ראשעקאל האט געשריבן:עס איז שבת נפטר געווארן הרב החסיד הישיש ר ישראל פרנס ז״ל פון וויליאמסבורג. ער איז געוועהן 96.
ר׳ ישראל איז געווען א איד א צדיק. ער איז געווען א בחור איינער אליין נאכ׳ן קריג, זיינע עלטערן, אלע געשוויסטער, אלע קינדער פון די געשוויסטער, זענען אומגעברענגט געווארן עקה״ש. ער האט נאר געהאט א פעטער, הרה״ק ר׳ מנחם מענדל מסטראפקוב זצ״ל, וועלכער האט אויך פארלוירן זיין גאנצע משפחה און געבליבן בלויז מיט איין אייניקל.
זיין מאמע איז געווען א טאכטער פון הרה״ק ר׳ אברהם שלום מסטראפקוב זצ״ל, א זון פון הייליגן שינאווער רב, א זון פון הייליגן דברי חיים פון צאנז זי״ע. זיין צורה איז געווען ממש ווי דער צורה פון זיין פעטער הרה״ק ר׳ מנחם מענדל מסטראפקוב.
אפילו ער איז געווען א גרויסער יחסן (דוכט זיך אז ער איז געווען דער לעצטער אור אייניקל פון שינאווער רב זצ״ל) האט ער ממאס געווען אין ראביסטעווע וכו׳, און האט בשום פנים ואופן נישט געוואלט ממלא מקום זיין זיין פעטער נאך זיין פטירה. בכלל האט ער ממאס געווען שקר בתכלית המיאוס. ער האט לאנגע יארן געארבעט אין דיאמאנטן דיסטריקט אויף 47 סטריט אין מאנהעטן.
אין די לעצטע יארן האט ער געליטן אויף אלצהיימער׳ס ל״ע, אבער איך האב אים געזען כסדר זיצן אין גרויסן ביהמ״ד אויף ראדני סטריט ביים שיעור פארטיפט אין דער גמרא - און דאס איז געווען אין דער צייט ווען ער האט שוין נישט דערקענט זיינע נאנטע.
די לויה איז טאקע ארויס פון גרויסן ביהמ״ד, און ער איז נטמן געווארן אין ביה״ח אין קרית יואל.
