ווינדאוס 8 מעלדונג, קומענדיגע חודש?
ווינדאוס 7 איז קוים 13 חדשים אלט, רעלאטיוו אינג -אין מייקראסאפט טערמינען- און מייקראסאפט לאזט נישט פאלן אפילו קיין רמז איבער די קומענדיגע ווערסיע פון ווינדאוס.
די ניו יארק טיימס האט אבער אנדעקט פון אן אנאנימע קוואל, אז מייקראסאפט וועט מעגליך רעדן די ערשטע מאל דערוועגן קומענדיגע חודש ביי די בארימטע CES שאו אין לאס וועגאס.
פרטים איבער די נייע אפערעטינג סיסטעם זענען כמעט נישט באוויסט, די ביסל וואס מען ווייסט יא איז אז עס וועט פארמאגן א פראגרעם סטאר, ענליך צו וואס מעק וועט האבן, און אז מייקראסאפט ארבעט צו באדייטענד פארשנעלערן די צייט וואס עס דויערט פאר א קאמפיוטער זיך צו עפענען.
די קאנסומער עלעקטראניקס שאו קומט פאר יעדעס יאר און יאנואר, עס איז פארעכנט אלץ די גרעסטע טעכנאלאגיע שאו, רוב נייע טעכנאלאגיע און קאמפיוטער פראדוקטען ווערן געמאלדן פאראויס דארט. (חוץ פון עפל וואס גלייכט צו האלטן סודות און מעלדט אלעס ביי זייערע אייגענע קאנפרענצן).
יאהו זאגט אפ ארבעטער, פארמאכט סערוויסעס, דעלישעס בוקמארקס וועט פארקויפט ווערן
די עקאנאמיע איז שווער פאר יעדן, אבער יאהו גליטשט שוין בארג אראפ פאר יארן. אין די בראשית יארן פון די נעץ איז זי געווען א סימבאל פון די אינטערנעט, אבער זינט גוגל איז אויפגעקומען האט צוביסלעך אלעס אנגעהויבן צו גיין מיטן פיטום אראפ. הגם מיט געוויסע אספעקטן, ווי צב”ש די מספר פון אימעיל אקאונטס, איז זי נאך אלץ די גרעסטע.
זיי האבן שוין געמאכט דראמאטישע שינויים, געטוישט די פירערשאפט, געשלאסן א דיל מיט מייקראסאפט בינג, און נאך. די וואך האט זי געמאלדן אז זי וועט אויפזאגן פיר פראצענט פון איר ארבייטער קראפט און פארמאכן פארשידענע סערוויסעס וואס ברענגען נישט קיין אינקאם.
עס איז ארויסגערינען א טיילווייזע ליסטע צו די פרעסע, צווישן די סערוויסעס איז דערמאנט געווארן אויך Delicious א סאציעלע בוקמארקס סערוויס, וואס פלעגט זיין מער פאפולער, אבער איז נאך אלץ היבש אקטיוו. וואס האט טאקע אויפגעברענגט ווינדער ביי מענטשן.
שפעטער האבן זיי טאקע געמאלדן אז דעלישעס בוקמארקס וועט נישט ווערן פארמאכט, נאר פארקויפט ווערן, ווייל יאהו וויל זיך מער קאנצעטרירן אויף זייער עיקר סערוויסעס ווי סיערטש, זייער האום פעידזש און אימעיל.
וואס די סוף פון יאהו וועט זיין איז שווער צו וויסן, אבער עס קוקט נישט אויס צו גוט…
א גוטע זאך ווערט בעסער, מייקראסאפט סעקיוריטי עסענטשעלס 2
מייקראסאפט סעקיוריטי עסענטשעלס אנטי וויירוס (אין קורצן MSE) איז בלי ספק מייקראסאפט’ס בעסטע פרייע פראדוקט. אסאך מאל איז שווער זיך צו גלייבן די אויגן ווען מען זעט ווי עס ווערט אויסגערימט דורך אזעלכע מבינים וואס האבן נאך אין זייער לעבן נישט געשאנקן מייקראסאפט א גוט ווארט.
יעצט האט מייקראסאפט ארויסגעגעבן א נייע ווערסיע, ווערסיע 2.0 . די עיקר חידוש איז א טעכנאלאגיע וואס טרעפט וויירוסעס נישט בלויז דורך פארגלייכען די פייל צו א דאטא בעיס פון באוויסטע וויירוסעס – אזוי ווי ביז היינט. נאר עס שאצט אויך אפ לויט די אויפפירונג און כאראקטער שטריכען פון די פייל, צו עס קוקט אויס ווי מאלוועיר. אזוי ארום קען עס טרעפן גאר נייע וויירוסעס וואס זענען נאך נישט אנדעקט און קלאסיציפירט געווארן. אנדערע פירמעס ניצן שוין לאנג די טעכנאלאגיע.
עס זענען אויך צוגעקומען נאך עטליכע קליינע פארבעסערונגען. אט איז א לינק צו דאונלאדען.
http://www.microsoft.com/security_essentials
אפערע 11
מיר האבן נישט לאנג צוריק געמאלדן אז אפערע 11 איז אין בעטא, און אט איז עס שוין פערטיג. אפערע 11 איז אפיציעל ערשינען די וואך.
ווי געשמיסט האבן זיי צוגעלייגט אין ווערסיע 11 סופארט פאר עקסטענשאנס, אין די קורצע צייט איז שוין צוגעקומען איבער צוויי הינדערט עקסטענשאנס. עס איז טאקע ווי א טראפן אין ים אקעגן פייערפאקס און אפילו גוגל’ס קראום, אבער עס איז א גוטע התחלה.
זייענדיג די ערפינדער פון “טעבס” (וואס אלע בראוזערס האבן עווענטועל נאכגעמאכט), האט אפערע יעצט צוגעלייגט א פיטשער וואס רופט זיך “סטעקס” דאס הייסט אז מען קען מאכן א הויפן (stack) פון טעבס וואס האבן א שייכות, צו פארגרינגערן צו האלטן חשבון און באהאנדלען מערערע טעבס אויף אמאל.
חוץ פון דעם האט זיך אפערע אירע אייגענארטיגע מעלות און אויסזען, וואס זענען באמת נישט אוועקצומאכן, אבער משום איזה סיבה געט זיך עס נישט איין. אדרבא פרובירט עס אליינס אויס און לאזט הערן אייער מיינונג אין די קאמענטארן.
http://www.opera.com/browser/download