ישראל עמיר פאר ווער עס וויל פארשן אויפן אינטערנעט, אינסטעגרעם איז israelamirr פאר וועם עס אינטערסירט.

פאר א לענגערע צייט צוריק האב איך געזען דעם לענגערן קליפ פון ישראל מאיר'ס גאנצע היסטאריע אנגעהויבן נאך פון ארץ ישראל, לב טהור און דערנאך צוריק קיין ארץ ישראל.
אויך האט מען טאקע געזען דעם פארכאפונג, און כ'דענק ווי אלע וואס זענען אים געקומען ראטעווען זענען געווארן צעביילט און צעבלוטיגט.

אויך זעט מען דארט ווי 'אורית' רעדט צום ארטיגן פרעסע וכו'.

עס איז היפש אינטערעסאנט געווען. דענק איך אבער נישט וואו כ'האב עס געזען

האסט עס געזען אין 'עובדה' פון אילנה דיין.

לבי ובשרי האט געשריבן:פאר א לענגערע צייט צוריק האב איך געזען דעם לענגערן קליפ פון ישראל מאיר'ס גאנצע היסטאריע אנגעהויבן נאך פון ארץ ישראל, לב טהור און דערנאך צוריק קיין ארץ ישראל.
אויך האט מען טאקע געזען דעם פארכאפונג, און כ'דענק ווי אלע וואס זענען אים געקומען ראטעווען זענען געווארן צעביילט און צעבלוטיגט.

אויך זעט מען דארט ווי 'אורית' רעדט צום ארטיגן פרעסע וכו'.

עס איז היפש אינטערעסאנט געווען. דענק איך אבער נישט וואו כ'האב עס געזען

אה, געטראפן דעם ווידעא מיט א שנעלן אינטערנעט סוירטש

א גיעול נפש נעבעך צו זען וואס ער האט מיטגעמאכט.

אינטערסאנט, אז אלעס האט מען פילמירט...

אה! הער יו גאו.. כ'האב געוואטשט דעם גאנצן שפיל-דאקומענטארי, און האלב שאלות פאלן אוועק, און ס'קומען אויף די געווענליכע שאלות; פארוואס דיסטרוידט מען זיי נישט ביז שטויב.

ס'האט אוודאי געפעלט אסאך פרטים אינעם ראיון, אבער אויך אינעם דאקומענטארי ווערט נישט אלעס אויפגעדעקט, און זיי אליינס די מיטגעמאכטע וואס זענען אנטלאפן פון דארט, האלטן זיך אויך דאס מויל - ווען ס'קומט צו געוויסע פרטים.

לאמיר מאכן סדר אין הויז.

די גאנצע קולט דארט איז אין מיינע אויגן אזוי סתירות'דיג, ווייל אז אויב ער האט געקענט ארויסגיין פון דארט, און מ'זעט אויפן' פילם אז ס'טוט זיך א געגייעכטס און געקומעכטס, און אז ס'געווען מעגליך פאר עהם צו שאפן א סמטארטפאון, און אז ס'דא די מושג צו האבן אינטערנעט דארט אינסייד, און נאך פרטים וואס כ'זע און איבערצייג מיך, וואס אין מאנרא אין סקווער אין טאהש איז עס נישטא, ממילא האבן זיי דען קאנטראל?
די תירוץ קען זיין, אז די עלטערע וואס זיי האבן ביי זיך אין טאש, לאזן זיי מער לויז, און זיי העלפן זיי צו האלטן די יונגע ביים קארג, און די יונגע האבן די מעגליכקייט אזוי, צו שאפן דאס און יענס - ווי ישראל מאיר האט מצליח געווען. אבער איז דאס נישט אפגעפרעגט אין זינען פון האלטן קאנטראל? א קשיא אויף בהמות..

דאס אז ער איז געווען איזולירט אין חרם ארט, פארשטיי איך ווידער נישט, ווי און וויאזוי איז יענע ארט, אז מ'קען אפ'פיצן און זינגען ביים וואסער געזאנגן, ממש א פרייע פויגל... אבער כ'פארשטיי שוין בעסער אז וואס ער האט געטון לבסוף איז געווען אנטלאפענערהייט, און ער איז עטליכע מאל אנטלאפן און צוריקגעקומען, און זיי האבן יא געשמעקט אז ער ארבעט אונטערן רוקן, שטעלט זיך די פראגע, ווי איז זייער ריכטיגע קאנטראל? א קשיא אויף בהמות..

