עס זענען פארהאן פילע ביזנעס לייט וואס קענען נישט זאגן דעם ווארט “ניין.” דאס קאסט זיי אפ שווערע געלטער. פארוואס?
1. קליענט אויסוואל
לאמיר זאגן איר האט א קליענט וואס פארלאנגט אסאך פון אייך און ער איז אייך אויך שולדיג געלט. אויב אזא קליענט וויל ווייטער איינקויפן אויף קרעדיט מוז אייער ענטפער זיין “ניין!” אויב זאגט איר דאס נישט וועט איר נאר פארלירן מער און מער.
2. דער סעילס רוף
אויב איר באקומט אמאל א טעלעפאן רוף פון א צייטשריפט וואס וויל וויסן אויב איר ווילט אדווערטייזן ביי זיי דעם נעקסטן חודש, טראכט אויב דאס איז וואס עס פעלט אויס אין יענער צייט. לייענען אייערע פאטענציעלע קליענטן די סארט צייטשריפט? זענט איר יעצט גרייט צו אדווערטייזן? אויב נישט, איז דער ריכטיגער ענטפער “ניין.” א לעצט- מינוטיגער אומגעפלאנטער עד קאסט אייך אפ מער ווי נישט אריינשטעלן דעם עד אינגאנצן.
אבער… נאך ערגער ווי דעם “יא” איז דער “אפשר.” אויב איר דארפט אין דעם פאל זאגן “ניין” און אנשטאט דעם זאגט איר “אפשר,” דאן ניצט איר סתם אויף טייערע צייט. אויב פרובירט איר צו זיין מענטשליך צום אנדערן מענטש, ניצט איר אויך פון זייער צייט. ווייל צו זאגן “אפשר” צוויי מאל און הערשט נאכדעם זאגן דעם “ניין” איז נאר א צייט-אויסניצער און האט נישט קיין שום תכלית. טוהט אויף א טובה פאר זיך און זיי און זאגט דעם “ניין” גלייך ווען איר זעהט אז דאס איז וואס פארלאנגט זיך פון אייך אין דעם פאל.
געדענקט אז איין “אפשר” קען פארשווענדן א סאך טייערע צייט און אויפברויזן ביידע צדדים. זאגט דעם “ניין” ווען עס פעלט אויס און איר וועט נישט חרטה האבן.