ל"ג בעומר כאראקטערעזירט אידישקייט פון המון עם

ל"ג בעומר איז א יו"ט וואס כאראקטערעזירט די אידישקייט פון דעם המון עם פון חרדישע אידן. מען פייערט ל"ג בעומר, מ'פארט קיין מירון, מ'טאנצט, מ'וויינט, מ'צינדט אן מהדורות, מ'זאגט תהילים, מ'באטייליגט זיך ביי סעודות, אבער.....

• קיינער ווייסט נישט פארוואס מ'פריידט זיך;
• דער הויפט אידענטיטעט וואס מ'גיט פאר דעם יום טוב (יום פטירת רשב"י) איז נישט אמת;
• דער יום טוב האט נישט קיין מקור, און מ'קען זייער גרינג נאכגיין די געזעלשאפטליכע פאקטן וויאזוי עס האט זיך אנטוויקלט;
• מ'רעדט וועגן רשב"י אבער מ'האט נישט קיין מושג ווער ער איז געווען, ווען ער האט געלעבט, און וואס ער האט אויפגעטוהן;
• דער הויפט "פאקט" וועגן רשב"י (ספר הזוהר) איז נישט אמת;
• מענטשן וואס ווייסן נישט וואס קבלה איז לויפן קיין מירון און האלטן זיך ווי "ר' שמעונ'ס א מענטש".

און דאס איז א ריכטיגע אפשפיגלונג פון חרדים בכלליות:

• קיינער ווייסט נישט פארוואס מ'איז א איד;
• דער הויפט סיבה וואס מ'גיט אן (אין אדם מנחיל שקר לבנו) איז נישט אמת;
• חרדישע בגדים און רוב אידענטיטעט מנהגים האבן נישט קיין מקור, און מ'קען זייער גרינג נאכגיין די געזעלשאפטליכע פאקטן וויאזוי זיי האבן זיך אנטוויקלט;
• מ'רעדט וועגן חסידישע רבי'ס אבער מ'האט נישט קיין מושג ווער זיי זענען געווען, ווען זיי האבן געלעבט, און וואס זיי האבן אויפגעטוהן;
• די הויפט "פאקטן" וועגן אידישע היסטאריע וואס חרדים גלייבן זענען נישט אמת;
• מענטשן וואס ווייסן נישט וואס אידישקייט איז פלאמען ביים דאווענען און האלטן זיך פאר "עהרליכע אידן".

שיין

די ביסט אזא מאמין און דיין אפיקורסות,אזוי ווי די מארמאשור און זיין רבין,יום פטירת הרשב״י ניין, די זוהר ניין,די גלייבסט און אלע תיאוריעס פון איעדען אונטער חכם,אזוי ווי דער סקווערער בחור ביים רעביס טיש.
א אמתע חכם איז נישט געדרייוט בא אגענדאס,ער זיכט די אמתע פאקטען פון אלע צדדים.

איך קען זייער גרינג פארשטיין דעם צד אז דער זוהר איז נישט קראנט, פשוט עס איז נישט פארהאן קיין שום פעסטע באווייז אז דער כתב יד האט שייכות מיט רשב"י און זיין חבריא, און דער חזון איש וואלט מסתמא נישט געגלייבט דערין ווען מען טרעפט עס ווען היינט. די איינציגסטע סיבה צו גלייבן דערין איז נאר ווייל בעלי רוח הקודש אמיתיים האבן עס געגלייבט, איז פארלאז איך זיך אויף זייער רוח הקודש פונקט ווי איך פארלאז זיך אויף זיי מיט דעם עצם פאקט אז ר' שמעון ליגט בכלל אין די פלאץ.

אבער וואסערע מקום איז דא צו זאגן אז ר' שמעון איז דוקא נישט נסתלק געווארן דעם טאג? (ולהעיר, עס זענען דא נאך 3 אדער 4 טעמים פאר די שמחה פון ל"ג בעומר, סאו א אויפגעקלערטער דארף נישט מורא האבן זיך צו פרייען היינט...)

אגב שיטה, איך בין סתם נייגעריג וואס דו האלטסט - און גלייבסט - איבער דעם אר"י הק'.

ממש א גלגול פון חיים נחמן ביאליק אליין. אזא מעכטיגער אפיקורס, מסתמא ניטל ביקסטו זיך צום צלם אין קעלער, און טיף בלבך האלטסטו אז די בלוט בלבולים זענען אמת אויך.

"פאקט", דאס האט מיך זייער דערשראקן, די גענזען פיסלעך. א פאקט וואס דו האסט ערגעץ וואו געליינט, קיין נפקא מינה פאר מיר, אבער דו ווייסט פאקטן, ווייל ווילאנג ביזט נעבעך געווען אן אפרוח שלא נפתחו עיניך ביז דיינע 22 יאר, האט מען דיר נעבעך איינגערעדט אז דער זוהר איז פון רשב"י, אבער איצט ביזטו שוין קלוגער פון יעדן, דו האסט שוין ערגעץ געליינט אז עס איז דא אן אנדערע שיטה און דיר קען מען מער נישט איינרעדן קיין באבקעס, ווייל דו ביזט דאך א מוראדיגער היסטאריקער, א היסטאריקער וועלכער האט ביז די 22 יאר געלערנט מסכת בבא קמא און הלכות מליחה, אבער היינט איז פאר דיר נפתח כל שערי החכמה, דו האסט געליינט א וועבסייט און דו ווייסט!!!!! איך ציטער.

'

אפשר איז שוין טאקע צייט מען זאל עפענען אזא כף הקלע ווי מען וועט אריינשליידערן נאר די אמת'ע כופרים ווי משובשת מיט איחוד'ל וכת דיליה.

פארשטייט זיך עס וועט זיין פארשפארט מיט אזויפיל שלעסער ווי די טשערנאבלער קינדער האבען ארויפגעלייגט אויף דעם מאור עינים'ס צימער און נאר מאטל גיהנם שמש וועט האבען די שליסלך צו זיי.

שיטה קוקסט אויס זייער פארווייטאגט, נעקסט טיים פאהר ארויף קיין ישראל, און ארויף קיין מירון און טאנץ א קעדאטשקע מיט די אלע וואס ווייסן גארניש, העט דיר בעסער ווערן.

לגופו של ענין, דו רעדסט אין נאמען פון 'קיינער' ווי כאילו די 'קיינער' געהערט צו דיר. אז דו האסט שאלות און פראגעס איבער ל'ג בעומר און איר מקור שטעל דיך אוועק און פרעג שיין, עס וועלן זיך שוין יאווען כעוורע דיר צו ענטפערן, און נישט דוקא פון וויקי'דיגע מקורות. אבער שטייסט און שיסט, אין וועם? אין דיר אליין? אין דיין חינוך? אין דיין אומוויסנדע דומקייט? האסט פארלארן צו אויפגעקלערטקייט אלע דיינע לאגישע כוחות ווי אפצולערנען א זאך...

נעבעך. איז ר' אביגדור מיללער מיט בלומבערג דאס אלעס שולדיג?

דעת תורה האט געשריבן:איך קען זייער גרינג פארשטיין דעם צד אז דער זוהר איז נישט קראנט, פשוט עס איז נישט פארהאן קיין שום פעסטע באווייז אז דער כתב יד האט שייכות מיט רשב"י און זיין חבריא, און דער חזון איש וואלט מסתמא נישט געגלייבט דערין ווען מען טרעפט עס ווען היינט. די איינציגסטע סיבה צו גלייבן דערין איז נאר ווייל בעלי רוח הקודש אמיתיים האבן עס געגלייבט, איז פארלאז איך זיך אויף זייער רוח הקודש פונקט ווי איך פארלאז זיך אויף זיי מיט דעם עצם פאקט אז ר' שמעון ליגט בכלל אין די פלאץ.'.

ביזט גערעכט און נישט גערעכט,

ביסט גערעכט, אז דאס וואס בעלי רוה״ק האבן געגלייבט אינעם זוהר איז גענוג פאר אונז צו גיין ווייטער דערמיט,
ביזט נישט גערעכט אז דו האסט בכלל געענפערט, מען דארף נישט אלעס באמערקן, מען פארקאנקט די אשכול און מען גייט ווייטער,

ביסט גערעכט, אז דאס וואס בעלי רוה״ק האבן געגלייבט אינעם זוהר איז גענוג פאר אונז צו גיין ווייטער דערמיט,
ביזט נישט גערעכט מיטען זאגן אז חזון איש וואלט נישט געגעלייבט, ווייל בשעת עס עס הערט תהו ובהו ברענגט מען נישט אויף קיין צווייפלען, אלמלא מען האלט ווען ביי תיקון השלום, אין מען פארשטייט אלעס, און מען לעבט מיט א אמת, איז אפשר כדאי צו וויסען היסטאריע אז מאנכע האבן געצווייפעלט אינעם זוהר אז אפשר ידי זרים בה, עכשיו אז די ציל איז נישט היסטאריע נאר די ציל איז גאר עפעס אנדערש, איז אירעליווענט און מעגליך צו תמימות׳דיג, צו פראבירען אריינצוגיין אין א דיסקאשען.

