ווינדאוס פאון 7
היינט מאנטאג 9:30 אינדערפרי וועט פארקומען די “לאונטש” דאס הייסט די עמטליכע ערשיינונג פון ווינדאוס פאון 7.
מייקראסאפט פלאגט זיך זייער די לעצטע פאר יאר מיט “ווינדאוס מאביל”. זי איז געווען אויף די מארק פאר עפל און גוגל א היבשע פאר יאר, און דאך האבן זיי איר איבערגעיאגט אין א אויגן בליק. מייקראסאפט’ס שעיר אין די סמארטפאון מארקעט איז שוין כמעט אין די איינצעלנע ציפערן.
אבער מייקראסאפט קוקט אויס אנטשלאסן צוריקצודרייען דאס רעדל, לויט אלע מבינים איז עס יעצט זייער לעצטע טשאנס, אדער וועט עס יעצט ארבעטן, אדער פארלאזן זיי די מאביל מארקעט אויף שטענדיג.
מיר וועלן בלי”נ מעלדן א סך הכל פון די נייעס און חידושים וואס וועלן דארט אנטפלעקט ווערן, אין די קומענדיגע וואך.
אינטעל קויפט אפ מיקעפי
עס איז שוין טאקע נישט אזוי ניי, אבער עס איז נאך אלץ גרויסע נייעס, די “טשיפ” פירמע אינטעל האט פאר עטליכע וואכן צוריק אפגעקויפט די “סעקיוריטי סאפטווער” ריז “מיקעפי” McAfee פאר 7.7 ביליאן דאלער קעש.
מיקעפי איז פון די סאמע גרעסטע סעקיוריטי “סאפטווער” פירמעס, באקאנט באקאנט ביים המון עם, מיט זייערע אנטי וויירוס אין פייערוואל פראדוקטן. חוץ פון דעם זענען זיי זייער גרויס אין די ענטערפרייז מארקעט.
אינטעל פון די אנדערע זייט, איז די קעניג ווען עס קומט צו “הארדוועיר”, נעמליך קאמפיוטער פראסעסארס און טשיפס.
עס איז נישט קלאר די סיבה פון די אפקויף, מעגליך עס איז א ריין פינאנציעלע סטראטעגיע, מיקעפי איז זייער א פראפיטבארע פירמע, און אינטעל האט אסאך איבעריגע קעש. פון די אנדערע זייט איז דא וואס שפאקולירען אז אינטעל פלאנט אריינציבויען אין זייערע טשיפס מער סעקיוריטי פיטשערס וואס וועט זיין געבויט אויף מיקעפי’ס טעכנאלאגיע.
מיקעפי וועט ווייטער פונקציאנירן אלץ זעלבשטענדיגע פירמע אונטער איר אייגענע נאמען. עס ווערט נישט ערווארטעט קיין שום וועזנטליכע טוישן אין די אנטי וויירוס פראדוקטען פאר די ענד באניצער.
אריינלאגן צו עטליכע גימעיל אקאונטס אויף אמאל
ווער פון אונז האט דען נישט מער פון איין גימעיל אקאונט? עס איז דאך שוין א אלטע כלל, אז מען טיילט אומזיסט, נעמט מען מיט ביידע הענט.
די פראבלעם איז נאר, אז אזוי ווי ביי יעדע אנדערע וועב זייטל, איז נישט מעגליך געווען צו זיין אריינגעלאגט אין מער ווי איין אקאונט אויף אמאל, אפילו אין באזונדערע “טעבס”. ווי נאר מען האט אריינגעלאגט אין א נייע אקאונט, האט גימעיל אויטאמאטיש דיסקאנעקטד די פריערדיגע (וויבאלד א וועב זייטעל דערקענט נאר די בראוזער נישט קיין חילוק וועלכע “טעב” מען ניצט).
לעצטענס האט גוגל אין א בריליאנטענע אינדזשענירונג שריט, באוויזען צו ערמעגליכן גימעיל צו האלטן אפן עטליכע אקאונטס אין באזונדערע טעבס. פאר מיר פערזענליך איז עס געוואלדיגע הילף. שוין שווער צו טראכטן ווי אזוי איך האב פונקציאנירט אן דעם.
אדרבא, פרובירט עס אליין.
1)לאג אריין אין איין גימעיל אקאונט.
2) עפן א נייע טעב, און גיי צו גימעיל, עס וועט אויטאמאטיש עפענען די יעצטיגע אפענע אקאונט.
3)לאגט ארויס, און לאגט פריש אריין מיט די צווייטע אקאונט.
4)די ערשטע אקאונט איז נאך אלץ אפען, גייט ארום פון איין צו די צווייטע אן קיין פראבלעמען.