מיר איז קלאר, אז לב טהור איז א נארמאלע תוצאה פון די ברעסלעווע שיטה, וואס רבים חללים הפילה! ס'נישטא קיין איין נארמאלע ברעסלעווע תנועה וואס איז גאנץ נארמאל, איינער חצי נזק א צווייטער מזיק שלם, און דער דריטער צעפראסקעט פאר זיך. אבער די לב טהור גרופע איז באזירט אויפ'ן הענגער פון נחמן נתן התבודדות און נאך.

אסאך וויכטיגע פרטים ווערט צוגעגעבן אינעם פילם, ווי צום ביישפיל, אז ער האט אריינגעגעבן א קלעים קעגן זיי, און געמאכט גערידער שפעטער, וואס לכאורה האט ער געטאפט א וואנט, ווייל די קאראפציע פון שוחד איז שטערקער פון יעדע כח. און אויך בין איך געוואויר געווארן אז זיי האבן דארט באוואפענטע שומרים ביי די איינגאנג פונעם שטח, ממילא איז טאקע נישט לייכט צו קומען דארט מיט פיילען-בויגן און פייטן, די פראגע איז נאר פארוואס זענען די איזרעיליס אהינגעקומען אנע וואפן? א קשיא אויף די איסראעילי דומען...

- אדער גאר, פעלט מער אינפארמאציע אינעם קוגל דא, ווייל אויך היינט ווען דער פירער איז טויט, און עטליכע זענען אנטלאפן, די קבוצה איז צעשפליטערט מצד מה, עטליכע זיצן אין טורמע, אבער די קולט איז נאכאלץ אין קראפט, אט די פראגע שרייעט חי וקיים.

כרפס, האסטיך נישט געקענט איינהאלטן.. נו.. חשש גילוי...
יודע הייתי לשעבר ועכשיו ביותר..

cictim האט געשריבן:כרפס, האסטיך נישט געקענט איינהאלטן.. נו.. חשש גילוי...
יודע הייתי לשעבר ועכשיו ביותר..

דער וואס מיינט ער ווייסט, יענער ווייסט גארנישט

און דער וואס מיינט אז ער ווייסט אז יענער ווייסט גארנישט, דער ווייסט טאקע גארנישט...

אנטשולדיגט כרפס, אבער דיינע אלע תגובות אויפן ארטיקל און אויפן פילם ברענגען ארויס אז דו ביסט זייער נישט קלאר בכלל אין עניני לב טהור און אלעס מוז שטימען מיט די באגרעניצטע אינפארמאציע וואס דו האסט יא.

עס זעט זיך פשוט אויס אז דו ביסט אומוויסנד, לדוגמא, לייגסט אראפ א הנחה אז זיי זענען דומע איזרעילי'ס און דעריבער האבן זיי נישט געברענגט קיין געווער, האו עבאוט זיי האבן נישט געהאט קיין הווא אמינא אז זיי גייען כאפן קלעפ, און נאך מער, פארוואס אין די וועלט זאלן זיי גיין מיט געווער?

קענסט נישט אראפלייגן א אומגעדעקטע ארגומענט און אויף דעם בויען א שיטה אדער קאנספיראציע.

אדער ביסטו זייער נאאיוו וואס איך וואלט דיר דעריבער געראטן צו רעדן מיט א יוצא פון לב טהור, אדער ביסטו א ספינער וואס זוכט צו מאכן נויז, עניהאו האב אלעס גוטס און נעם נישט פערזענליך.

מאך זיכער האט געשריבן:אנטשולדיגט כרפס, אבער דיינע אלע תגובות אויפן ארטיקל און אויפן פילם ברענגען ארויס אז דו ביסט זייער נישט קלאר בכלל אין עניני לב טהור און אלעס מוז שטימען מיט די באגרעניצטע אינפארמאציע וואס דו האסט יא.

עס זעט זיך פשוט אויס אז דו ביסט אומוויסנד, לדוגמא, לייגסט אראפ א הנחה אז זיי זענען דומע איזרעילי'ס און דעריבער האבן זיי נישט געברענגט קיין געווער, האו עבאוט זיי האבן נישט געהאט קיין הווא אמינא אז זיי גייען כאפן קלעפ, און נאך מער, פארוואס אין די וועלט זאלן זיי גיין מיט געווער?

