מוצאי שבת קודש הוד שבהוד ירושלים ד'אמעריקא
אן אנגעצויגענע שטימינג האט געהערשט ביים ווערעצקיער צדיק אין שטוב, די צדיק זיצט שוין שעות איינגעשפארט ביי זיך אין שטוב בשעת ווען אינדערויסען גיסט זיך אמפערס טללים רעים מן השמים
און ס'שטייען אלפי רבבות ישראל ווארטענדיג אז דער צדיק זאל ארויס קומען צינדען די הדלקה לכבוד התנא האלקי, אבער אין קול ואין עונה. די מקורבים שטופען זיך צו ביים לעכל און קוקען צו די מחזה נורא. דער צדיק זיצט פארפלאמט, די צימער איז פול מיט רויעך פונ'ם לילקע ציבעך, אין ער פירט א דין ודברים מיט כביכול אליינס. ס'שוין אריבער עטליכע שעה זייט זמן מוצאי שבת קודש און די שלאקעס רעגן הערן נישט אויף צו גיסען. שערי שמים ננעלו וארובות השמים נפתחו, די רעגען הערט נישט אויף, און דא שטייען רבבות יודען אנשים נשים וטף בכליון ענים מי יגלה עפר מעיניך רבנו הקדוש אז מ'זאל שוין זוכה זיין צו די תרעין פתוחין. רבינו הקדוש נעמט זיך מיט אן עזות דקדושה און רופט אויס מיט פאר'ן גאנצען פמליא של מעלה, אז בזכות אבותיו הקדושים אז ס'וועט נישט גיין מיט גוט'ן וועט זיין מיט בייזן, אויב ס'וועט נישט זיין אויפ'ן מינוט קיין ועצר את השמים וועט ער מוזען צוקומען נישט מער נישט ווייניגער צו ר' שמעונ'ען אליינס, וכדי ר' שום'ען לסמוך עליו בשעת הדחק, און מ'וועט דארפ'ן פושט ידים זיין הונדערטער טויזענטער שטיקלעך קנאבל אויף א מוצאי שבת קודש פועל'ן פאר יודישע קינדער נישט קיין חילוק וואס די נאכווייען פון די אלע קנאבל וועט דא אנדרייען.
ס'האט נישט געדוירט קיין רגע כמימרא אין די טיר פון צדיק'ס צימער געט זיך אן עפען אויף ברייט אין דער רבי אליינס געט א שפאציר ארויס מיט געאיילטע שריט ווען א צהלות פנים איז נסוך על פני הקודש. "מ'האט געפועל'ט!" שרייעט ער אויס, "אין הימל האט מען געזען אז תורה לא בשמים הוא, אין ס'איז בעסער צו איבער צו לאזען די האקעלע ענינים פאר'ן בי"ד של מטה".
מיד פתח את פיו בקול רעש גדול לשם יחוד!
חסידים דערציילען אז ווען מ'איז שפעטער אריין אין צדיק"ס היכל האט מען געזען מאסן היינטעכער און פאטשיילעס פון אלע ברענדס, סחורה'ס, און סייזעס אנגעווארפן אויפ'ן ערד, ומיד איז געווארן א פשטו ידיכם ווען א יעדער האט געוואלט א משמרת אות לבני מרי, חפצו של צדיק, וואס מיט דעם האט ער אוועק געווישט די טונקעלע וואלקענעס נאך חצות הלילה אין יענעם געשפאנטען מוצש"ק ל"ג בעומר תשע"ז לפ"ק.
דער נעשכיזער איז געווען א גוטער יוד, און ראזשינקעס מיט מאנדלען זענען גוט...