חברה, בארואיגט אייך. דברי חכמים בנחת נשמעים.
can't we all just get along?

ערגעץ וואו דא, האט מען העפטיג דעבאטירט דעם אוטענטישקייט פונעם זוהר, און צו רשב"י האט דאס טאקע געשריבן.
ס'בכלל נישט אופאלענד אז איר נעמט אן אז ער האט דאס נישט געשריבן, יעדער האט רעכט צו פאסן זיינע מיינונגען. אבער דאס טראנספארמירן בפומבי אלס פאקט, און דאס זאגאר נוצן אלס אטאקיר מיטל שיינט צו זיין עטוואס אומפאסיג. ובפרט אז איר האלט זיך פאר א דורכגעווייקטע מאמין בתורה שבכתב, ובתורה של בעל פה.
לאמיר זאגן אז ס'איז א "פאקט" ביי דיר אז דאס האט ער נישט געשריבן, און אז תורה מן השמים הוא איז אויך א פאקט ביי דיר.
מיינט עס נאך נישט אז אלע חברה וואס יובלירן דעם טאג האבן דאס אזוי פאקטעזירט, עספעשעלי ווען ווי דעת תורה ווייזט אן, האבן אזעליכע הייליגע לייט ווי דער אר"י ז"ל יא זיך געקאכט דערין. און לאמיר זאגן איר האלט נישט פון אים, ווייסט איר אליינס אז ער איז פארהייליגט ביי חסידישע אידן, פונקט ווי ר' אביגדור מיללער איז פארהייליגט ביי אייך. און סך הכל אין עדישן צו זאכן וואס די גלייבסט גלייבן זיי אויך.
פארשטייט איר טאקע נישט אנדערע ? איז איינער וואס גלייבט ווייניגער ווי דיר אן אפיקורס, און איינער וואס גלייבט מער א יושבי חושך ניק? זענט איר ממש דער יושב אור ניק ? אגב, פייערן ל"ג בעומר איז אייער מקום וואו צו צילן אייערע שטעכעדיגע פיילן אויף חרדים ?
בכלל, לאזט איר איבער אויף עפעס ספיקות, אדער אלעס קריגט א טשעיק אדער עקס?

איך אויך האט געשריבן:אפשר איז שוין טאקע צייט מען זאל עפענען אזא כף הקלע ווי מען וועט אריינשליידערן נאר די אמת'ע כופרים ווי משובשת מיט איחוד'ל וכת דיליה.

פארשטייט זיך עס וועט זיין פארשפארט מיט אזויפיל שלעסער ווי די טשערנאבלער קינדער האבען ארויפגעלייגט אויף דעם מאור עינים'ס צימער און נאר מאטל גיהנם שמש וועט האבען די שליסלך צו זיי.

אין לך יום שאין קללתו מרובה מחבירו. ס'ווערט ממש שרעקעדיגער פון טאג צו טאג.
ערגעץ דא האט איינער געפענט א שאול תחתית אשכול, וואו ער טיילט צו גהינם.
יעצט טיילט שוין איינער כף הקלע. קוקט אויס מ'האט געפענט פארטעבל גהינם צענטערן אויף דער וועלט. מ'האט אריינגעשטעלט עטליכע געפאנצערטע אגענטן מיט שווארצע הענטשקעך, און בלוטיגע פאסיקעס, אן קיין שאנסן מגילגול צו ווערן. אפשר קען מען פארהאנדלן אז מ'זאל אפקומען בלויז מיט טיילן חשבון הנפש קארטלעך פון האנדל ערליך.

מודעה! אזוי ווי דער גהינם האט זיך ליידער אויסגעברייטערט, שפירן מיר אז מיר קענען נישט שטיין אין א זייט און שווייגן. מיר זוכן איינער זאל עפענען א גן עדן אשכול אויך, און ווי איר ווייסט דאך מידה טובה מרובה.
ל"ג בעומר תשע"ג, ב"ד של מעלה.

איך אויך האט געשריבן:אפשר איז שוין טאקע צייט מען זאל עפענען אזא כף הקלע ווי מען וועט אריינשליידערן נאר די אמת'ע כופרים ווי משובשת מיט איחוד'ל וכת דיליה.

פארשטייט זיך עס וועט זיין פארשפארט מיט אזויפיל שלעסער ווי די טשערנאבלער קינדער האבען ארויפגעלייגט אויף דעם מאור עינים'ס צימער און נאר מאטל גיהנם שמש וועט האבען די שליסלך צו זיי.

לאו כל הכופרים שווין, און מיר גייען נישט אלע אין איין כף הקלע.

עס איז דא דער כף הקלע פאר די וואס גלייבען אז מאלעסטעישען עקזיסטירט,

עס איז דא א כף הקלע פאר די וואס זאגען אז לג בעומר איז נישט זיין יארצייט.

מיש נישט די יוצרות.

איינער באד מען אין זרע רותחת, דער אנדערע אין ח"י רוטל שווייס און דרעלעכטס פין די אידען וואס פארען קיין מירון......

איך נעם אהן די דברי מוסר אז איך האב געדארפט שרייבן קלארער איבער רשב"י'ס מחבר זיין דעם זוהר ווייל איר האט נישט יורד געוועהן לסוף דעתי. איך האב נישט געמיינט די דעות פון חוקרים, נאר פון גאנץ פרומע אידן וואס האבן נישט געהאלטען אז די גאנצע זוהר האט ר' שמעון אינגאנצן מחבר געוועהן, צום ביישפיל אזא איד ווי ר' משה סופר, דער מחבר פון די ספרים "חתם סופר", אדער ר' יעקב עמדין וכו'. מיין נקודה איז נישט אז רשב"י האט בכלל נישט מחבר געוועהן דעם זוהר, נאר אז איינע פון די וויכטיגסטע סטעיטמענטס וואס די המון עם מאכט וועגן ל"ג בעומר אז "רשב"י האט מחבר געוועהן דעם זוהר" איז נישט אמת למחצה לשליש ולרביע אפילו פון א פרומע חרדישע שטאנדפונקט.

און דאס כאראקטערעזירט זייער גוט חרדישע אידישקייט ווי טויזענטער סטעיטמענטס איבער היסטאריע און איבער פאקטען זענען פשוט נישט אמת למחצה לשליש ולרביע, און אויב מ'נעמט די מי איין טראפ נאכצוקוקן צו די פאקטען קענען שטימען זעהט מען גלייך אז עס שטימט נישט, אבער מ'האט נישט קיין אינטערעסע! א גוטע ביישפיל איז, יעצט איז די יארצייט פון דעם הייליגן רמ"א, קינד און קייט וואקסן אויף מיט די מעשה אז ער נפטר געווארן ל"ג בעומר אין יאר של"ג, ביי די 33 יאהר, און ער האט מחבר געווען 33 ספרים, און מ'האט אים מספיד געוועהן מיט 33 שבחים וכו'. למעשה איז ער נפטר געווארן אין יאר של"ב, און ער איז געוועהן מינימום איבער 40 יאר.

העי האסט פארגעסען די 33'סטע שבח וואס מען האט נישט געקענט זאגען ביז מען האט עס משלים געוועהן.

ביסט בעצם גערעכט לגבי דעם אז עס איז דער יארצייט פין רשב"י אין ל"ג בעומר איז א נייע זאך וואס נעמט זיך פין א טעות הדפוס, און די זאך איז גוט דאקומענטירט, און לאזט נישט קיין ספק אין דעם. עכ"ז איז עס א יומא דהילולא, כלומר אז יום שמחה פין רשב"י, און האט טאקע נישט מיט דער יארצייט.

אבער דיין פאונט בעצם איז גראדע גוט, און ברענגט ארויס שטארקע פרטים און נקודות הצריכים תיקון, האסט דיך גארנישט מיט וואס צו שעמען.

ווען איך זעה אין מירון א ספרדי טאנצען מיט א תיקוני זוהר, וואס איז כמעט ווי זיכער נתחבר געווארען דורך איינער פין די ראשונים, ווייזט עס אויף עפעס. און ווען דאס געשעהט ווען ביי אן אנדערע רעליגיע וואלטען אונז געלאכט אין די פויסטען וויאזוי זיי געלייבען נעבעך אין שטותים. למשל, אין די מוסעלמענישער רעליגיע איז דא פעסטע טעותים אין זייערע לעגענדעס און מעשיות, צ.ב.ש. אז תרח האט גערעדט מיט יוסף הצדיק וכדומה, און קיינער וועט נישט טראכטען אז מען דארף טראכטען אז יש דברים בגו, נאר מען וועט לאכען אין די פויסטען, און אין זוהר איז דא בדומה צו דעם אזעלכע הוכחות וואס ווייזען אז עס איז קלאר נישט באשריבען אין די ימי התנאים, און ווען מען ווערט איבערגעצייגט אין דעם איז נישטא קיין וועג צוריק.