קענסט נישט אראפלייגן א אומגעדעקטע ארגומענט און אויף דעם בויען א שיטה אדער קאנספיראציע.

אדער ביסטו זייער נאאיוו וואס איך וואלט דיר דעריבער געראטן צו רעדן מיט א יוצא פון לב טהור, אדער ביסטו א ספינער וואס זוכט צו מאכן נויז, עניהאו האב אלעס גוטס און נעם נישט פערזענליך.

חלילה עס צו נעמען פערזענליך, ווייל כ'וויל טאקע פארשטיין. אז מ'גרייט זיך צו א אקציע אזאנס, האבן זיי געהאט גענוג אינפארמאציע אז די קולט איז מסוכן, און ס'איז קאמאן סענס אז אפילו אין א נארמאלע וועלט נעמט מען מיט זיך סעקיוריטי בעקאפ, און אין גואטאמאלע איז א פראגע? ווער איז נייאיוו און דום?

דיינע שאלות זענען פארשטענדליך און איך נעם חלילה נישט קיין זאכן פערזענליך, אבער די סגנון וואס דו שרייבסט זעט אויס ווי דיין אמביציע איז צו לייקענען די געשיכטע, א אזך וואס איז אמת, אויב האסטו שאלות איז עס א חיסרון אין דיין אינפארמאציע.

יעצט צוריק צו דיין שאלה, פארוואס זאלן זיי מיטנעמען סעקיוריטי? זיי האבן געפלאנט צו פאטאגריפירן סעיף און קולטיסטן האבן זיי געכאפט אינדרויסן.

לאמיר דיר מגלה זיין מיין שטאנד.
איך האב שוין אסאך געהערט און געליינט וועגן דעם קולט, און כ'בין היבש נאנט מיט רפאל קעניג - דער ערשטער נימול אינעם קולט, און אסאך - צו סאך - געהערט וואס כ'בין נישט געווען נייגעריג צו הערן, און וואס כ'בין געווען נייגעריג האב איך נישט געקענט פון עהם ארויסבאקומען.
און יעצט ווען כ'האב געליינט דיינע שורות, האב איך מדייק געווען יעדעס ווארט, כדי צו דערשניפן די אמת וואס כ'וויל וויסן, די שאלות און ספיקות אינעם געשיכטע.
איך האב נישט קיין ספק אז ס'איז אמת אסאך בארבארישע מעשים דארט, אבער פון זאגן מ'האט יענעם כמעט געהארגעט, ביז מ'האט עהם אנגעהארגעט איז א גרויסע חילוק. צו זאגן מ'האט עהם געשמיסן און מ'האט עהם פשוט צעריסן איז א חילוק. צו זאגן מ'האט געפאטשקעט מיט קינדער און זאגן מ'האט באגעוואלדיגט נשים איז א חילוק, און נאך און נאך חילוקים.

איך דארף נישט גלייבן אז דארט איז נישט קיין גן עדן, ווייל ס'איז א פאקט, אבער אז דו האסט יא געהאט א ערשטהאנטיגע אינפארמאציע זאגער, האב איך געוואלט הערן קראנטע דיבורים אנע קעקעץ. וואס פארשטייסטו נישט, אז די ספיקות שרייען דרשינו! ס'טוט זיך דא סתירות אין זאכן וואס מאכט נישט קיין סענס. און דא זענען 'דערווייל' באהאלטן פאקטן.

כ'האב מיך נישט געפוילט, און פראבירט טרעפן דעם 'ישראל מאיר' און דערווייל עהם נאכנישט געטראפן, אבער יגעתי ומצאתי תאמין, כ'האב זיך פארבינדן מיט מרת אורית כהן מאיר, און זי האט שוין יא צוגעגעבן מער תשובות, אבער אויך זי ''וויל'' נישט רעדן אלעס. פארוואס? פארוואס??
כ'האב איר געפרעגט אפען, עטליכע שאלות וואס כ'האב דיר געפרעגט, און עטליכע וואס כ'האב געפרעגט פון ראפי קעניג וואס רעדט אסאך... אבער זי ענטפערט מיר פונקט ווי ראפי; כ'ווייס אסאך, ס'ביטער... ס'גוט! מ'קען נישט אלעס פארשטיין...

