וואס זאל איך פארקויפן?

טראכט איר פון עפענען א נייער ביזנעס? האט איר עפעס א נייער פראדוקט אדער סערוויס וואס איר ווילט פארקויפן? זענט איר גאנץ זיכער אז דער פראדוקט אדער סערוויס וועט זיין א גרויסער סוקסעס אויב איר האט גענוג געלט, צייט, און מיטלען צו אנהייבן?

סיי אויב איר עפנט א נייער ביזנעס, אדער איר טראכט פון פארברייטערן אייער עקזיסטירנדער פירמע, מאכט זיכער אז איר בלייבט געצילט אויף דער וויכטיגסטער נקודה: אז דאס איז עפעס וואס אמת’ע, עקזיסטירנדע, אומפאנטאזירטע קונים ווילן אדער דארפן גענוג שטארק אז זיי וועלן דאס קויפן.

ווי אזוי ווייסט איר אז אייער פראדוקט וועט מצליח זיין אין דעם מארקעט? אודאי קען א מענטש קיינמאל וויסן פון פאראויס וואס וועט ברענגען די מערסטע הצלחה, און אלעס איז אין די הענט פונעם אייבערשטער, אבער עס זענען דא געוויסע זאכן צו אינזין האבן וואס קענען פארגרעסערן אייערע שאנסעס פון הצלחה.

פאלגנד זענען ניין קוואליטעטן וואס פראדוקטן און סערוויסעס דארפן כדי צו ברענגען פארדינסטן:

•    עס מוז זיין עפעס גוט וואס מענטשן דארפן אדער ווילן.

•    עס מוז זיין פון א גוטער קוואליטעט און אויפטוהן וואס עס דארף.

•    עס מוז זיין עפעס וואס איר קענט קויפן אדער פראדוצירן פאר א גוטע פרייז און דאס פארקויפן פאר כאטש 2 צו 5 מאל פאר וויפיל עס האט אייך געקאסט.

•    עס מוז האבן א מארקעט וואס איר קענט זיך ערלויבן צו דערגרייכן.

•    איר מוזסט קענען מתאר זיין א טיפישער קליענט אין יענער מארקעט מיט יעדער איינצלהייט. (למשל: ווי אלט ער איז, א מאן אדער פרוי, צי זיי קויפן דעם פראדוקט פאר זיך אדער אנדערע, פארוואס זיי ווילן דעם פראדוקט אדער סערוויס, וואס זייערע יערליכע פארדינסטן זענען, ווי אפט זיי וועלן קויפן דעם סארט פראדוקט אדער סערוויס, וואו זיי האבן באקומען דעם פראדוקט אדער סערוויס ביז דאן.)

•    עס מוז זיין עפעס וואס ענטהאלט אז דער קונה זאל כסדר מוזן קויפן דעם פראדוקט, אדער אז ער זאל אלעמאל דארפן צוקויפן נאך פראדוקטן דערצו.

•    איר מוזסט האבן א פארלאזליכער וועג וואס איר קענט זיך ערלויבן צו דעליווערן אדער פארשפרייטן אייער פראדוקט אדער סערוויס.

•    עס זאלן זיין ענליכע, אדער אויב מעגליך טייערערע פראדוקטן וואס איר קענט פארקויפן צו א צופרידענע קליענט נאך דעם ערשטן סעיל.

•    עס זאל זיין עפעס וואס איר האט ליב און גלייבט אז עס איז ווערד די פרייז וואס איר האט געשטעלט דעראויף.

אויב ערפילט אייער פראדוקט אדער סערוויס די אלע פאדערונגען, דאן זענט איר מיט איין טריט מער פארזיכערט אז איר וועט מצליח זיין אין אייער ביזנעס. הצלחה רבה בכל מעשי ידיכם!

זייער א שיינע SUMMARY הרב קליין איך האב נישט קיין קריטיק אויף די ארטיקל (וואס מאכט זיך גאנץ ווייניג……) איינצעלנע קליינע הגהות ביטע,

1) וואס איר שרייבט “עס מוז זיין עפעס וואס ענטהאלט אז דער קונה זאל כסדר מוזן קויפן דעם פראדוקט, אדער אז ער זאל אלעמאל דארפן צוקויפן נאך פראדוקטן דערצו” דאס מיין איך באלאנגט נישט אין די ‘מוז’ אפטיילונג, דאס איז א גוטע זאך אויב מ’קען אבער נישט א מאסט,

אוודאי מאכט מען די גרינגסטע וועג געלט, און עס איז די גרינגסטע וועג אנצוהאלטן דעם קאסטומער, ווען מ’האט פערישעבל גודס, אדער עקסעסאריס, אבער מ’קען פונקט אזוי מאכן גוט געלט פון דורעבל גודס,

למשל, איינער פארקויפט אפלייענסעס, עס איז טאקע אן איינמאליגע זאך, און דער יעצטיגער קאסטומער וועט מער נישט קויפן ‘דעם זעלבן’ אייטעם ביי דיר אבער אז די געסט גוטע פרייזן און גוטע סערוויס וועט יענער צוריקקומען פאר אנדער אייטעם, און, די וויכטיגסטע, רעקאמענדן אנדערע אויך צו קויפן ביי דיר,

2) נאך איין קליינע הגה, וואס איר שרייבט,
“איר מוזסט האבן א פארלאזליכער וועג וואס איר קענט זיך ערלויבן צו דעליווערן אדער פארשפרייטן אייער פראדוקט אדער סערוויס”
עס קען אפשר אויסזעהן אז איין מענטש מיז אלעס קענען כדי צו זיין אין ביזנעס, ניין, מ’נעמט אויף אנדערע וואס ספעציאלירן זיך אין דעם פאך און זיי טוען דאס פאר אייך, פאר געלט פארשטייט זיך,

3) נאך איין קליינע הגה, וואס איר שרייבט,
“עס זאלן זיין ענליכע, אדער אויב מעגליך טייערערע פראדוקטן וואס איר קענט פארקויפן צו א צופרידענע קליענט נאך דעם ערשטן סעיל”

מוז נישט זיין נאכן ערשטן סעיל דייקא, אמאל קען עס בעקפייערן אז מ’שטופט צו שנעל אנדערע טייערערע פראדוקטן, ווארט צו אביסל ביז די ביזסט שוין קאמפארטעבל מיט דעם קאסטומער און די פיעלסט אז יענער איז קאמפארטעבל מיט דיר, דעמאלטס איז די צייט,

זייער זייער גוטע ארטיקל.
פארשטייט זיך אז נישט אלס קען מען האבן אלע מעלות, מען דארף אבער מאכן די חשבונות און פרובירן די מערסטע מעלות וואס מען קען אריינכאפן.