גוגל באשולדיגט: מייקראסאפט בארויבט אונזער סיערטש רעזולטאטן
עס איז שוין נישט קיין נייעס היינט ווען גרויסע טעכנאלאגיע פירמעס באשולדיגן זיך איינע די אנדערע אין צורויבן און נאכמאכן יענעמס איידיעס און אויסטרעפן. געווענליך איז עס קיינמאל נישט אזוי קלאר און רובא דרובא קומען נישט אן אין געריכט.
אבער דא רעדט מען שוין פון א פיל גרעסערע פארברעך, גוגל באשולדיגט אז מייקראסאפט טוט נישט בלויז נאכמאכן זייער טעכנאלאגיע, נאר טוט פשוט או פראסט קאפירן גוגל סיערטש רעזולטאטן! די באוואוסטע גוגל אינזשעניר מעט קאטס האט געשילדערט ווי אזוי גוגל האט שוין לאנג אנגעהויבן צו פארדעכטיגן אז די בינג סיערטש רעזולטאטן זענען זייער ענליך צו גוגל’ס. גוגל האט דאן דורכגעפירט פארשידענע פראבעס און באוויזן צו דאקומענטירן די באווייזן שווארץ אויף ווייס.
גוגל’ס באווייזן זענען זייער שטארק, די פראבע איז צוגעגאנגען ווי פאלגענד, גוגל האט איינגעפלאנצט פאלשע רעזולטאטן פאר אויפגעמאכטע ווערטער וואס געפינען זיך בכלל נישט אויף די וועב, למשל זיי האבן פראגראמירט אז גוגל זאל ווייזן די היים זייטל פון די RIM פירמע ווען מען זוכט די פאלגענדע בוכשטאבן “mbzrxpgjys” די בוכשטאבן האבן נישט קיין מיינונג און אוודאי האט עס נישט קיין שום פארבינדונג מיט RIM. אין בלויז 13 טעג שפעטער האט בינג אנגעהויבן צו ווייזן די RIM זייטעל אלץ רעזולטאט פאר א סיערטש אויף די אויבנדערמאנטע בוכשטאבן.
מייקראסאפט טוט קאטאגאריש אפלייקענען די באשולדיגונגען, זיי האבן פארעפענטליכט א סטעיטמענט ווי זיי האבן טרוקן געמאלדן “מייקראסאפט קאפירט נישט גוגל’ס סיערטש רעזולטאטן”. גוגל האט אויסגעדריקט שטארקע אנטוישונג אז מייקראספט וויל נישט מודה זיין טראץ אזעלכע אפענע באווייזן.
מייקראסאפט אפיס וועב עפס וועט בקרוב זיין עוועליבעל איבער די וועלט
גוגל דאקס איז באוואוסט אלץ א פרייע, וועב באזירטע “מייקראסאפט אפיס” אלטערנאטיווע, ווייניג ווייסן אבער אז מייקראסאפט אליין שטעלט אויך צו א פרייע אלטערנאטיווע צו זייער אייגענע פראדוקט, וואס איז אויך וועב באזירט און אויך פריי.
עס איז אינגאנצן עטליכע חדשים אלט, עס איז ערשינען אינמיטן זומער און אויך נאר אין געציילטע לענדער, עס איז היבש ענליך אין אויסזען צו מייקראסאפט אפיס 2010, פארשטייט זיך אז עס האט נישט אזויפיל פיטשערס, אבער די אויסזען איז רייכער און געשמאקער פון גוגל דאקס.
נאך א געוואלדיגע מעלה, עס פארשטייט זיך זייער גוט מיט די געהעריגע מייקראסאפט אפיס פראגרעמס, מען קען ניצן די זעלבע פייל סיי אין די דעסקטאפ פראגרעם און סיי אין די וועב ווערסיע, איין קליק אין די אנליין ווערסיע עפענט די דאקומענט אין ווארד אדער עקסעל. אזוי אז מען קען ניצן די געהעריגע דעסקטאפ פראגרעם ווען מען האט צוטריט דערצו און בשעת הדחק קען מען עס זען און עדיטן אין א בראוזער פון סיי וועלכע קאמפיוטער.