איך וויל יא וויסן.

לויט אירע ווערטער גרייט זי זיך שוין יארן פארדעם צו דעם אבלאווע, און זי איז דארט געווען אפאר מאל.. און מיטגעברענגט באוואפענטע חברה מיט קאמערעס, און פונקט יעצט נישט? און זיי זענען נישט געקומען צו פארן פון מאנסי צו קווינס.. זיי זענען געפלויגן 18 שעה, אליינס? מיט א פאטאגראפער און סעלצער??

כרפס האט געשריבן:מיר איז קלאר, אז לב טהור איז א נארמאלע תוצאה פון די ברעסלעווע שיטה, וואס רבים חללים הפילה! ס'נישטא קיין איין נארמאלע ברעסלעווע תנועה וואס איז גאנץ נארמאל, איינער חצי נזק א צווייטער מזיק שלם, און דער דריטער צעפראסקעט פאר זיך. אבער די לב טהור גרופע איז באזירט אויפ'ן הענגער פון נחמן נתן התבודדות און נאך.

וואס פונקטליך מיינט דאס? וועלעכע פון די אלע זעהסטו זיך אין? נזק שלם? חצי נזק? צופראסקעט פאר זיך?

נישט זיכער אז לב טהור וואלט דיך געקענט ראטעווען, אבער ברעסלב אפשר יא, עכ"פ שרייב אראפ זייער נאמבער, אפשר וועט דיר עס צו ניץ קומען איין טאג...

מאך זיכער אז ס'נישט צו שפעט...

איז עס טאקע אזוי אז ס'איז נישט דא קיין חומשים און גמרא'ס ?

איך האב זייער הנאה געהאט פונעם ארטיקל. שיין געשריבן און זייער שפאנענד.

אזוי ווי כרפס האט שוין ערווענט דא, פעלט אסאך בעקגראונד פונעם קולט. איך האב זיך אויך געוואונדערט פון וואו ער האט באקומען דעם קלארינעט, פון וואו ער האט פארשאפט זיין סמארטפאון און וויאזוי ער האט זיך ארויסגעדרייט פון די "רוצחים" וואס זענען געווען עלול אים צו הרג'ענען אויב זיי וואלטן אים געפונען.

איך בין נישט מטיל ספק אינעם עצם סיפור. עס וואלט אבער געווען אינטערעסאנט צו הערן מער דעטאלן פונעם קולט. פונקטליך וויאזוי קאנטראלירט מען זיי? ווער ארבעט דארט און וויאזוי האלט מען אויס די ראשי הקולט? וויפיל געלט מעג יעדער האלטן פאר זיך? וואס איז געווען זיין רילעישאנשיפ מיט זיין אינגע פרוי? וואס איז געווען זיין רילעישאנשיפ מיט זיין טאטע, מאמע און געשוויסטער?

איך גלייב אז געוויסע מענטשן - קען זיין נאר א קליינע מיעוט - האבן יא הנאה דארט אינעם קולט, אז נישט וואלט דאך יעדער אנטרינען. וואספארא בענעפיטן נעמען זיי ארויס פון דעם קולט? וויאזוי האלט מען זיי ווייטער געשפאנט דארט? ער שרייבט אז דער עולם וויל נישט וויי טוהן דעם רבי'ן, אבער וואס טוט דער רבי פאר זיי אז מען איז אים אזוי מעריץ? וכהנה וכהנה זענען מיינע שאלות. איך וואלט הנאה געהאט אויב איינער קען מיר ערקלערן אביסל מער איבער דער הלוך ילך דארט.

אזוי ווי יעדע באשרייבונג אויף לב טהור, זענען פארהאן דא זאכן וואס זענען נישט אמת.

א דוגמא צו דעם איז דאס אז ס'ווערן נישט אריין געלאזט קיין שום ספרים, אויסער די וואס זענען געשריבן דורך הלברנס, דער שרייבער האט אפילו ספעציעל באטאנט אז ס'זענען נישט פארהאן דארט קיין חומשים.

פאלגאנד איז 3 סקרין שאטס פון א 16x9 דאקיומאנטערי אויף לב טהור, ווי מ'זעהט חומשים, א מקראות גדולות נ"ך, און קיצור שולחן ערוך...

