ווען די "אויפגעקלערטע" זענען יושבי חושך
אמאל מיינט מען אז די יושבי חושך, די מענטשן וואס זיצן אין פינצטערניש און ווילן נישט זעהן די אמת, זענען דווקא די צוריקגעבליבענע פאנאטישע אידן וואס זענען בלינדע פאסטטרעגער פון אמאליגע דורות אן א טראפ מחשבה. כאטש רוב מאל איז טאקע אזוי, זעהט מען אמאל אז יעדער קען זיין יושב בחושך, אפילו דער אזויגערופענער "אויפגעקלערטער" וואס איז געניג "ברייט" און "פארשטייט" א עסק.
דאס זעהט מען יעצט זייער גוט אין די קעיס פון הרה"ח ר' נחמיה וועבערמאן נ"י. איך וויל נישט איבערקייען אלעס וואס איז אויסגעשמועסט געווארן דא, אבער איך אליינס "ווייס קלאר" אז ער איז אינגאנצען אומשולדיג. איך קען די מעשה פון די נאנט, און איך קען ר' נחמיה דורך און דורך. אבער איין זאך - איך פארלאנג נישט אז איר זאלט מיר גלייבן!! איר קענט נישט ר' נחמיה פערזענדליך, און איר קענט נישט מיר פערזענדליך, ממילא האב איך נישט קיין פאראיבעל אויב איר האט ספיקות אין די גאנצע זאך. איך האב נישט קיין טענות אויב איר האט א ספק ווער עס איז גערעכט דא. (עס איז אבער זיכער אז אפילו אהן וויסן די פאקטען קלאר זעהט מער אויס אז ר' נחמיה איז גערעכט פשוט אויב מ'קוקט אויף די פאבליק היסטאריע פון ביידע צדדים - אבער איך פארשטיי אז דאס אליינס איז נישט מוכרח).
פאר מיר איז אבער מאדנע ווי מענטשען וואס האבן אייביג ספיקות אויף יעדע זאך, ווילן קיינמאל נישט בלינדערהייט טראסטען רבנים, האבן פלוצלונג מחליט געוועהן אז מ'מעג טראסטען די מיידל בלינדערהייט! אנטשולדיגט ר' איד, האסט פארגעסן אז דאס פאסט נאר פאר א יושב חושך'ניק?! כ'האב געמיינט אז די ביסט זייער א "ברייטער"?...
הערי מארילעס אויף זיין בלאג "אמת ואמונה" שימפט אוועק אויף ר' נחמיה, און שרייבט צוויי טעג צוריק מיט א זיכערקייט אז דאס איז קלאר אז ער האט עובר געוועהן אויף איסור יחוד און ממילא האט ער פארלוירן זיין חזקת כשרות. איינער האט געפרעגט הערי אין די קאמענטארן ווי אזוי קענסטו בויען אויף איסור יחוד ווען דאס אליין ווערט געלייקענט דורך ר' נחמיה?!... הערט און שטוינט אויף הערי'ס ענטפער: "הרב הורוויץ קען די פרשה דורך און דורך, ער ווייסט די אלע פרטים, און מ'קען אים טראסטען אז ער ווייסט וואס ער רעדט"!!!
איז יעצט נאכאמאל, אויף הורוויץ האב איך נישט אזוי סאך טענות, ער קען זיך איינרעדן וואס ער וויל, אבער וואס איז די בלינדקייט פון אים גלייבן סתם אזוי. ווי איז דיין "העלטי דאוז אוו סקעפטיסיזם" וואס די נוצסט ווען א רב זאגט עפעס. פלוצלונג דא מעג מען גלייבן מיט אמונה פשוטה, מיט בלינדקייט??