זענט איר אמאל אויפגעשטאנען אינדערפרי צו די קול פון פייגלעך וואס זינגען אינדרויסן? איר שטייט אויף, לערענט א בלאט גמרא, דאווענט שחרית מיט א רואיגקייט, און עסט א פיינער פרישטאג מיט א געשמאקע גלעזל קאווע. איר גייט דערנאך צו דער ארבעט און טוט אויף אלעס וואס איז אויף אייער ליסטע. איר האט פונקט גוטע שמועסן מיט אייער מיט-ארבעטער און צו דעם אלעם איבערראשן זיי אייך מיט א טעלער פון פריש געבאקענע קוכן נאר ווייל זיי האבן אזוי הנאה פון אייער ארבעט. א גוטער טאג, נישט אזוי?
אפשר איז דאס בכלל נישט אייך. אפשר האט איר בכלל נישט א סדר. אפשר זענט איר אויפגעשטאנען און באמערקט אז אייער זייגער האלט נאך ביי 12:00 ביינאכט ווייל דער באטעריע איז געגאנגען שלאפן און אייך מיטגעצויגן אין א טיפער שלאף. איר האט פונקט גענוג צייט מיטנעמען עטליכע צוברעקלטע קוכן. איר האט צען מינוט ביז ווען איר דארפט זיין ביי דער ארבעט און נאך א האלבע שעה פון פארן. אבער, ווען איר צינדט אן דער קאר באמערקט איז אז דער גאז טאנק איז ממש ליידיג. נאכן שטיין אין די רייע אין דער סטאנציע, כאפט איר זיך אז איר האט געגעבן אייער לעצטע פאר דאלער פאר א משולח אין שוהל. ווען איר קומט ענדליך אן צו דער ארבעט אן אן אטעם, שטייט דער בעל הבית ביים טיר (פונקט היינט האט ער געמוזט קומען באצייטענס?!) און ער האלט אייך פאר וועגן אייער פארשפעטיגונג. א טעלער פון פריש-געבאקענע קוכן וואלט יעצט שיין געווען, איז באשטעלט איר א טאץ פון שאקאלאד קוכן אבער ווען עס קומט אן זעהט איר אז מען האט אייך געשיקט ניס קוכן און איר זענט העכסט אלערגיק צו יעדער סארט ניס. הערט זיך נישט צו גוט, ריכטיג?
די מעגליכקייט צו האבן אזא מין טאג איבער דער טאג וואס ווערט אויבן ציטירט איז פיל גרעסער. ווייסט איר אז די אלע שוועריגקייטן אדער הצלחות אין דער ארבעט האבן גארנישט צו טוהן מיט אייער קאר, זייגער, ארבעט, אדער מזל? זעהט פארוואס:
• אייער צוגאנג ביים אויפשטיין שטעלט דער טאן פארן טאג
דאס איז א שווערער לימוד אבער דער ערשטער שעה אינעם טאג איז אזוי וויכטיג צו אייער עקספעריענס און אזוי וויכטיג צו די מאס וויפיל איר קענט אויפטוהן ווייל עס שטעלט פאר אייער צוגאנג פאר דעם גאנצן טאג. אויב האט איר א ספק אין דעם, פרעגט זיך פארוואס עס זעהט אויס צו אייך אז ווען איר “שטייט אויף אויף דער לינקער זייט,” איז אייער גאנצער טאג צופארן. און פארוואס איז עס אז ווען איר שטייט אויף צו די לידער פון די פייגלעך, שפירט איר ווי איר ווילט זינגען דעם גאנצן טאג?
• אייער צוגאנג עפעקטירט אייערע געדאנקען
ווען איר שטייט אויף אינדערפרי, זענען אייערע געדאנקען אטאמאטיש מער פריי און נישט איינגעצוימט. דאס איז דער סיבה פארוואס מען עצה’ט אלעמאל איינעם וואס האט א פראבלעם אז ער זאל דאס “איבערשלאפן.” ווען מען ערוועקט זיך, זענען די מחשבות פיל קלארער.
אבער דאס איז נאר אויב איר טוט דאס ריכטיג. מערסטנס מענטשן טוהן עס אבער נישט. זיי שטייען אויף און זיי ווילן באמת נישט, ספעציעל אויב זיי זענען נישט פון די “צופרי פויגלעך.”
עס גאר וויכטיג צו טראכטן פאזיטיווע געדאנקען גלייך ביים אויפשטיין. דאן איז דער בעסטער צייט צו טראכטן און דאס וועט פעסטשטעלן דעם גאנג פון אייער גאנצער טאג. איר קענט דאס באמת טוהן אין יעדן צייט פון טאג, אבער עס איז נישט דא נאך אזא גרינגע און עפעקטיווע צייט דערפאר ווי אינדערפרי.
פרובירט צו טוהן ווי פאלגנד “מארגן אינדערפרי”
ווילט איר פארמערן אייערע שאנסן צו האבן א געלונגענער טאג? געבט זיך עטליכע רוהיגע מינוטן צו אויסשטעלן אייער טאג אין אייער מח. איידער איר הייבט אן דעם טאג, ארגאנאזירט אייערע געדאנקען פאר די טאג. טראכט פון וואס איר ווילט אויפטוהן. נאך בעסער, מאכט א ליסטע פון די זאכן א נאכט פריער, און דערנאך טראכט זיי איבער דעם נעקסטן אינדערפרי. דורך אנהייבן דעם טאג מיטן רעכטן פיס, וועט איר בעזרת ה’ זעהן פיל הצלחה דורכאויס.
דער אידישער לעבנס-שטייגער איז גאר אויסגערעכנט, א איד ווייסט אז די ערשטע ווערטער וואס ער זאגט ארויס פון זיין מויל ביים אויפשטיין איז “מודה אני.” ער דאנקט דעם אייבערשטער און הייבט אן דעם טאג אויף א פאזיטיווער אופן. און אויב ער האט א סדר אינדערפרי פון תורה ותפילה, ווערט ער אנגעפילט מיט א טיפער סיפוק און הנאה און דער גאנצער טאג האט א צווייטער פנים. אשרינו מה טוב חלקינו!
דער ערשטער שעה, דער יסוד פון טאג