איך גלייב אז אין א שיין חלק פון דעם דאקיומענטערי האט לב טהור זיך אהער געשטעלט בעסער ווי זיי זענען למעשה, אבער ס'איז מיר שווער צו גלייבן אז זיי האבן געברענגט חומשים און קיצור שולחן ערוך צו געפעלן פאר 16x9

ווען איינער פרעגט קשיות, און מ'רעגט זיך אויף עהם פאר'ן פרעגן, שמעקט עס נישט גוט...
פונקט אונז וואס שטייען די אנדערע זייט פון לב טהור, וואלטן געדארפט האבן די תירוצים קליפ און קלאר, און אויב נישט, עס ארויסקוועטשן ווי פון א סוטה, און זיי אויסלייגן על פני השמש.

כרפס האט געשריבן:ווען איינער פרעגט קשיות, און מ'רעגט זיך אויף עהם פאר'ן פרעגן, שמעקט עס נישט גוט..

כרפס, קיינער האט נישט קיין אישו אז דו פרעגסט, אבער אז א נייע ניק זעצט זיך ארויף אויף קאווע שטיבל און הייבט אן פרעגן קושיות אויף א ספעציפישער ארטיקל און גרינטעוועט דורך יעדע זאך וואס עס איז אים אומפארשטענדליך באגלייט מיט אן הנחה קדומה אז דער שרייבער און דער באשריבענער זענען שקרנים דאן פארגיייט דאס אפעטיט פון אים ענטפערן, און עס הייבט ברעמען מיט נייגער וואס זיינע מאטיוון זענען.

רוב פון דיינע קשיות זענען אינעם ארטיקל, דו קענסט עס דורכליינען א צווייטן מאל וועסטו קלארער ווערן, טעכנישע חלקים ווי 'פון וואו האט ער השגות/ספרי חב"ד/קלארינעט' וועסטו מוזן אליינס אויספיגערן, נישט ווייל איך קען דיר נישט ענטפערן, נאר ווייל מיין טאג באשטייט נישט פון קוקן אויף קאווע שטיבל אויב איינער רופט מיר.

איך זעה אז אין גענעראל פעלט אסאך בעיסיק אינפארמאציע אויף לב טהור פאר אונזער געמיינדע, און עס וועט זיין זייער שווער צו פארענטפערן יעדנס פריוואטע שאלות, אבער לאמיר נעמען א ביישפיל, די סקרינשאטס פון די ספרים, דו מיינסט טאקע אז זיי האבן עס נישט ספעציעל אונטערגעלייגט? דו ווילסט זען דעם בריוו פון סקווערע דיין פאללאק קעגן העלבראנץ נאך ווען ער האט געוואוינט אין מאנסי, אז ער טאר נישט פרעדיגן קעגן פירוש רש"י?

לב טהור איז א קולט וואס האט זיך יעדע פאר חדשים געטוישט, איינמאל עקסטרעם, און איינמאל מער עקסטרעם, און טיילמאל איז עס צוריקגעפאלן, אבער איינע פון די הויפט זאכן וואס זיי האבן אלס אויסגעארבעט איז אז די חסידישע גאס זאל נישט געוואויר ווערן פון זייערע זאכן, ווייל זיי האבן געקריגן געלט פון היימישע אידן פון לאנדאן, מאנטשעסטער, וויליאמסבורג, מאנטריאל און טאהש!

עוז והדר פלעגט ביי זיי פרינטן גמרות א שטיק צייט, און אויך האבן עטליכע פון זיי פארקויפט קאקאין אין גואטאמאללא, זיי האבן זיך אלס מסדר געווען בכדי אז זיי זאלן נישט ברויכן צוקומען צו שטיצע פון קהילות, אבער פון יחידים האבן זיי אלס גענומען, א שליח מיטן נאמען אליהו קאין פלעגט ארומגיין יארן אין וויליאמסבורג נאכגעלט, ווייל ער איז געווען אין גלות לויטן קולט (היינט איז ער אינדרויסן פונעם קולט און איר קענט אים אלע גיין פרעגן, ער איז טויט משוגע אבער אויב כאפט איר א שפראך מיט אים וועט איר אסאך דערשנאפן פון אים).