באמת איז מיין שיטה אז בעסער איז נישט מאריך צו זיין אין דעם, ווייל פאר דער געוועהנליכע מאמין ווען ער ווערט איבערגעצייגט אין דעם קען עס מיינען אסאך מער פין דעם, ער פארשטייט נישט מפריש צו זיין פין זוהר ביז די גמרא אין למעלה בקודש, און קען חלילה ווערען אינגאנצען אן אפיקורס על לא דבר, אהן אפילו וויסען אז ער הייבט נישט אהן צו פארשטיין די גדרים פין אמונה און קען רואיג בלייבען א איד א שומר תומ"צ און גלייבען אין די י"ג עקרים און אין די גאנצע תורה אפילו מיט דעם אז דער זוהר איז נתחבר געווארען אדער לכל הפחות געשריבען געווארען מיט זעקס זיבן הונדרעט יאר צוריק.

סא לאז די חרדים טאנצען און לאז זיי דינען א פייער אין מיטען פין דעם רינג, און לאז זיי גלייבען אין אלע לעגענדעס פין מעשיות, אזוי וועלען אפשר זייערע קינדער און אייניקלעך נאך אפשר זיין מאמינים בד' ובתורתו.

אבער אין דיין עצם יסוד האלט איך קלאר מיט אז די היינטיגע אמונה וויאזוי מען איז מחנך די קינדער איז קלאר נישט די אמת'ע אמונה, און עס דארף א לענגערע בירור אויב איז עס עבודה זרה, אדער עבודה זרה וואס איז אפשר מותר. אבער זיכער נישט קיין חיוב.

פארשטייט זיך אז די אלע הוכחות וואס דו האסט זענען נישט קיין פראבלעם פאר א מאמין, איינער וואס גלייבט אין עפעס העכערס און אז סאיז דא אזא ענין ווי רוח הקודש. (דאס איז חוץ מזה וואס כולי עלמא מודי אז מיט די יארן זענען צוגעקומען פארשידענע קטעים נישט פונעם אריגינעלן נוסח ואכמ"ל).

בנוגע דעם טעות הדפוס וועגן ל"ג בעומר, וואס איז לדבריך גוט דאקומענטירט, איז אדרבה וויז אויף.

דעת תורה געב צייט פאר שיטה נאכצוקוקען די מקור פון זיינע זאכען ער בעבעלט סך הכל נאך פון איינער פון זיינע רעביס און וועם ער גלייבט מיט א שטארקע און פעסטע אמונה פשוטה,ער דארף נישט קיין ראיות לדבריו ער גלייבט און ער איז קלאר און זיין שיטה אז זוהר האט נישט מיט ר׳ שמעון און ער גלייבט אוכט אז ס׳איז דא קלארע ראיות ,ער ווייסט נישט פונקטליך די ראיות געב עם צייט צו פרעגן זיינע רעביס וואס מדארף ענטפערען פאר דיע וואס גלייבען נישט און זייער סארט אמונה,אז די וועסט עם צופיל chalangein קען ער חלילה פארלירען זיין קלארע אמונה,געווענטליך ביי דיע סארט מאמינים (דיע וואס גלייבען אז אלעס וואס חרדים גלייבען מוז מען גלייבען פארקערט נישט קיין חילוק פארווי און פארוואס)אויב זיי פארלירען זייער אמונה קענען זיי אינגאנצען יוצא זיין מדעתם,ממילא טראכט איך זאלסט נישט צופיל טשעלינזדען זיין שיטה.

לאמיר אננעמען אז יש דברים בגו, און דער זוהר האט טאקע אן אנדערן מקור, איז נאך אלץ נישט רעכט די נידריגקייט מיט וואס שיטה משובשת באציהט זיך צו הונדערטער טויזענטער ערליכע אידן.

שיטה, דו ברענגסט ארויס זייער א גוטע פוינט, ל"ג בעומר כאראקטירעזירט חרדים, אבער איך וואלט עס געזאגט אויף אן אנדערע וועג.
הונדערטער טויזענטער אידן פארן קיין מירון אויף ל"ג בעומר מען וויינט זיך אויס, מען טאנצט זיך אויס, און מען קומט אהיים פרייליך אויפגעהייטערט מיט פרישע כוחות, און דאס איז אפגעזעהן צו וואס עס איז יא אמת און אויפגעוויזן אדער נישט.
און די זעלבע איז דא אידן וואס גלייבן באמונה שלמה ופשוטה אין באשעפער און אין צדיקים, יא אויפגעוויזן אדער נישט אויפגעוויזן, יא קראנט אדער נישט קראנט, אבער למעשה האבן זיי א פרייליך און גליקלעך לעבן.
די אויבער'חכמה'שקייט קענסטו טאקע בעסער, אבער די גוטע און געשמאקע לעבן פון א איד א מאמין באמונה פשוטה אן קיין קראנטע מקורות האסטו אבער נישט.
וליתר ביאור עיין בחתימתי.

ברסלבער, דו שרייבסט וואס איך האב געטראכט, נאר ברענגסט עס גוט ארויס.
מען דארף נישט אלעס פארשטיין, און אנדערש לאכט מען פון אלעמען. אודאי, מען מעג פרעגן, מען מעג פארשטיין, אבער נישט זיך באציען מיט א נידערטרעכטיגע ביטול צו אידן וואס דו מיינסט אז זיי פארשטייען נישט אזוי ווי דו. טויזענטער אידן אין ירושלים וועלכע זענען רגיל אין זוה"ק, און בכלל בכל מכמני התורה מתוך הדחק, טאנצן מיט א התרגשות און שפירן זיך גאר דערהויבן, אבער מיר דא זיצן על סיר הבשר אויפן אינטערנעט און מען לאכט פון די פרושים, הא הא, זיי פארשטייען נישט אזוי גוט ווי איך... בשעת זיי שפירן דעם 'עולמך תראה בחייך'...

ברסלבער, זאגסט זייער א גוטע נקודה, און בעצם ביסטו מחזק וואס איך שרייב, נאר דו ברענגסט ארויס די מעלות דערפון. איך בין מסכים מיט דיינע רייד.
----
שמעקעדיג האקט

שמעקעדיג האט געשריבן:ברסלבער, דו שרייבסט וואס איך האב געטראכט, נאר ברענגסט עס גוט ארויס.
מען דארף נישט אלעס פארשטיין, און אנדערש לאכט מען פון אלעמען. אודאי, מען מעג פרעגן, מען מעג פארשטיין, אבער נישט זיך באציען מיט א נידערטרעכטיגע ביטול צו אידן וואס דו מיינסט אז זיי פארשטייען נישט אזוי ווי דו. טויזענטער אידן אין ירושלים וועלכע זענען רגיל אין זוה"ק, און בכלל בכל מכמני התורה מתוך הדחק, טאנצן מיט א התרגשות און שפירן זיך גאר דערהויבן, אבער מיר דא זיצן על סיר הבשר אויפן אינטערנעט און מען לאכט פון די פרושים, הא הא, זיי פארשטייען נישט אזוי גוט ווי איך... בשעת זיי שפירן דעם 'עולמך תראה בחייך'...

איך לאך בכלל נישט פון מענטשן וואס ליגן אין קבלה. איך האב קלאר גערעדט פון די "המון עם".

כברסלבר שמעקי ועוד. שיטה די נושא איבערן מקור הזוהר איז אן ערנסטער צו רעדן אין תורה ומחשבה, עס דארף אבער קומען מיט איידלקייט און לשון נקיה. וויי טוהן א מאמין ביזן גרונד איז נישט עטיש. לערנט אייך פונעם רבן של ישראל מרן החת"ס ווי קורץ און שארף ער ברענגט עס ארויס ברמז "הלא יש בביתך ספר מטפחת ספרים עיין שם דבר גדול דבר הנביא יזדעזע כל שומעיו".

דעת תורה האט געשריבן:
בנוגע דעם טעות הדפוס וועגן ל"ג בעומר, וואס איז לדבריך גוט דאקומענטירט, איז אדרבה וויז אויף.

נא נא נא, עס ארבעט נישט אזוי.

די טרעף מיר ווי עס שטייט אז דער יארצייט פין ר' שמעון איז לג בעומר.

העי ווארט נאך צו, און אפאר מינוט נאכדעם וואס די אליינס זוכסט אביסעל, קומסטו צוריק מיט א שיינע יו טורן, אז קיינער זאגט נישט אז עס איז יא זיין יארצייט.

און בכלל זאלסטו מיר טרעפען עפעס א מקור פין מאכען א פייער און טאנצען ארום אין א עיגול כאילו מען דינט דער פייער.

וכדברי ר' אהרן (קודם שחזר), דער הדלקה האט נישט קיין מקור און הט נישט קיין מסורה, על כן ווייס איך נישט וויאזוי צו מאכען דער הדלקה. שפעטער איז "עפעס" געשעהן און האט אויך אנגעהויבען דינען דער הדלקה.

איך מיין אז מען האט דא אויסגעמישט צוויי גאר אינטרעסאנטע נושאים וואס יעדעס פאר זיך עטסטער איז ווערט די צייט און רעספעקט אדורך צו טון בפני עצמו.