די וואך האט מייקראסאפט ערמעגליכט צוטריט דערצו צו באניצער פון נאך 150 לענדער צווישן זיי חלקים פון אייראפע און ארץ ישראל. קומענדיגע חודש וועט עס שוין זיין אוועליבעל איין די גאנצע וועלט. דאס איז גוטע נייעס פאר ביזנעס באניצער וואס רייזן אפט איבער די וועלט.
ניצט איר גוגל דאקס אדער מייקראסאפט אפיס וועב עפס? וואס גלייכט איר בעסער? לאזט הערן אייער מיינונג אין די קאמענטארן.
מאזי ענדיגט אנלימיטעד בעק-אפ פלענס
מאזי איז געווען פון די ערשטע און איז היינט פון די גרעסטע און פאפולערסטע אנליין בעקאפ פירמעס. א וויכטיגע פאקטאר צו זייער סוקסעס איז געווען די “אנלימיטעד בעקאפ” פלאן, פאר בלויז 5 דאלאר א חודש האט מען געקענט סטארעזשן א אומבאגרעניצטע קוואנטום פון פיילס. (עס איז אבער געווען באגרעניצט צו א איינצעלנע קאמפיוטער).
די וואך האבן זיי געמאלדו א דראסטישע טויש, עס וועט מער נישט זיין קיין אנלימיטעד פלאן, פאר 6 דאלער א חודש באקומט מען בלויז 50 ג”ב, אין היינטיגע צייטן וואס צוויי טעראבייט הארד דרייווס איז א נארמאלע ערשיינונג, מיינט עס אז מען וועט מער נישט קענען בעקאפן די גאנצע הארד דרייוו, נאר זיין געצוואונגען צו אויסקלויבן בלויז די סאמע וויכטיגסטע פיילס צו בעקאפן.
מאזי ערקלערט, אז טאקע צוליב די גרויסע הארד דרייווס האלטן מענטשן אסאך מער דאטא ווי אמאל און זיי קענען עס מער נישט נאכקומען, און הגם די הארד דרייווס זענען ביליגער פאר זיי אויך, זענען די פרייזן פון עלעקטעריק און טרענספערן דאטא (bandwidth) בכלל נישט געפאלן, אדרבא עס איז ארויף.
זיי זאגן אז זיי זענען נישט באזארגט אז מענטשן וועלן דעפעקטירן צו אנדערע פירמעס וואס שטעלן נאך יא צו אנלימיטעד בעקאפ, ווייל לויט זיי וועלן אלע פירמעס זיין געצוואונגען צו אנולירן די אנלימיטעד פלענס פריער אדער שפעטער.
די אלע וואס האבן שוין יעצט א אנלימיטעד פלען וועלן קענען בלייבן דערמיט ביז ווי לאנג די קאנטראקט לויפט אויס.
מייקראסאפט האטמעיל נייע פיטשער: איינמאליגע אימעיל אדרעס
האט איר זיך שוין אנגעשטויסן אין די פראבלעם? איר מוזט זיך אויפשרייבן צו א געוויסע וועבזייטל אבער איר וואלט ווען זייער נישט געוואלט ארויסגעבן אייער אימעיל אדרעס. מייקראסאפט האט יעצט ציגעלייגט א נייע פיטשער אין אלע האטמעיל אקאונטס וואס ערמעגליכט אייך צוצולייגן א נייע אימעיל אדרעס וואס וועט אנקומען אין אייער יעצטיגע אקאונט. אויב הייבט איר אן צו באקומען ספעם אדער ווילט מער נישט הערן פון יענעם, מעקט אויס די אדרעס פון אייער אקאונט.
גימעיל און האטמעיל האבן שוין פון לאנג די פיטשער פון צולייגן בוכשטאבען מיט א + צו אייער עקזיסטירענדע אדרעס און דערנאך פילטערן אימעיל וואס קומט אריין דורך דעם, אבער א ספעמער קען עס גרינג אראפנעמען און בלייבן מיט די ארגינעלע אדרעס.