נאכאמאל, טעכנישע שאלות פרובירט אליין צו געוואויר ווערן ווייל עס איז נישט ביכולתי צו פגע'ן א מענטש וועם כ'האב באשריבן... ער האט בסך הכל מסכים געווען מיר צו לאזן אים באשרייבן ווייל ער האט געוואלט אויפטרייבן געלט פאר זיין קאמפיין צו ראטעווען זיין קינד (וואס ווען דער וועקער איז געגאנגען צום דרוק איז שוין נישט געווען אינטערסאנט צו לייגן דעם לינק ווייל ער שפארט שוין דעם קאמפיין).

הצלחה און א דאנק פאר אלע קאמענטירער (אויך כרפס, כ'בין נישט ברוגז... כ'האב נישט אזויפיל צייט).

חלילה אז דו ביסט געווען בייז פאר'ן פרעגן, מיין כוונה איז געווען אז 'אורית כהן' האט זיך גערעגט אויף מיר פאר'ן פרעגן. דאס האב איך געמיינט, און כ'האב דאס געשריבן אין פריערדיגע קאמענטס. סליחה.
אויב איינער קען מיר אבער ענטפערן, וויאזוי האלטן זיי זי נאך, אויב עטליכע גרויסע זענען אין טורמע וכו' וכו'. און ס'וואלט שוין געדארפט זיין צעפאלן לויט'ן חשבון.

ווען איינער דא זאל ווען קענען דעם בחור הבורח...

א לץ שבלצים, א טמא'נער יונג און כ'וויל נישט זאגן וואס נאך.

וועלקאם אבאורד מוטער קראצער, וואס האסטו צו דערציילן איבער דעם בחור הבורח?

חכמת שלמה האט געשריבן:ווען איינער דא זאל ווען קענען דעם בחור הבורח...

א לץ שבלצים, א טמא'נער יונג און כ'וויל נישט זאגן וואס נאך.

בחור הבורח? פון וואו אנטלויפט מען? פון ברוקלין? פון פאפא? פון וואו אנטלויפט מען? מען אנטלויפט פון א פארשאלטענע קולט!

א טמא'נער יונג? די ערשטע זאך וואס אנשי רשע שמירן אן אויף איינעם וועלכע גייט נישט אין שפאן איז - אז ער לויפט נאך קינדער.... דו קולטישער בהמה! קיינער קויפט שוין נישט היינט די דאזיגע מיטל-אלטער קרעפלעך!

לץ שבלצים? פון וועם מאכט ער ליצנות? פונעם גרעסטן גלאבאלער ליצנות זעלבסט? פון דעם שגץ טמא דער ארז הנגדע ימ''ש? וואס האקסטו א טשייניק?

פארמאכט ענקער פארשאלטענעם טמא'נעם קולט, און גלידערט אייך איין צוווישן די אלגעמיינע מענטשהייט! כלל ישראל האט שוין גענוג געליטן פון אייך!

אז מ'רעדט שוין, דער שגץ ענקערע דער בעל פעור נתן שר''י, שמאכט נאך אין טורמע? אז נישט לאז אונז וויסן! מיר וועלן דארפן מאכן א יום תפילה אז דער שגץ זאל צוריק אנקומען אין טורמע דאס שנעלסטע וואס מעגליך!

מאך זיכער האט געשריבן:וואס האסטו צו דערציילן איבער דעם בחור הבורח?

איך בין מסופק וואס צו דערציילן. מען האט מיר געהאט באפוילן מער נישט צו שרייבן דא (געהאט א גאנצע געשיכטע נאך וואס מען האט זיך דערוויסט...), שפעטער האב איך באקומען א מעסעדזש פון אנדערע אז איך זאל דווקא יא שרייבן, האב איך פראבירט איבערצופרעגן דעם ערשטן, אבער נישט אנגעקומען געהעריג צו אים. יעצט נאכן זען אז ער ענטפערט נישט, האב איך געשריבן דא אפאר ווערטער, אז יענער זאל באמערקן, און איך וועל באקומען דער מעסעדזש וויפיל און וואס עס איז דער רצון אז מען זאל שרייבן. וכו', וד"ל, ודו"ק, עיי"ש.

איבער דער פריעדיגער מעסעדזש, איינער העכער מיר; ווילסט סתם שרייען און שעלטן? - מיר קענען זיך פארמעסטן מיט דעם אויך, אבער איך גלייך ענדערש צו רעדן מיט אנדערע ווי מענטשן, אזוי ווי איך האב געטאן אין אלע פריעדיגע תגובות.