אין די תורה אפטיילונג דארף מען אדורך טון די מקורות פאר אלעס בנוגע רשב"י און ל"ג בעומר. עס איז דא אסאך חומר בענין זה. אגב האב איך יעצט געפונען אן ארטיקל בנושא.
m http://blogs.timesofisrael.com/the-urba ... ag-baomer/ m

אין געזעלשאפט קען מען אדורך טון עקסטרע די ב.ש. וואס אונזערע חינוך סיסטעם האט אונז פארקויפט. ברענגן דוגמאות און אדורך טון עצות ווי אזוי זיך צו ספראווען דערמיט.

לענ"ד דאס מערב זיין די צוויי נושאים טוט אוועקנעמען די מעגליכקייט פאר רואיגע אינטעלעקטואלע דעבאטע.

What a shame

שיטה מקובצת האט געשריבן:

שמעקעדיג האט געשריבן:ברסלבער, דו שרייבסט וואס איך האב געטראכט, נאר ברענגסט עס גוט ארויס.
מען דארף נישט אלעס פארשטיין, און אנדערש לאכט מען פון אלעמען. אודאי, מען מעג פרעגן, מען מעג פארשטיין, אבער נישט זיך באציען מיט א נידערטרעכטיגע ביטול צו אידן וואס דו מיינסט אז זיי פארשטייען נישט אזוי ווי דו. טויזענטער אידן אין ירושלים וועלכע זענען רגיל אין זוה"ק, און בכלל בכל מכמני התורה מתוך הדחק, טאנצן מיט א התרגשות און שפירן זיך גאר דערהויבן, אבער מיר דא זיצן על סיר הבשר אויפן אינטערנעט און מען לאכט פון די פרושים, הא הא, זיי פארשטייען נישט אזוי גוט ווי איך... בשעת זיי שפירן דעם 'עולמך תראה בחייך'...

איך לאך בכלל נישט פון מענטשן וואס ליגן אין קבלה. איך האב קלאר גערעדט פון די "המון עם".

קומסט מיר פאר ווי אלע אנטיסעמיטן וואס זאגן "מיי בעסט פרענד איז עי זשאו".

איחוד פעלד האט געשריבן:

דעת תורה האט געשריבן:
בנוגע דעם טעות הדפוס וועגן ל"ג בעומר, וואס איז לדבריך גוט דאקומענטירט, איז אדרבה וויז אויף.

נא נא נא, עס ארבעט נישט אזוי.

די טרעף מיר ווי עס שטייט אז דער יארצייט פין ר' שמעון איז לג בעומר.

העי ווארט נאך צו, און אפאר מינוט נאכדעם וואס די אליינס זוכסט אביסעל, קומסטו צוריק מיט א שיינע יו טורן, אז קיינער זאגט נישט אז עס איז יא זיין יארצייט.

אין די לינק וואס איך האב געלייגט אין מיין פריערדיגע הודעה טוט מען דאס אדורך. עיי"ש

יישר כח פאר הוגה

Nevertheless, what became the widespread attribution of his death to the thirty-third was the result of a printing error. In the 1802 printing of Peri Etz Chaim in Dubrowno, the text refers to “she-met” (“that he died”), but the original 1785 edition uses the word “samahh” (“was joyous”). The difference between life and death could be found in confusion over one letter, when the Hebrew Het in one edition became a Tav in the next.

מאנכע טענה'ן גאר אז די 24 טויזנט "תלמידים" פון רבי עקיבא זענען בכלל תלמידים נישט געווען. זיי זענען געווען די אויפשטענדלער פון בר כוכבא וואס האבן זיך געשלאגען מיט די רומיים, ווי מיר ווייסן אז ר' עקיבא האט געהאלטען אז בר כוכבא איז די "ריל דיל".
אלענפאלס, די בעסטע וועג צו פייערן דעם ל"ג בעומר איז מיט א גלעזל שוימיגע בירץ m http://www.timesofisrael.com/brewing-up ... lag-bomer/ m

שיטה קענסט נידערן דעם טאן, איך האב נישט געטראפן אין ערגעץ, נישט אין זוהר, אדער זוהר חדש, תיקוני זוהר, אז מציצה דארף זיין דוקא בפה.

בן תמליון האט געשריבן:כברסלבר שמעקי ועוד. שיטה די נושא איבערן מקור הזוהר איז אן ערנסטער צו רעדן אין תורה ומחשבה, עס דארף אבער קומען מיט איידלקייט און לשון נקיה. וויי טוהן א מאמין ביזן גרונד איז נישט עטיש.

דעתי נוטה אז יעדער מענטש האט די פולע רעכט ארויס צוזאגען זיין מיינוג וואס ער האלט באמת,
צו פארלאנגן פון א צווייטען אז ער זאל נישט צו זיין מיינוג ווייל ער קען דערמיט וויי טיען א צווייטען איז זייער סעלפיש און זייער נישט עטיש, אויב איינער האט א פראבלעם מיט א צווייטענס מיינוג איז דא צוויי גרינגע מהלכים ווי אזוי זיך צו באפאסען דערמיט, אין עצה איז אז מען זאל פארמאכען די אשכול און גיין צום נעקסטען אשכול, אדער איז דא נאך א עצה אז מען זאגט די אייגענע פארקערטע מיינוג, אבער בשו״א איז נישט אויסגעהאלטען שטום צו מאכען א צווייטען פון ארויס שרייבען וואס ער טראכט, שיטה האט געשריבען זייער בדרך כבוד, בסך הכל האט ער געשריבען פארקערט וואס דער עולם האלט, eat it or leave it.

יא הרב שיטה אחרי שובי ניחמתי, ל"ג בעומר כאראקטעריזירט טאקע גוט יידן בכלל און חרדים בפרט;

אונז יידן די עם הספר, די גרעסטע מבקרים, זעלבסט קריטיקירער. יעדע זאך איז מוטל בספק, פיל פיל מיט חשדות, גלייך ווען משה רבינו טרעפט זיך מיט כלל ישראל צום ערשטן מאל ציטערט ער, פון די 'והם לא יאמינו בי', און ג'ט ברוך הוא גיט אים דריי מופתים וואס זאלן אים איבערצייגן אלס א שליח השם. ג'ט גיבט אים אן הבטחה פון 'וגם בך יאמינו לעולם' נאר נאכדעם וואס ער וועט זיי ווייזן ביי מתן תורה 'שהוא יחידי' און פונדעסטוועגן קומט א פרשה פון 'וידבר מרים ואהרן במשה' און עס פעהלט זיך אויס א 'מרים מצורעת כשלג', און אזוי ווייטער און ווייטער בהמשך אלע דורות. איך בין נישט אויסן יעצט און דא צו שרייבן א לענגערע ארטיקל איבער דעם אבער די פונקט פארשטייסטו.

יעדע אלטע און נייע זאך גייט דורך שבעים חקירות און בדיקות, אזש, טאקע בר כוכבא האט ר' עקיבא געמיינט אז ער איז משיח, ביז ביז ער איז גע'הרג'ט געווארן, טעותים איז א זאך וואס באווייזט נישט אויף א שוואכקייט, נאר דאס נישט קענען מודה זיין אינעם טעות באווייזט דערויף. ר' עקיבא האט מודה געוועהן אז ער האט גע'טעות' און דאס איז די גדולה און באווייז אויפ'ן שטארקן דראנג און ביקוש נאכ'ן אמת. ואין כאן המקום להאריך כעת.

איצט לאמיר שנעל א קוק טון אויף ל'ג בעומר, עס איז ארומגענומען מיט א מיליאן ספיקות פון דעם הייליגן זוהר, ביז די יארצייט שאלה פון דעם טאג. און די אלע שאלות און ספיקות קומען נישט פון די אטעאיסטן און אויפגעקלערטע, נאר טאקע פונעם יעב"ץ וואס איז מכריח אז 'ידי זרים שלטו בו', און פונעם 'הייליגן חת"ם סופר וואס ספק'ט ארום דעם 'דילוקו עלי אהבה' עי' תשובות יור"ד רל"ג, און דער הייליגער חיד"א אין צפורן שמיר וואס טענה'ט אז ר' שמעון איז נישט אוועק ביום ל"ג בעומר....

