לכל מאן דבעי למידע, איך געהער נישט אן צו קיין איינע פון די צוויי פארטייען, אמת איך האב נאנטע משפחה אין ביידע, אבער דאנקן גאט איך בין ווייט כמטחוי קשת פון ביידע.
די הייסע צייטן פון די תש"נ יארן געדענק איך צו גוט, פרטים איז א שאד צו דערמאנען, די חסידים קענען דאס בעסער פון סיי וועמען, זאל עס זיין די רעביצין, זאל עס זיין די הכנסת ספר תורה וכו' וכו'.
ווי ווייט איך ווייס איז נאכנישט געבוירן געווארן די רבי וואס האט אפליקירט פאר א קאפירעכט אויף זיין נאמען, ווי אויך די איינציגסטע וועג וואו אזוי די נאמען פון א שטאט גייט אריבער פון טאטע צו זון, איז נאר ווען די טאטע הייסט "קראקעווער" לדוגמא, דעמאלסט הייסט די זון אויך קראקעווער, אדער "האמבורגער". א ראיה צו דאס וואס איך זאג און איך רעד נישט פון חסידותן וואס האבן זיך צעטיילט אין די לעצטע 20 יאר, מיטדעם אלעם זענען דא מער פון איין רבי, אפילו אויב נישט פון די זעלבע משפחה: נאדווארנע, קרעטשניף, חוסט, סקווירא, ספינקא, טשערנאביל, וויזשניץ ס'פעלן נישט נאך דוגמאות.
ס'האט גארנישט צוטון וואו גרויס אדער קליין די חסידות איז, אדער וויפיל מענטשן יעדע רבי האט, וסקווירא תוכיח.
וועגן דעם פארשטיי איך נישט די בעלזא טענה אויף מאכניווקא, בעלזא איז א נאמען פון א פלאץ אין פוילן, אויסער דעם וואס ס'וואינט נישט קיין רב דארט שוין 70 יאר, מיט וואס איז די נאמען מער דיינס וואו ביי א צווייטן, דאס איז נומער איינס.
צווייטנס מיט וואספארא רעכטן זענען בעלזא חסידים געקומען שלאגן מאכניווקא רבי, ער איז עפעס שולדיג אז בעלזא מתנגדים זענען געווארן חסידים פון אים?! האט ער דען א כח זיי צו פארשיקן אדער הייסן זיי זאלן אויפהערן נוצן די נאמען בעלזא?! ניין, והא ראי' ער האט פרובירט און זיינע חסידים האבן נישט אויפגעהערט.
אז מ'רעדט שוין איז כדאי צו דערמאנען, די מאכניווקא רבי, האט פארן חתונה מאכן זיין קינד געקומען לאדענען בעלזא רב צו זיין חתונה, נישט לאנג צוריק, כ'געדענק נישט ווען ס'איז געווען. די בעלזא קרוינפרינץ איז אויך געגאנגען אמאל צו א מאכניווקא רבי'ס אייניקלס חתונה מיין איך.
איך האב נישט קיין צדיקים מעסטער, אבער מיין דמיון זאגט מיר אז מאכניווקא רבי איז א נרדף און איז פון די נעלבין ואינם עולבים, אן ערליכע איד א בנן של קדושים, וואס מיט אלע קלעפ וואס ער האט געכאפט, דינט ער די באשעפער אויף זיין וועג און איז אן ערליכע איד.