שפאציר איך אזוי אויף דרייצנטער עוועניו און איך ווארף א זייטיגן בליק אויף'ן ניוז סטענד אויף ניין אין פערציג'סטע גאס זעה איך אז עס ליגט נאך דארט דעם אלטן וועקער מיטן גרויסן בילד פון היילמאן... נעה... טראכט איך צו מיר, פארוואס האט ער נאך אלץ נישט די נייע?? שוין נישטא קיין ברירה... מען גייט צוריק אהיים...
גייט אדורך פינף מינוט און מען געט זיך א כאפ אריין אין קאווע שטיבל, ווי מען זעהט א פרישן מעלדונג פון ר' ראובן
ראובן האט געשריבן:דער וועקער איז שוין דא צו באקומען אין בארא פארק, מאנסי און קרית יואל.
דערציילט אייערע פריינט אז זיי זאלן איינהאנדלען אן אויסגאבע וואס זיי ווילן נישט פארפאסן!
ספאנטאן הייבן מיינע פינגער אהן צו קוועטשן אויף די קנעפלעך פונעם קי-באורד, וועלנדיג צוריק שרייבן פאר ראובן אז איך בין יעצט געוועהן ביים ניוז סטענד און די וועקער איז נישט דארט, אבער נאכ'ן איבער טראכטן די נושא איז באשלאסן געווארן אז מען גייט נאכאמאל קוקן, אפשר איז פונקט די וועקער אנגעקומען אין די לעצטע פאר מינוט...
אומר ועושה, מען לאזט זיך ארויס אין וועג, מען האלט שוין ביי 49 צווישן 14 און 13, עס גייט אדורך א סקרוך אין די ביינער... אויב וועט איינער באמערקן וואס איך נעם ביים ניוז סטענד קען עס נאך קאסטן די מוסדות פאר די קינדער אדער די דזאב... מען מוז זיך שטארק היטן פון אומגעווינטשענע אויגן... איך קום שוין אהן נאנט צום ניוז סטענד, און - וואונדער איבער וואונדער - דער נייער וועקער איז דא, איך געב זיך שנעל א קוק אים און איך זעה אז קיינער שטייט נישט צו נאנט, איך גיי צו מיט זיכערע טריט און איך געב א פרעג שטילערהייט: האו מאטש איז די וועקער? ער זאגט די וועקער איז עיט דאללערס, איך געב נאכאמאל א גוטן קוק ארום, זיכער מאכן אז קיינער האט נישט געהערט (איי, אויב האט שוין יענער געהערט איז דאך שוין סיי ווי דערנאך? אבער פאר די נערווען דארף מען קוקן), נאכן זעהן אז קיינער האט טאקע נישט געהערט, נעם איך ארויס פון בערל א געביגלטן גרינעם צעהנער (גראדע מיין איך אז דער צעהנער איז געל, אבער דברנו כלשון בני אדם) און איך געב עס שנעל א לייג אראפ דארטן, דער ערל געט א ריק אריין דעם וועקער אין א קליינעם שווארצן זעקל און ער געט מיר נאך צו צוויי דאללער... איך לויף מיט שנעלע טריט צו א שטילע סמעדריש אין געגנט און איך זעץ מיך און א ווינקל, און מיט גרויס חשק נעמט מען ארויס דעם וועקער און מען מישט אויף צום ווארט פונעם רעדאקציע און מ'הייבט אן צו לייענען...
די מעשה האלט יעצט דא....
פארזעצונג וועט אי"ה קומען בקרוב...