די אלע ספיקות און שאלות זענען גוט גוט דאקומענטירט ביי אונז, און זייער פילע טויזענטער יודן וואס שפרינגען ביז צום הימל אין מירון און אין מונרו און אין ב.פ. ווייסן גאר גוט פון דיינע געוואלדיגע שאלות. פונדעסטוועגן דאך איז יום ל"ג בעומר א טאג פון שמחה אינעם עצבות פון די מיתת תלמידי ר' עקיבא, ר' שמעון בר יוחאי איז פון די חמשה וואס זענען פארבליבן, ר' שמעון בר יוחאי זאגט ח"ו שתשתכח תורה מישראל, לויט אלע הייליגע יודן וואס האבן אלע כלי ביקורת בידם און קויפן נישט אפ קיין שבתי צבי'ניקעס און קיינע חדשות אנגענומען כמעט בברור אז די ספר הזוהר וואס איז בידינו געשריבן געווארן דורך ר' שמעון וחביריו, עכ"פ א ריזיגע רוב דערפון, דערמיט האט ר' שמעון מנחיל געוועהן פאר כלל ישראל די ריזיגע וויכטיגע מיסטישע לערנונג פארן אידישן פאלק, דערמיט ווייזענדיג די וועלט פון א אונטער טיר, אויפוועקנדיג דערמיט די נשמת ישראל, די פשוטע, פחותים'דיגע נשמות האבן פלוצים געקראגן א ציהל, א תכלית, און א ווערד, דאס איז שפעטער דורכ'ן גרויסן אר"י הקדוש וחביריו ותלמידיו אויפגעלאכטן געווארן, און נאכער דורכן הייליגן בעל שם טוב אריבערגעפירט געווארן הלכה למעשה צו אונז פשוטע פארשטינקענע נידריגע נשמות וואס לא ראו אור מימינו...זיי האבן פארטייטשט תורת הזוהר פאר אונז קרוצי חומר און דערמיט אריינגעגאסן עמערס פילן אז מיר זאלן שפירן עפעס א ווערד זייענדיג סאלדאטן נאמנים לשם ולתורתו, און באוויזן צו רעוולוצינירן דעם 'סיסטעם' די סיסטעם וואס ביז דאן האבן נאר גדולי תורה און גוטע קעפ פון די רבנישע קרייזן און רייען האבן חשיבות און קענען איינטיילן פארן המון עם וואס צו טון און וואס נישט....און געהויבן די פשוטי עם, די פייף פונעם פאסטעך האט געברענגט די ישועה ראש השנה ביים בעל שם, און די קרעכץ אינעם קלאב נאכן גראבע עבירה האט געשטורעמט הימלען לויט'ן בעל שם.

נאכן זיך באקענען מיט תורת ה'מיסטיקע פון יידישקייט וואס אנגעבליך האט ר' שמעון איר אויפגעדעקט, און דער אר"י אפגעלערנט און דער בעל שם דעליווערט איז שיין און גוט צו זיין א איד, געהערן צו דעם עם השם, און האבן די 'כמה זכאין' טויזענט מאל א טאג. זיך טרעפן מיט קודשא בריך הוא ושכינתיה וויפיל מאל א טאג מען וויל....און דערפאר פאר די אלע גוטס וואס ער האט אונז געטון די אלע הערליכע און טיפע דערהערן אין נשמת ישראל און אין גדלות ישראל און אין די זכי' וואס מיר האבן אז מיר אלע זענען וויכטיג און 'מה למעלה ממך' שפרינגען מיר, טאנצן מיר, פרייען מיר זיך, מיר זענען גליקליך און פרייליך אז מיר קענען ענדליך שפייען אויף די 'סיסטעם' וואס מאכט הירארכיע און אימפעריאליסטישע אידישקייט און טיילט דעם פאלק אין מדריגות און מיר זענען אנטלאפן פון די וואס זענען רודה את העם במקל....מיר קענען זיין יידן געטריי צום ג'ט און זיין ווילן נישט צו די רבנים און זייערע ווילן...א מחי' און דערפאר אין מירון ביי ר' שמעון טאנצט דער אר'י מיט די פשוטע יודן, און אלע פרענקאלאך טאנצן מיט די ישיבה גיי'ס, די חסידים מיט די פיציקע קינדערלעך די אמעריקאנע סושי געפרעסענע מיט די סטאלענע קישקעס...

תורתו מגן לנו, היא מאירת עינינו, הוא ימליץ טוב בעדינו, אדונינו בר יוחאי!!! פרייטס ענק יודעלעך, פרייטס ענק ברודערלעך....

לאז מיר זיך נישט קריגן דא איבערן אוטענטישקייט פונעם זוהר, מיין פראגע איז עפעס אנדערש
ר' יעקב משה ווען ער פארט קיין מירון, וואס איז זיין מאטיוו? פארט ער ווייל ער איז א חסידישער איד, וואס ליגט אין חסידות, וואס קוקט אן דעם זוהר ווי א צורינג צו זיין אידישקייט?
פארט ער מיט א תמימות ווייל ער האט עפעס אין לעבן וואס לאזט אים נישט שלאפן אין ער האט געהערט אז דארט קען מען ווערן געהאלפן?
אדער פארט ער ווייל אלע אן אויסנאם פון זיין בלעקבערי/וואטסאפ גרופע האב פאריאר ארויפגעשטעלט בילדער פון די נאכטמאל אין שעריס, און פון די אהרל"ך וואס ווישן זיך די בייכער שוין עטליכע וואכן פארן אנקום פון די מאריקאנע, און האבן שוין גרייט פאבריצירטע טרויער געשיכטע'ס נאך פון פאר דעם אפיקומן, און פונקט ווי ער האט זיך געמוזט נעמען פארשטיין צו וויין, מוז ער יעצט צוזאמפאקן דעם זאטשקע, איבערגיין מיטן קרעדיט קארטל, און פארן אויף מ'ראן

ספר היעב"ץ:
m http://www.hebrewbooks.org/33319 m

@לעמאן דזשוס
האסט אבער פארגעסן צוציענדיגן דיין היסטאריע, ווי בשם דרך הבעל שם טוב חסידות וקבלה כביכול טוט זיך אפ די שטערקסטער אימפיריאליסטישע הירארכיעשע יידשקייט וואס איז אמאל געווען אין היסטאריע.

הוגה האט געשריבן:איך מיין אז מען האט דא אויסגעמישט צוויי גאר אינטרעסאנטע נושאים וואס יעדעס פאר זיך עטסטער איז ווערט די צייט און רעספעקט אדורך צו טון בפני עצמו.

אין די תורה אפטיילונג דארף מען אדורך טון די מקורות פאר אלעס בנוגע רשב"י און ל"ג בעומר. עס איז דא אסאך חומר בענין זה. אגב האב איך יעצט געפונען אן ארטיקל בנושא.
http://blogs.timesofisrael.com/the-urba ... ag-baomer/

אין געזעלשאפט קען מען אדורך טון עקסטרע די ב.ש. וואס אונזערע חינוך סיסטעם האט אונז פארקויפט. ברענגן דוגמאות און אדורך טון עצות ווי אזוי זיך צו ספראווען דערמיט.

לענ"ד דאס מערב זיין די צוויי נושאים טוט אוועקנעמען די מעגליכקייט פאר רואיגע אינטעלעקטואלע דעבאטע.

What a shame

עס איז יא איין נושא. עס ברענגט ארויס ווי על אף ווי שוואך דאס איז מצד די מקורות דאך מצד אונזער מאדנער געזעלשאפט און אונזער חינוך סיסטעם קענען מיר זיך נישט קיין עצה געבן זיך צו ספראווען דערמיט. און פארשטייט זיך אז אונזער סיסטעם נעמט אוועק יעדע מעגליכקייט פאר רואיגע אינטעלעקטואלע דעבאטעס.

מאן דאמר האט געשריבן:לאז מיר זיך נישט קריגן דא איבערן אוטענטישקייט פונעם זוהר, מיין פראגע איז עפעס אנדערש
ר' יעקב משה ווען ער פארט קיין מירון, וואס איז זיין מאטיוו? פארט ער ווייל ער איז א חסידישער איד, וואס ליגט אין חסידות, וואס קוקט אן דעם זוהר ווי א צורינג צו זיין אידישקייט?
פארט ער מיט א תמימות ווייל ער האט עפעס אין לעבן וואס לאזט אים נישט שלאפן אין ער האט געהערט אז דארט קען מען ווערן געהאלפן?
אדער פארט ער ווייל אלע אן אויסנאם פון זיין בלעקבערי/וואטסאפ גרופע האב פאריאר ארויפגעשטעלט בילדער פון די נאכטמאל אין שעריס, און פון די אהרל"ך וואס ווישן זיך די בייכער שוין עטליכע וואכן פארן אנקום פון די מאריקאנע, און האבן שוין גרייט פאבריצירטע טרויער געשיכטע'ס נאך פון פאר דעם אפיקומן, און פונקט ווי ער האט זיך געמוזט נעמען פארשטיין צו וויין, מוז ער יעצט צוזאמפאקן דעם זאטשקע, איבערגיין מיטן קרעדיט קארטל, און פארן אויף מ'ראן

ווער איז ר' יעקב משה? ווייל עס זענען דא אסאך סארטן אידן מיט אנדערע צילן. מען קעניש מאכן א קאשע פון אלע.

שיטה מקובצת האט גוט ארויס געברענגט א ענין וואס ליגט באהאלטן אין אסאך פון אונז, נאר ווען איינער קומט אין ברענקט דאס ארויף אויפן טיש קורץ און שארף, כאפט עס א ציטער.

