וויפיל מ’קען שפארן מיט אביסל ישוב הדעת.
עס איז דא זייער אסאך זאכן וואו מ’קען זיך שפארן. ביי יעדע ריר אין לעבן איז שייך זיך צו שפארן און איינציען מיט אביסל ישוב הדעת, אביסל נוצן דעם קאפ בעפאר מ’סווייפט דעם קרעדיט קארד. אבער כדי לסבר את האוזן וועלן מיר אראפברענגען עטליכע קליינע ביישפילן, ווי מען זעט באשיינפערליך אז מיט ממש קלייניקייטן קען מען זיך שפארן ריזיגע סכומים.
לאמיר אנכאפן לדוגמא דאס ענין פון פרישטאג.
אמאליגע צייטן, בימים כתיקונם, פלעגט יעדער אויפשטיין אביסעלע פריער, געטרונקען א קאפע און געלערנט אביסל פאר’ן דאווענען. נאכ’ן דאווענען איז מען געגאנגען אין גראסערי, זיך איינגעהאנדלט א לאבל פרישע ברויט מיט א פלעשל מילעך, און מען איז אהיימגעגאנגען עסן א נארהאפטיגן היימישן פרישטאג מיט די משפחה, און דערנאך איז מען רואיגערהייט אריינגעפארן ארבייטן מיט פרישע און באנייטע כוחות.
היינט צו טאגס – אינאיינעם מיט די שרעקליכע יאגעניש און כאפעניש אין אלע אספעקטן פון לעבן – איז אויך דער גאלדענער רוטין ווי פארשווינדן. מען לויפט דאווענען, און מען ענדיגט ממש דריי-א-האלב מינוט בעפאר מען דארף פאנטשן די קארד (אדער די פינגער..) און דאן איז שוין נישטא קיין צייט פאר גארנישט. מ’פליט היסטעריש צו דער ארבעט, און שפעטער, ווען מען איז שוין גוט אויסגעהונגערט, לויפט מען אין דערנעבענדיגן רעסטוראנט און מ’קויפט זיך א גרויסן ברייטן פרישטאג פאר טייער געלט.
איז אצינד, שטייענדיג ענדע פונעם גוי’אישן יארע, ווען יעדער מאכט זיך די פינאנציעלע חשבונות, לאמיר דא נעמען א פענע און פאפיר און ‘לאמיר רעכענען’ דעם אינטערשיד וואס עס קומט אויס א יאר צווישן די צוויי סטאנדארטן, נעמליך דאס לאזן זיך וואוילגיין מיט א ברייטן און טייערן פרישטאג אין רעסטוראנט, אנשטאט עסן א נארמאלן און היימישן פרישטאג אינדערהיים.
פרישטאג אינדערהיים
א פעקל ברויט: $2.50
פלאש מילך: $2.85
ירקות: $2.50
א דאזן אייער: $1.45
2 קענס טאנא: $3.35
א וואך: 12.65 $
א יאר: $657.80
פרישטאג אין רעסטוראנט
א געווענליכע פרישטאג אין רעסטוראנט קאסט – אמווייניגסטנס -צווישן 6 און 8 דאלער. אן איינפאכע טונא-סענדוויטש קאסט שוין באלד אזויפיל… און אין גרויס טייל פיל מער. עס קען גיין ביז 12-15 טאלער א פרישטאג.
איז לאמיר גיין אינצווישן און רעכענען א נארמאלן פרישטאג פאר $7.50
קומט אויס א וואך: $45
א יאר: $2340
דער חילוק צווישן די צוויי: $1682 !!
און מיר האבן דא גערעכנט בלויז דעם מינימום. דער פאקט איז אז די רעסטוראנט-פרישטאגס קאסטן רוב מאל פיל מער, און די היים-פרישטאגס קענען קאסטן ווייניגער, און צום סוף איז עס עולה לחשבון גדול ורב.
איז די פראגע: לוינט זיך נישט צו נוצן א ביסעלע ישוב הדעת און זיך דערמיט שפארן אזא גרויסע סומע?
לאמיר רעכענען