א איבער דאזע פון טאבלעטן
ווער האט דען נישט געהערט פון די “אייפעד” טאבלעט פון “עפל”? סקעפטיקער (וגם אני הקטן בתוכם) האבן עס שפאסיג באצייכנט ווי “א “אייפאד” מיט א 7 אינטשיגע סקרין”, וואס ברענגט נישט קיין שום אייגענע חידושים. למעשה האט זיך עס ארויסגעשטעלט ווי א מעכטיגע הצלחה, און עס פארקויפט זיך אין די מיליאנען. (איך האב טאקע נישט געטוישט מיין מיינונג דערוועגן, אבער איך מוז מודה זיין אז עס איז געווען א גוטע ביזנעס באשלוס פון עפל)
מיט הצלחה איז דאך זיך נישט שייך צו דינגען, האבן טאקע תיכף אנגעהויבן ארויסגעוואקסן ענליכע “טאבלעטן” פון פארשידענע פירמעס, ובתוכם אזעלכע ריזן ווי דעלל און סעמסאנג. רוב דערפון באזירט אויף די גוגל “אנדרואיד” אפרעטינג סיסטעם, (וואס איז “אפען סאורס” און קאסט נישט קיין געלט).
די ריזן פירמע HP האט אויך געמאלדן א טאבלעט, געבויט אויף זייער אייגענע (אפגעקויפט פון “פאלם”) “web os” אפרעטינג סיסטעם. און אויך איינס מיט ווינדאוס 7 ( די אלגעמיינע ווינדאוס, נישט “ווינדאוס פאון” 7).
נישט צו בלייבן אינטערשטעליג, האט יעצט RIM די פראדוצירער פון בלעקבערי געמאלדן א טאבלעט באזירט אויף די בלעקבערי אפרעטינג סיסטעם, מיט די נאמען “פלעי בוק”. עס פארשפרעכט מולטי פראסעסינג, ביזנעס אריענטירט, און סופארט פאר אדאבי פלעש. די דריי פונקטען מיט וואס עפל איז שוואך.
עס ווערט ערווארטעט אין די ערשטע פערטל פון יאר 2011 למספרם.
ביז דאן וועט שוין עפל מן הסתם האבן געמאלדן א נייע ווערסיע פון פון די אייפעד…
נייע בילדער פארמאט פון גוגל
JPEG (מען זאגט עס ארויס “דזשעי-פעג”) איז די מערסט באנוצטע “פייל פארמאט” פאר בילדער אין די וועלט, די עיקר מעלה דערפון איז די אויסערגעווענליכע קליינע פייל סייז וואס עס פראדוצירט, אקעגן אנדערע בילדער פארמאטן. אבער עס איז שוין היבש פארעלטערט, עס איז ערשינען אזוי פרי ווי אין יאר 92′, וואס ביי טעכנאלאגיע איז עס פאררעכענט אלץ גאר אלט.
גוגל וואס האט זיך גענומען פאר א מיסיע צו פארשנעלערן די אינטערנעט (מיט די חשבון אז אזוי וועלן מענטשן מער זיך באניצען מיט זייערע פראדוקטען), האט יעצט אפירגענומען די JPEG פארמאט, וויבאלד רוב בילדער אויף די וועב זענען אט די פארמאט. זיי האבן פעסטגעשטעלט אז %65 פון דאטא אויף די וועב איז בילדער, און פארשטייט זיך אז מינומיזירען די סייז פון די בילדער, קען באדייטענד רעדוצירן די צייט וואס עס דויערט צו דאונלאדן וועב בלעטער. ספעציעל אויף שטאטערע נעטווארקס.
זענען זיי אויפגעקומען מיט א נייע פארמאט מיטן נאמען WebP (עס ווערט ארוויסגעזאגט “weppy”) וואס לויט ווי זיי טענה’ן פראדוצירט עס בילדער מיט %40 קלענערע סייז ווי JPEG ביי א ענליכע קוואליטעט.
און טעאריע איז עס פיין און וואויל, זיי זענען אבער נישט די ערשטע, מייקראסאפט פרובירט שוין עטליכע יארן מיט א פארמאט JPEG XR וואס האט אפילו מער מעלות פון גוגל’ס פארמאט, די פראבלעם איז נישט אויפצוקומען מיט א אלטערנאטיוו, נאר באווייזען איבערצורעדן די גאנצע וועלט זיך צו טוישן, סאפטוועיר און הארדווער פראדוצירער. און דאס איז נישט גרינג, ווייל קיינער וויל נישט אריילייגען קיין געלט און כח א נייע פארמאט וואס קיינער נוצט (נאך) נישט.
אייגענטליך האב איך שוין לאנג צוריק געהערט אמאל פון א קלוגן איד “די וועלט, קען מען נישט טוישן”..