מ'איז געווארען אויפגעצויגען מיטן מעשה אז ער האט זיך באהאלטן אין א מערה מיט זיין זוהן רבי אלעזר, אבער מיט ל"ג בעומר האט דאס גארנישט. נאר דאס איז איין עפיסאוד פון זיין רייכע לעבן.

דער חתם סופר (שו"ת יו"ד סי' רל"ג) שרייבט אויף ל"ג בעומר: שאין "לקבוע מועד שלא נעשה בו נס ולא הוזכר בש"ס ופוסקים בשום מקום ורמז רק מניעת הספד ותענית מנהג הוא וטעמו גופא לא ידענו". - אין עטליכע צענדליגע יאר ארום גייען מיר גיין מיט שטריימליך אויף ל"ג בעומר אזוי ווי שושן פורים.
ממילא קומט דער חתם סופר גאנץ א אנדערע סיבה אויף ל"ג בעומר דאס האט גארנישט מיט רשב"י נאר "אז החל המן לרדת לישראל במדבר".

ממישט צוזאם דער ענין פון אבילות פון ימי הספירה מיט ל"ג בעומר, ואכמ"ל.

איחוד פעלד האט געשריבן:אבער דיין פאונט בעצם איז גראדע גוט, און ברענגט ארויס שטארקע פרטים און נקודות הצריכים תיקון, האסט דיך גארנישט מיט וואס צו שעמען.

ער האט זיך יא מיט וואס צי שעמען אין די אויך, ווייל ס'דא א חילוק ווען איינער וויל באמת זיך גריבלען צים אמת אדער סתם מישען א קאשע מיט האלבע סברות אין גאנצע שקרים, אין צווייטענס דארף ער טוישען די קעפעל ווייל ס'האט נישט דוקא מיט חרדים אזוי ווי ער וויל שפילען אז נאר קעגען חרדים האט ער עפעס, מען רעדט דא פין א טאג ווי ל"ג בעומר וואס ווערט געפייערט דורעך גאנץ כלל ישראל פין אלע שיכטען אין קרייזען, אשכנזים, ספרדים, תימנים, מזרחים, דתיים לאומיים, אין אפילו פרייע, סאו דאס האט נישט מיט אשכנזישע חסידים, דאס האט מיט גאנץ כלל ישראל, ממילא ווייזט דאס אז זיין פראבלעם איז נישט דוקא צי חרדים נאר צי יעדער וואס פארט קיין מירון וואס נעמט אריין פין אלע שיכטען פין כלל ישראל,

ממילא איז עס א חוב צי ענפערען אין זיך אננעמען פאר די כבוד פין כלל ישראל אין די כבוד פין ר' שמעון אין פין זיין ספר הזוהר,

אין יא ביסט גערעכט אז ס'לכאורה נישט פין די 13 אני מאמין'ס צי גלייבען אז ר' שמעון האט מחבר געווען דעם ספר הזוהר, אבער ס'אויכנישט פין די דרייצען אני מאמין'ס צי גלייבען אז א דעניש מאכט זאט, אבער למעשה איז דער ספר הזוהר יא פין ר' שמעון אין ר' אבא האט עס אראפגעשריבען, איז קודם לאמיר ברענגען די היסטאריע פין דעם ספר הזוהר ווי עס ווערט געשריבען אין ספר נתיב מצותיך און אין ספר זוהר חי פין ר' אייזיק'ל מקאמארנא זי"ע, איך וועל דא מעתיק זיין פין דעם ספר נתיב מצותיך:

ודע אחי שספר הזוהר חברו רשב"י, ור' אבא היה כותב כל מה ששמע, הן ממנו הן מן החברים, ורבי אבא הוא רב בעצמו, שחיה שלש מאות שנים, אח"כ גלה רב לבבל, ולקח עמו כל הכתבים, ומסר אותם לראשי ישיבות, ולא ניתן להעתיקו, כי היו מצניעים אותו, ולא ניתן רשות לגלות, והיה מצוי בבל ביד ראשי ישיבות רבנן סבוראי והגאונים, ובסוף ימי רבנן סבוראי תחלת הגאונים, היה איש קדוש אחד, שהיה בו נשמת משה רבינו, שהרי משה מגולגל בכל דור ודור, והוא עסק בספר הזוהר בקדושה ובטהרה, וסידר אותו סדר נאה על פרשיות התורה, ומרוב קדושתו זכה שנתגלה אליו כל החברייא, רשב"י עם חבריו, ונשמות ממתיבתא דרקיעא, ואליהו זצ"ל היה מצוי אצלו בכל שעה, והוא חיבר ספר רעיא מהימנא, וקורא לזוהר "חבורא קדמאה", וגם סידר ספר התקונים, שנתחבר במערה עם ר"א בנו, והוסיף בו כמה דברים מן הזוהר וגם דבריו וחדושיו, ואל תתמה על זה, שהרי מרן האר"י החי היו לו כל אלו המדרגות, ויותר הרבה מזה, ומה תתמה אם היה כמותו בין הגאונים, וספר רעיא מהימנא ותקונים, עמוק עמוק אין מי שישיגנו אלא לאיש אשר רוח אלהים בו, כמו למרן האר"י, בכל אות ואות ממש, יש בו רזין סתימים, ורזין פליאין עד אין לשער ולהעריך, ולא נמצא עמקות כמותו בכל ספר הזוהר,

וכל ספר הזוהר היה מצוי בישיבת הגאונים עד רב האי, כמבואר ברמב"ן, והרמב"ן לא זכה לראותו, כמו שכתב הוא בעצמו, ולכן בכמה מקומות כתב הפך דברי הזוהר, והרמב"ם נראה מדבריו בכמה הלכות וענינים שראה אותו בודאי, וכשהישיבות בבבל נתדלדלו הרבה, נתגלה ספר הקדוש הזה לכל העולם ברשות קבה"ו,

ער שרייבט דארט ווייטער וועגען רעיא מהימנא אין וועגען נסחאות, אבער עכ"פ פין ווען די ישיבות פין בבל זענען שוואכער געווארען, אין זיי זענען פארשפרייט געווארען ממקום למקום, האט זיך דער ספר הזוהר אנגעהויבען פארשפרייטען אויף די וועלט ביז אין די צייטען פינעם טור איז עס נתגלה געווארען לכל בית ישראל,

יעצט עמער זיך נעמען צי איחוד אין זיינע קשיות,

איחוד פעלד האט געשריבן:ווען איך זעה אין מירון א ספרדי טאנצען מיט א תיקוני זוהר, וואס איז כמעט ווי זיכער נתחבר געווארען דורך איינער פין די ראשונים, ווייזט עס אויף עפעס.

קודם איך האב נאך נישט געזעהן א ספרדי טאנצען מיט א תיקוני זוהר, אין צווייטענס ס'איז יא נתחבר געווארען דורעך ר' שמעון מיט זיין זוהן, נאר אזוי ווי מיר האבען אויבען געברענגט, האט רעיא מהימנא עס מסדר געווען טאקע אין די צייטען פין אנהייב גאונים אדער אביסעל פריער אין אויך מוסיף געווען זיינע אייגענע חדושים,

איחוד פעלד האט געשריבן:און אין זוהר איז דא בדומה צו דעם אזעלכע הוכחות וואס ווייזען אז עס איז קלאר נישט באשריבען אין די ימי התנאים, און ווען מען ווערט איבערגעצייגט אין דעם איז נישטא קיין וועג צוריק.

ס'פשוט אזוי ווי מיר האבען שוין פריער געברענגט, אז דער זוהר מיט די תיקונים איז מסודר געווארען דורך רעיא מהימנא ערגעץ בימי תחילת הגאונים, אין אלע דיינע קשיות צורינען ווי א זייפען בלאז,
(אין פלוצלינג האסטע שוין א וועג צירוק ),

תורתו מגן לנו היא מאירת עינינו הוא ימליץ טוב בעדינו אדונינו בר יוחאי,

שיטה, פין דיין שמאלען קיק ווינקעל ביסטו 100 % גערעכט

איינער וואס איז אבער אביסל מער אויפגעקלערט פארשטייט אין זעט אז "ישראל.. בני נביאים הם" אין כלל ישראל ווערט געפירט מיט א העכרן כח, אין נישט במיקרה
(ר' צדוק על שמחת שושן פירום בגולה)

הקנאה, התאווה והכבוד – מוציאים את האדם מן העולם.
קיק אריין אין דיין קנאה תאווה הכבוד אין באמערק די נאן סענס אין די לעכערלעכקייט דערפין אין ווי אזוי די פירסט דיך אפשר דאס וועט דאס דיך העלפן אויפהייבן דיין בליק העכער פין אינזער קליינע וועלטעלע

@חזקיהו, אויף דעם קמארנער רבין ז"ל זאג איך "ערבך ערבא צריך".

לעיקוואד האט געשריבן:@לעמאן דזשוס
האסט אבער פארגעסן צוציענדיגן דיין היסטאריע, ווי בשם דרך הבעל שם טוב חסידות וקבלה כביכול טוט זיך אפ די שטערקסטער אימפיריאליסטישע הירארכיעשע יידשקייט וואס איז אמאל געווען אין היסטאריע.