אין אלע פריערדיגע תגובות האסטו געבלאפט דעם ציבור און זיי געפיטערט מיט פאלשע אינפארמאציע, איך ווייס נישט אויב דו האסט געכאפט אבער דו שרייבסט אזוי בא'טעמ'ט אז מען האט דיר געפאקט ביים שרייבן אין קאווע שטיבל ווי כאילו דו לעבסט אין א פרייע וועלט.

ווילסט גיין פאקטן? כ'קען מיט דיר גיין פאקטן, ווילסט רעדן אין טעאריע? קען איך אויך אזויווי דיר זיך טענה'ן, דער וואס איז אנטלאפן איז א העלד און דו (אויב דו ביסט בכלל דארט) ביסט א נאר.

און זיי נישט מוציא שם רע אויף מענטשן, נאכדעם וועסטו מיר נאך קומען זאגן אז איך בין דער וואס שרייבט נישט זאכליך, ליין איבער דיין ערשטע תגובה.

חכמת שלמה האט געשריבן:ווען איינער דא זאל ווען קענען דעם בחור הבורח...

א לץ שבלצים, א טמא'נער יונג און כ'וויל נישט זאגן וואס נאך.

וועם גייט אן אז ער איז א לץ שבלצים.. וועמען גייט אן אז ער איז טמא.. און וועמען גייט אן וואס דו ווילסט נישט זאגן כאילו...
כלל ישראל חלישט אוודאי צוזיין אין לב טהור, און יענער האט פארלוירן די זכיה... וואס?
כ'מוז מודה זיין אז העלבראנץ באטשי האט געמאכט א גוטע מוח וועשעריי.. אז ראזנער וואס איז גארנישט קיין מפיל קינד, האט עהם געדינט ווי א געטריבענע עבד.

כ'האב נאכנישט געליינט דער ארטיקל אינעם וועקער, אבער כ'האב יא געזעהן די ישראלישע המקור.
מיין מחשבה איז דעמאלטס געווען אז די מעסעדזש וואלט ווען געווען אזויפיהל שטערקער ווען אזא איינער נעמט נישט אראפ די קאפל און פיאות זאפארט נאכ'ן ארויסקומען פין דאס פארשאלטן מקום. הגם כפי הנראה איז עס פארשטענדליך.
ווען איינער קומט ווען "ארויס פין בבל" און ווערט א נארמאלער (כ'האב נישט געזאגט אמת'ער איד אדער ריכטיגער איד, כ'סטרעס נארמאל - איש בין אנשים כפי הנהוג) איד וואלט די מעסעדזש געווען שטערקער און בארירט א ברייטערען ציבור.
אבער דער ישראל מאיר איז א העלד און מען קען איהם בכלל נישט דן זיין. און ווי @כרפס ערקלערט

כרפס האט געשריבן:וועם גייט אן אז ער איז א לץ שבלצים.. וועמען גייט אן אז ער איז טמא.. און וועמען גייט אן וואס דו ווילסט נישט זאגן כאילו...

איך פרוביר צו פארשטיין די סיבה פארוואס טייל ניקים באנעמען זיך זייער אגרעסיוו צו (אנגעגעבענע) לב טהור ניקים. זאכן ווי גילוי און פערזענליכע אטאקעס וואס געווענליך וועט מען עס נישט טרעפן ביי זיי, אבער דא ווערט עס מיטאמאל א לכתחלה, ניטאמאל פרובירן זיי מיט שיינעם.

כ'טראכט, ס'האט מיט אינסעקיוריטי, טיף אינעווייניג ווייסן זיי אז קיין גרויסער חילוק איז נישט פארהאן צווישן זייער קולט און די לב טהור קולט. די רעאקציע אין אזא פאל איז שנאה און אגרעסיוונעס כידוע ליודעי תכונת הנפש. ואדרבה, אויב איינער האט אפשר א בעסער טעאריע זאל ער פליז שרייבן.

בכל אופן בעט איך אז יעדער זאל זיך האלטן אין די ראמען. סקען קיין קאנסטרוקטיוו שמועס נישט ארויסקומען אזוי. און ווער וויל דען נישט הערן ביידע זייטן?

איך וויל זייער שטארק קויפן דער וועקער, ווי קען מען עס באקומען, צוליב די געווענליכע News stand פלעצער, זענען פארמאכט צוליב די קאראונע וויירוס.

