מען קען שוין אריבערברענגן אייגענע טעלעפאן נומער צו גוגל וואויס
גוגל וואויס איז א פארגעשריטענע פרייע וואויס-מעיל סערוויס פון גוגל. עס צילט צו זיין די איינציגסטע טעלעפאן נומער וואס איר געט ארויס פאר מענטשן, און גוגל וואויס וועט טרענספערן די קאל צו אייער סעלפאון און/אדער אנדערע טעלעפאן ליינס. עס האט נאך אסאך פארגעשריטענע פיטשערס און מעלות.
די חסרון דערפון איז אבער געווען, אז איר האט נישט געקענעט טרענספערן אייער ביז יעצטיגע טעלפאן נומער צו גוגל וואויס, גוגל גיבט טאקע א פרייע טעלפאן נומער צו ניצן מיט די סערוויס. אבער קיינער זיכט נישט צו טוישן א נומער וואס מען ניצט שוין יארן לאנג און פונדאסניי איינמעלדן אלע באקאנטע פון די נייע טעלפאן נומער.
פארגאנגענע וואך האט גוגל צוגעלייגט די לאנג ערווארטעטע מעגליכקייט, פון טרענספערן אייער ביז יעצטיגע נומער צו גוגל וואויס. פאר די איינמאליגע אפצאל פון צוואנציג דאלאר.
נעמט אין אכט עטליכע פונקטן פאר איר טוט למעשה:
דערווייל קען מען נאר טרענספערן סעלפאון נומערן און נישט נומערן פון א “לענד ליין” (טראדיציאנאלע נישט-ווייערלעס טעלפאן ליין).
אויב איר האט א סעלפאון קאנטראקט (נישט פרי-פעיד) פלען, און איר טרענספערט די נומער אוועק פון אייער יעצטיגע קעריער, וועט זיך די אקאונט אויפלעזן און איר וועט מעגליך דארפען צאלן א קנס פארן אפלאזן די קאנטראקט.
איר וועט דארפן עפענען א צווייטע סעלפאון פלען מיט א נייע נומער ווי אהין צו טרענספערן די קאלס פון גוגל וואויס.
ווען איר טרענספערט א נומער צו גוגל וועט איר פארלירן די ביז יעצטיגע גוגל נומער.
עס איז דערווייל נישט אוועליבעל פאר נייע גוגל אקאונטס, נאר פאר עקזיסטירענדע.
פאר מער אינפארמאציע דערוועגן זעט דא
http://goo.gl/OTUQS
ווירטואלע פארברעכן, “עכטע” רעוואלווערס
אין די טעג נאך די “וויקי ליקס” סומעטאכע האבן קאמפיוטער העקערס -שטיצער פון וויקיליקס- אטאקירט די וועב זייטלעך פון “פעיפאל” און “מעסטער קארד” און נאך פירמעס, אלץ נקמה פארן אפשפארן די אקאונטס פון וויקי ליקס, די אטאקעס האבן נישט גורם געווען קיין פערמענאנטע שאדן, נאר אז די וועב זייטלעך זאלן נישט זיין און באניץ פאר א קורצע צייט.
פארשטייט זיך אז זייענדיג העקערס האבן זיי אנגענומען פארשידענע מיטלען צו פארדעקן זייערע פינגער אפדרוקן , אז די רעגירונג זאל נישט קומען אויף זייערע שפירן.
די וואך, אין די פריע פארטאגס שטונדען האט די FBI אדורכגעפירט איבער פערציג הויז רעוויזיעס און קאנספיקירט מעגליכע באווייזן אויף די פארברעכן.
איינער פון די אינגע העקערס האט זיך ביטערליך אפגערעדט אויף א אנליין פארום, אז מען האט אויפגעבראכן די טיר זעקסע פארטאגס, און ער דערזעט פאר זיך צוויי “עכטע” רעוואלווערס געצילט אויף זיין ריכטונג… ער שרייבט, זיי האבן קאנפיסקירט אלע מעגליכע באווייזען צום פארברעכן, קאמפיוטערס טעלעפאנען סי דיס און פלעש דרייווס, און זיך אויפגעפירט אן קיין רעספעקט צו מיין פאמיליע. ער האט אויך ארויפגעלייגט א בילד פון די איינגעבראכענע טיר אויפן פארום.
עס דארף דינען ווי א דערמאנונג אז זאכן וואס מען טוט אנליין קען האבן “עכטע” נאכפאלגן. און מען זאל זיך נישט איינרעדן פאר איין מינוט אז מען איז אנאנים.
מייקראסאפט’ס פארדינסטן העכער ווי ערווארטעט
די וואך האט מייקראסאפט פארעפענטליכט זייערע פארדינסטן פון די לעצטע קווארטער פון 10′, מיט 19.95 ביליאן דאלער און פארדינסטן איז עס איבערגעשטיגן די פאראויסגעשאצטע 19.2 ביליאן דאלער.
מייקראסאפט שרייבט צו די רווחים צו אפיס 2010 וואס פארקויפט זיך זייער גוט, און האט געהאט זייער א גוטע אפקלאנג אין די גאס, ענליך צו ווינדאוס 7. ווינדאוס 7 גופא האט זיך פארשטייטערט לעומת די פארגאנגענע יאר מיט בלויז א צווייפראצענטיגע וואוקס, וואס איז געווען ערווארטעט.
מייקראסאפט האט אויך געזען א שיינע בלי אין זייער ענטערטעינמענט אפטיילונג, די נייע “קינעקט” געים קאנטראלער, וואס איז א רעוואלציאנערישע וועג ווי אזוי צו קאנטראלירן דעם קאמפיוטער דורך דעם קערפער, האט זיך ארויסגעשטעלט פאר א געוואלדיגע הצלחה.
מייקראסאפט האט זיך לעצטענס זייער שיין צוריקגעכאפט נאך די דורכפעלער מיט ווינדאוס וויסטא, אפיס 2007, און MSN סיערטש. סיי ווינדאוס 7 און סיי אפיס 2010 האבן זיך ארויגעשטעלט צו זיין אויסגעצייכענטע פראדוקטן, בינג וואקסט אויך באדייטענד, און איז די ערשטע ערענסטע קאמפעטישן פאר גוגל. און אפילו ווינדאוס פאון 7 ווערט באטראכט אלץ א שטארקע פראדוקט, הגם עס איז ווייניגער קלאר צו עס וועט לסוף ווערן א ערענסטע שפילער אין די מאביל מארקעט.
מייקראסאפט האט אויפגעוויזן אז זי איז ווייט נאך נישט קיין פארגאנגענהייט, און אז סוף כל סוף לערנט זי זיך פון אירע פעלערס..