אמת און נישט אמת.

פאר'ן בעל שם און אזוי אויך פאר'ן גילוי תורת הקבלה (מיסטיסיזם) איז תורה געשטאנען אין שפיץ פון אלעם, רבנים, יושבים על מדין, און מיט רעכט אפילו. ווייל, שופטים ושטורים תתן לך בכל שעריך איז א קלארע ציווי, יידישקייט עז עי האול האט א גאנג וויזוי דאס דארף א' איבערגעגעבן ווערן, משה קבל תורה מסיני ומסרה, ומסרה, ומסרה. ב' פארטייטשט ווערן, כי יפלא ממך דבר וקמת...שרי אלפים, שרי מאות. ג' און אויסגעפירט ווערן, שופטים ושטורים, רודים בעם, בי"ד מכין ועונשין שלא עפ'י תורה אפילו. און אזוי ארום איז טאקע געוועהן איינגעפירט און מיט רעכט די סדר קבלת והמשכת התורה פאר הונדערטער יארן פון די ריש גלותא'ס ביז די ריזיגע תופסי ישיבה אינעם פולישן מיטלאלטער פון רב האי גאון ביז ר' יעקב פאלאק פון פוילן און אלע ראשונים אינדערצווישן...

אונז קליינע מענטשעלעך איז געוועהן א אנדערע מעשה, עס פאדערט באמת א גרויסע אריכות און טיפע פארש ארבעט און קלארע עסיי, און איך בין נישט אויסן דא דערצו, נאר אויף'ן שפיץ לעפל. אין די צייטן פון אונזערע הייליגע תנאים טרעפן מיר גאר פשוטע מענטשן לערנענדיג אין ישיבות פון סורא, פומפדיתא און נהרדעא, פעלד ארבייטער (לא תתחזי ביומי ניסן) און אבריכים נאך די חתונה (ישא אשה ואחר כך) אזוי ארום זענען אויסגעוואקסן פון די בני עניים און בני עמי הארצים (עי' סנהדרין) ריזיגע מעכטיגע רביים ווי ר' אליעזר בן הורקנוס און ר' עקיבא (דזשאסט טו נעים טו) אזוינע גרויסע ווי ר' מאיר (מגרים) און שמעי' ואבטליון...עס איז געוועהן א שטארקע אנזעהניש פון פשוטע נגרים און סנדלרים (ר' יוחנן הסנדלר, ר' יצחק נפחא) וואס האבן זיך דערשטיגן צו זיין די לייבן און ריזן פון די תלמוד בבלי וואס האבן געלערנט תורה מיט כלל ישראל, עס האט געהערשט א שטימונג פון 'ממזר תלמיד חכם קודם לכהן גדול עם הארץ...אין פשוטן זין פון ווארט! אבער, בהשך הזמן און איך שפרונג א צענדליגע הונדערט יאר איז געווארן א שטארקע פער צווישן די רבנישע רייען און די המון עם, די פשוטע יודן פון פאלק האבן זיך געטראפן ביים פעלד און ביים ברוינפן ברענען, ביים בייטש אויפן פערד רוקן און מיט די צוויי טעפלעך וואסער אויפן צובראכענעם רוקן ביין ליידיג און פוסט, אן קיין גואל, אן קיין דורש ומבקש, מען האט זיי איגנארירט און באליידיגט זיי זענען געבליבן פשוטע דזשעניטארן פאר די הויכעראנגיקע...עמי הארצים, פראסטע יידן, אנאלפאבאטיקער אן קיין ציהל און חשבון וויזוי זיך ארויסצודראפן פון זייער נידריגע לאגע...

איז געקומען די טיפערע מיסטיסיזם, שטארק האט זיך עס צושפרייט טאקע מיט'ן אר'י החי, און האבן אנגעהויבן פרעדיגן און צושפרייטן א קול יובל...אויסגערופן און געשאלט פרייהייט פאר די פארקנעכטעוועטע..פארשטייט זיך אז די גדולי תורה האבן רעוואלטירט מחמת כמה סיבות שונות מהם יידישקייט סיבות ווי מורה האבן פאר נייע זאכן, און אויסגעלאזט ביי סאציאלע סיבות אז זיי גייען פארלירן די אויבערהאנט (ח'ו די אמתע גדולי עולם, אבער די ראשי קהלה און פון גאווה באשטינקענע בעלי בתים) מען טרעפט די שרעקליכע חרמות און רדיפות וואס דער הייליגער רמח"ל האט געליטן, ער מיט זיין חבריא מען האט פארברענט זיינע ספרים, אים גע'אסר'ט פארצולערנען שיעורי תורה. וכולי והדברים עתיקים וארוכים.

אבער, די רעוולוציע ווי מיר קענען עס האט געמאכט נישט קיין אנדערער ווי דער הייליגער בעש"ט וואס מיט זיין הייליגער לעכטיגע כאראקטער האט ער צוביסלעך צוביסלעך געמאכט זיין וועג אריין אין כלל ישראל און איינגענומען שטעט און לענדער מיט א אבנארמאלע גאלאפ וואס דער הייליגער גר"א און חכמי בראד האבן בשום אופן נישט געקענט אפשטעלן, קיינע חרמות האבן נישט געהאלפן און קיינע מסירות האבן זיי נישט פארטיליגט, און אזוי ארום האבן זיי באפרייט דאס יידישע ייד, דער וואסער טרעגער און די פערד טרייבער, די סוחר פון דאנציג און דער דאקטאר פון פאריז אלע אלע האבן זיי געראטעוועט פון אונטערגאנג און אזוי ארום געהויבן דעם גאנצן אידישן פאלק כל אשר רוח חיים האבן געלעבט און געטאנצט, נישט אומזיסט האט מען זיי גערופן די פרייליכע, די חסידים האבן געפרעדיגט אז אהבת השם גייט סינאנים מיט אהבת ישראל, אזוינע ר' לייב שרה'ס מיט ר' משה לייב סאסובער'ס, אזוינע ר' לוי יצחק פון בארדיטשעב'ס האט חסידות ארויסגעגעבן, חסידות האט ארויסגעגעבן ר' צדוק'ס מיט ר' בונם'ס אלעס מיט איין ציל צו האלטן די קליינע מענטשעלעך ביי זייערע נשמות, אויפגעוויזן יעדן'ס אייגענארטיגע יחידות, יעדנ'ס אינדיווידואלע שטאנד און וויכטיגקייט, אין חסידות האט מען א קרעכץ געלויבט און א פלפול פון א שטיינערנע הארץ אפגעלאכט, א לייטער צו הירארכיע האט מען צובראכן און איר גענוצט ארויפצושלעפן פון גריב די צובראכענע און אומעטיגע...עד כאן בקוצר, דברים הטעונים אריכות גדול ונורא.

איצט, לאחר זמן זמנים האט זיך געשטעלט פארשידענע שפאלטענס אינערהאלב די נייע שיטה און דרך וואס האבן נאטורליך באדראעט דעם גאנצן יקום פון דאס נייע מהלך. אויסצורעכענען בלויז אפאר קען מען רעכענען תורת ברסלב וואס איז געוועהן ראדיקאל לינק (עפ"ל) תורת פרשיסחא, תורת איזביצא, און תורת ריזין און נאך פארשידענע גרופעס פון חסידות וואס האבן אלס אנגענומען פארשידענע פארמען, אזוי ארום האט זיך ווייטער געפאדערט צו באנייען און צוריקצושטעלן פארשידענע יסודות און דאס איז געקומען אמאל אין פארעם פון א צאנזער רב, אמאל אין פארעם פון א קוברינער און אמאל אין פארעם פון א חידושי הרים מיט א מהרש"ב...און אמאל אפילו אין גאר דראסטישן פארעם פון א סאטמאר רב האבנדיג א פראבלעם מיט ציונות...

האט זיך דערפאר ווייטער אויסגעמישט די רבנים און רביים, און איז געווארן זייער שטארק פארקניפט איינס אינעם צווייטן, ביז עס איז פארוואנדעלעט געווארן צו דאס וואס מיר האבן געקענט פאר ביז צעהן יאר צוריק..

האט אבער חסידות געשטעלט אזוינע טיפע יסודות בחיי העם היהודי, אז עס פארזיכערט אלס כסדר'דיגע רעוולוציעס, און מיר אלע זענען עדות דערויף, און ידידינו מאראנצןזאפט וועט אייך דאס קלאר מעיד זיין אין זיין משפיע אשכול אז; עס בלאזן נייע ווינטן פון חסידות און מיסטיקא, און עס זאגט אן אויף א שנעלע גאולה...עס יאווען זיך משפיעים אין אלע עקן פון וועלט אנגעהויבן פון מארגענשטערן און בידערמאן נישט געענדיגט ביי הרב זילבערבערג און זילבער און קלוגער וואס האבן פשוטע עלטערן, הרב מאטל זילבער האט לכאורה קיין איין זיידע וואס שטאמט פון קיין איינע פון די תלמידי בעל שם און אזוי אויך געוויס הרב קלוגער. הרב אייזענבערגער שטאמט לכאורה אויך נישט פון ר' אייזיקל קאמארנער און אזוי ווייטער און ווייטער...זיי רייסן שטיקער פון די אימפעריאליסטישע חסידות'ן און זיי וואקסן ווי אויף הייבן, קול דודי הנה זה בא.