איך פלעג עס איינהאנדלען אויף 13x49

אין בארא פארק נישט, נאר דורך עמאזאן.

מארגן אינדערפרי וועלן מיר אי"ה ארויפשטעלן אויף אונזער טעלעגראם טשענעל דעם ארטיקל "ארויס פון לב טהור'ס נעגל".

זייט פון די ערשטע צו באקומען מודעות און ארטיקלען דורך זיך איינשרייבן אויף אונזער טעלעגראם טשענעל:
https://t.me/derveker

מ'קען יעצט לייענען דעם גאנצן ארטיקל אויף אונזער טעלעגראם טשענעל: m https://t.me/derveker/209 m

זייט פון די ערשטע צו באקומען מודעות און ארטיקלען דורך זיך סובסקרייבן צו אונזער טעלעגראם טשענעל.

חיים גולדברג
@haim_goldberg
· May 14
נערה בת 14 בכת לב טהור בגאוטמלה שנשואה לבחור בן 18, ילדה לפני מספר ימים בחדר מוזנח במתחם הכת. הלידה מסתבכת, הילוד - מת. מפחיד

חיים גולדברג
@haim_goldberg
הסיפור הזה מעורר סערה בכת.
הסיבה: אחד מבני המשפחה טוען שמנעו מהיולדת לנסוע לבית חולים גם אחרי שידעו שזו לידה רגישה

חיים גולדברג
@haim_goldberg
מה שמעניין, שמהיום שרומפלר נעצר בארץ (עד עכשיו הוא בארץ), מתחיל לצאת מהכת יותר ויותר חומר

ליינענדיג דער ארטיקעל, עס איז גאר אינטערעסאנט. אבער רובא דרובא איז שוין מבואר (אדער קומט) פין דער דאקומענטירט אויף דעם.

אגב אויף בלאט 132 שטייט אז נאכדעם וואס שלמה העלבראנץ אויב געשטארבן זענען זיי אנטלאפען קיין גואטאמאלא.
לפי זכרוני זענען זיי דארט געוועהן ווען ער האט געלעבט.

אישתישבי האט געשריבן:ליינענדיג דער ארטיקעל, עס איז גאר אינטערעסאנט. אבער רובא דרובא איז שוין מבואר (אדער קומט) פין דער דאקומענטירט אויף דעם.

דער ארטיקל איז אן אינטערוויו מיט ישראל מאיר אליין. ער איז אויך אינטערוויואירט געווארן אויף דעם דאקומענטאר, און נאטירליך וועלן די פאקטן זיין ענליך. אינעם ארטיקל זענען דא פילע פרטים וועלכע זענען נישט פאראן אינעם דאקומענטאר, און אזוי אויך בילדער. צב"ש, דער גאנצער בריוו וואס הרב העלבראנץ האט אים געשריבן איז עקסקלוסיוו פאר'ן וועקער.

יישר כח.

אױב דער ווערטער רעדאקטאר האט אפגעטייפט דער בריוו פין העלבראנץ, וואלט געוועהן א טובה עס צו פאסטען דא. עס קומט מיר אהן שווער צו ליינען זיין כתב יד.

און אינטרעסאנטע שאלה וואלט געוועהן, אױב דער וועקער האט פארשטאנען בעסער פין ישראל זיינע סטראגעלס און זיינע קשיות ווי דער ארץ־ישׂראל'דיגע דאקומענטרי, ווייל זיי האבן נישט דער אינערליכע בליק ווי דער וועקער.

עס איז גאר אינטערעסאנט אז דווקא א ספר פין חב"ד, אמונה ודעות האט אין אים מעורר געווען קשיות. וואס האט ער שוין דארט געקענט זעהן וואס זאל אים מאכן האלטען אז דער סיסטעם איז א שטיפת מוח.

חומש לאזן זיי אויך נישט לערנען, נאר דאס וואס האט א פירוש פין דער פירער, טאמער זאל איינער לערנען חומש דירעקט וואלט ער אויך אפשר אפגעפארן?

למשל ביי חסידים לאזט מען נישט לערנען נ"ך, טאמער א בחור'ל זאל לערנען נ"ך קען זיין ער וואלט געהאט אפאר קשיות אויף די מאדנע מעשיות דארט, אבער פין דארט ביז אפפארען איז א ווייטע וועג.