און אויף דעם פייערן מיר לג בעומר אין חצר מערת רשב"י און נישט אינדרויסן ביי תולדות אהרעלע און אברהם יצחק!!!

ואמרתם כה לחי, רבי שמעון בר יוחאי...

היימישער ליטוואק האט געשריבן:@חזקיהו, אויף דעם קמארנער רבין ז"ל זאג איך "ערבך ערבא צריך".

ווער לאטעך נישט זאגען, למעשה איז דאס די מציאות אין ס'פארענפערט אלע קשיות,

מצאתי סמוכין לדברי "שיטה" בספה"ק בני יששכר
אז די שמחה באתרא קדישא מירון איז למעלה מדרך הטבע, וואס אין למעלה מדרך הטבע איז נכלל, אפי' טעם הפשטות שבה, אז א מענטש איז בשמחה, וואס דארף ער דערגרונטעווען? פארוואס ? גיי פריי דיך בתוך רבבות אלפי ישראל,
פארשטייסטו דען פארוואס איינער וואס דראגט זיך איז פרייליך, אין טעם בדבר, מען קוקט נישט אויף די אמצעים נאר אויף די מטרה, זיין העפי בשמחה, וויינען אויב וויל מען וויינען, וזהו.

ובאמת זו כל הדרך של רשב"י, אז באמת איז יעדע מצוה בגובה מרומים יסדה, ולאו כל מוחא יכול לסבול כל דא, און עס מקיים זיין עפ"י די גרויסע טעמים און מוחין און יחודין וואס איז דא דערין, וואס די אלע פנימיותדיגע טעמי המצוות האט רשב"י מגלה געווען בתורת הנסתר, און פונקט ווי מען איז מקיים אלע מצות קודם בפשטות , על דעת רשב"י, ומכאן ואילך כל אחד לפי כוחו וכוונתו, כיד ה' לטובה עליו, און אך און וויי אויב יעדער איינער זאל ווארטן מקיים צו זיין, נאר די אלע מצוות וואס ער ווייסט טעמיהם וכוונותיהם, נאר מ'איז עס מקיים קודם בפשטות כי כך נצטוויני מפי בוראינו, וכונתי על דעת רשב"י וחביריו.

כך מדה כנגד מדה פריידט מען זיך ביום ל"ג בעומר, מיט תורת רשב"י, דאס הייסט מיט פנימיות התורה וואס רובו פון דעם איז מבואר בספר הזהר הקדוש, שנתקדש על ידי עם ישראל כמו מועדי השנה התלויים בקדושתן של ישראל, און עס איז בכלל נישט קיין נפקא אמינא ווער עס האט פארענדיגט דעם זוהר און עס צוזאם גענומען און הביאו לבית הדפוס, איז אבער דא דארט געוואלדיגע דברים עמוקים וואס שטאמט פון רשב"י וואס באלייכט אונזערע אויגן אוון ווי א דור שפעטער נאכמער, כידוע, במילא איז מובן פארוואס די שמחה ביום ל"ג בעומר, איז למעלה בדרך הטבע וואס דאס מיינט למעלה מן השכל, וואס כידוע איז דאך טבע נאר דבר הנקבע בשכל, ווייל די שמחה איז אויף תורת רשב"י וואס שיינט אריין א אור אין זייערע מצות למעלה משכלם, איז די שמחה בתורת רשב"י אויך למעלה משכלם, והבן.

@לעמאן דזשוס
איך הער, כאטש איך בין מסופק אין דער כח פון די היינטיגע משפיעים אויפ'ן כללות העם. כמו"כ די משפיעים זענען טאקע נישט קיין רעבישע אייניקלאך דווקא, אבער זיי פאדערן פון די חסידים איבערצוגעבן זייער עצמאות און פרייהייט פאר זיי פונקט ווי די רעביס און אפשר מער. און אין ער נעקסטער דור וועלן די אלע שוין לכאורה זיין דינאסטיעס. ואכמ"ל.

אבער בעיקר, וואס האסטו דארט עפעס געשריבען "אויסצורעכענען בלויז אפאר קען מען רעכענען תורת ברסלב וואס איז געוועהן ראדיקאל לינק (עפ"ל) תורת פרשיסחא, תורת איזביצא, און תורת ריזין און נאך פארשידענע גרופעס פון חסידות וואס האבן אלס אנגענומען פארשידענע פארמען" קענסט מסביר זיין אפשר וואס דו ווילסט דא?

לעיקוואד דיין טענה וועגן זיך אינגאנצן מבטל זיין להרבי-משפיע, איז א שטארקע טענה, אבער ווי עס זעהט אויס פארבעסערט זיך דאס, מיט די סארט משפיעים ווי הרב ארוש מאטל פראנק, וואס פארלאנגען דאס בכלל נישט, און דאס גיט דעם טאן פאר אלע אנדערע חבורות, און די זעלבע זאך איז שייך אויף די צווייטע טענה אז די נעקסטע דור גייט זיין דינאסטיעס, ווייל דער עולם זיכט דאס מער נישט, און עקלט זיך דערפון, און מהאי טעמא איז מען געגאנגען צו די משפיעים,און דאס גייט ווערן רוטין, אז מען גייט צו א פלאץ וואס מאכט פאר מיר סענס, וואס איך כהאב באשלאסן אז ער זאל זיין מיין מורה דרך, נישט די אם המלכות, אדער מלאך הממונה על הריון, ושמו הור"ה,
און אזוי אויך זיכט מען איינער רעדט צו מיר מיין שפראך, און איך בין א גברא נישט פלעין א אנ"ש אין טעלעפאן ביכל.

@לעמעלע זאפט

גאנץ א פיינע עסיי, אבער איך רוף עס "ווישפול טהינקינג"
דער רשב"י און אר"י האבן געזאגט מיליאן זאכן, איינס פון דעם איז אז יעדע איד האט א ניצוץ.

אדרבא, ווי איז דא נאך אזא עקסלוסיווע קלוב ווי תורת הנסתר? אוואו מען טאר גארנישט מגלה זיין, נאר פאר מיוחדים, געוויסע זאכן נאר פאר איין מענטש אונעם גאנצן דור, ועוד.
לעומת זה תורת הנגלה איז א נחלת הכלל, וואס יעדער מעג, יעדער קען, און מ'איז טאקע מחויב ווי דער רמבם רעכנט אויס ביי הכל מחוייבים בת"ת.

אויב דער בעש"ט האט עס געזאגט, איז א עקסטערע נושא.
כזע דו גלייכסט צו וויינען זינגען טאנצן און טרונקען און הוליען ארום א פייער ווי די קאנטער קולטור יאפיס, שיערב ויבושם לך, אבער סהאט גארנישט מיטן רשב"י.
אדרבא דאס איז אלעס סימוכין צו שיטה מקובצת.

@לעיקוואד, כאף אז דו באמערקסט ווי דו ביזט געקראכן פון מיין נושא ׳אימפעריאליסטישע׳ ׳הירארכיע׳ צו א צווייטע נושא פון וויפיל בעלות די משפיעים האבן אויף די וואס ווילן ווערן נשפע פון זיי...ס׳איז וויכטיג אויסצושמועסן אבער פארט נישט איצט אין פלאץ. דא האב איך ארויסגעברענגט אויפן אויבערפלאך מיט וואס תורת הקבלה און חסידות האט געהאלפן כלל ישראל...וויזוי דאס האט עמאנציפירט און געגעבן גלייכבארעכטיגונג פאר א דיימאנט שלייפער צו צאמקלאפן א האנט אויף א פויסט ביי שבח יקר וגדולה און לעבן מיט א צווייטן יוד׳ס פרייד..

@ר' לעמאן
האסט מיר אבער נישט גענטפערט אויף מיין צוייטער שאלה, וז"ל "אבער בעיקר, וואס האסטו דארט עפעס געשריבען "אויסצורעכענען בלויז אפאר קען מען רעכענען תורת ברסלב וואס איז געוועהן ראדיקאל לינק (עפ"ל) תורת פרשיסחא, תורת איזביצא, און תורת ריזין און נאך פארשידענע גרופעס פון חסידות וואס האבן אלס אנגענומען פארשידענע פארמען" קענסט מסביר זיין אפשר וואס דו ווילסט דא?"

לעיקוואד האט געשריבן:חברה, בארואיגט אייך. דברי חכמים בנחת נשמעים.
can't we all just get along?

לעיקוואד האט פלוצים איינגענומען א רואיגקייט!
בכל אופן בין איך דיר שולדיג א דאנק בשאר בת רבים אויף עפעס א גמילת חסד וואס כ'האב געהאט פון אייך.
איף יו דאנט מיינד, זאל עס זיין צו מצוות!